ទោះជាសេចក្តីសម្រេច ស្តីពីការព្យួរប្រព័ន្ធអនុគ្រោះពន្ធ EBA ២០ភាគរយ ចូលជាធរមានហើយក៏ដោយ ក៏សមាគមរោងចក្រកាត់ដេរនៅកម្ពុជា (GMAC) មិនទាន់បញ្ឈប់ការស្វែងរកមធ្យោបាយ ក្នុងការទាមទារមកវិញដែរ។ មធ្យោបាយចុងក្រោយរបស់សមាគម ដែលធ្វើការងារផ្នែកវិស័យកាត់ដេរមួយនេះ គឺការដាក់បណ្តឹង ទៅតុលាការយុត្តិធម៌អឺរ៉ុប ដើម្បីសុំជំទាស់នឹងសេចក្តីសម្រេចរបស់គណៈកម្មការអឺរ៉ុប ដែលព្យួរ EBA ២០ភាគរយ នៅកម្ពុជា។
លោក ខេន លូ អគ្គលេខាធិការរបស់សមាគមរោងចក្រកាត់ដេរ ប្រាប់សារព័ត៌មានថ្មីៗ តាមទូរស័ព្ទ នៅថ្ងៃទី២៨ ខែកញ្ញា ឆ្នាំ២០២០ ថា តុលាការយុត្តិធម៌អឺរ៉ុប បានទទួលពាក្យបណ្តឹងនោះហើយ។ លោក លើកមូលហេតុថា ការដាក់បណ្តឹងទៅតុលាការយុត្តិធម៌អឺរ៉ុប គឺដោយសារតែការសម្រេចរបស់គណៈកម្មការអឺរ៉ុប ក្នុងការព្យួរ EBA ២០ភាគរយ មិនមានយុត្តិធម៌ សម្រាប់កម្ពុជា។
យ៉ាងណា អគ្គលេខាធិការរូបនេះ មិនអាចសន្និដ្ឋានបានឡើយថា តុលាការយុត្តិធម៌អឺរ៉ុប នឹងសម្រេចសេចក្តីតាមការស្នើសុំរបស់សមាគមរោងចក្រកាត់ដេរ ដោយផ្តល់ EBA ២០ភាគរយនោះមកកម្ពុជាវិញ ឬយ៉ាងណា។ លោក មានប្រសាសន៍យ៉ាងខ្លីថា៖«អាហ្នឹង យើងចាំតុលាការ ដោះស្រាយបញ្ហាតាមនីតិវិធី»។
លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា ចាត់ទុកការដាក់ពាក្យប្តឹង ថាជារឿងឯកជននិងជាផលប្រយោជន៍របស់សមាគមរោងចក្រកាត់ដេរ ដូច្នេះ រដ្ឋាភិបាល មិនលូកដៃចូលឡើយ។ លោក បានថ្លែងមកកាន់សារព័ត៌មានថ្មីៗ តាមទូរស័ព្ទថា៖«ចំពោះ Gmac ទៅតវ៉ា គឺជារឿងរបស់គាត់»។
អ្នកនាំពាក្យរូបនេះ បន្ថែមថា មុននឹងបាត់ EBA ២០ភាគរយ រដ្ឋាភិបាលកម្ពុជា បានឆ្លើយតបអស់ហើយ ចំពោះការចង់ដឹងរបស់គណៈកម្មការអឺរ៉ុប។ លោក បន្តថា ក្នុងរឿង EBA នេះ រដ្ឋាភិបាលកម្ពុជា អត់មានអ្វី ដែលត្រូវពន្យល់ទៅគណៈកម្មការអឺរ៉ុបទៀតនោះទេ។ លោក បញ្ជាក់ថា៖«យើង ធ្វើអស់ពីសមត្ថភាពរបស់យើងហើយ ហើយយើងយល់ថា ការផ្តាច់ EBA [២០ភាគរយហ្នឹង] គឺជាអំពើអយុត្តិធម៌ និងជារឿងនយោបាយច្រើនជាង»។
លោក អាត់ ធន់ មេសហជីពមួយរូប ដែលតែងឈរខាងកម្មករ យល់ថា បើការសម្រេចរបស់គណៈកម្មការអឺរ៉ុប ក្នុងការព្យួរ EBA ២០ភាគរយ មិនមានភាពត្រឹមត្រូវ តុលាការយុត្តិធម៌អឺរ៉ុប អាចនឹងផ្តល់យុត្តិធម៌ជូនកម្ពុជាវិញ តែបើការសម្រេចរបស់គណៈកម្មការអឺរ៉ុប ប្រកបដោយភាពត្រឹមត្រឹម តុលាការ មិនអាចជួយអ្វីដល់កម្ពុជាបានឡើយ។ សម្រាប់លោក លោក មើលឃើញថា គណៈកម្មការអឺរ៉ុប ធ្វើការម៉ត់ចត់ ស៊ីជម្រៅ មានព័ត៌មានច្បាស់លាស់ និង ប្រើពេលយូរ មុនឈានដល់សម្រេចព្យួរ EBA ២០ភាគរយ។
ជាមួយគ្នានេះ លោក បានអំពាវនាវថា សមាគមរោងចក្រកាត់ដេរ រួមទាំងថៅកែ គួរតែពិនិត្យមើលអនុសាសន៍របស់គណៈកម្មការអឺរ៉ុបផងដែរ ស្របពេលដែលប្តឹងជំនាស់នឹងសេចក្តីសម្រេចក្នុងការព្យួរ EBA ២០ភាគរយ។ លោក លើកឡើងថា ទាំងសមាគមរោងចក្រកាត់ដេរ ទាំងថៅកែ គួរពិនិត្យមើលលើការបិទសិទ្ធិសេរីភាព ការបញ្ឈប់កម្មករ និង ការរំលោភបំពានផ្សេងៗទៀត។
បន្ថែមពីនេះ លោក អំពាវនាវដល់រដ្ឋាភិបាល ឲ្យពិនិត្យមើលសិទ្ធិមនុស្ស សិទ្ធិនយោបាយ និង សិទ្ធិការងារ ជាដើម ដើម្បីឲ្យស្របតាមរដ្ឋធម្មនុញ្ញនិងច្បាប់កម្ពុជា រូមទាំង និង គោលការណ៍អន្តរជាតិ។
មេសហជីពរូបនេះ ដែលផ្តល់បទសម្ភាសដល់សារព័ត៌មានថ្មីៗ តាមទូរស័ព្ទដែរនោះ បាននិយាយថា៖«ទោះមានការសម្រេច១០០ភាគរយហើយ [ក្នុងការព្យួរ EBA ២០ភាគរយ] តែនៅមានសង្ឃឹមថា នឹងអាចជជែកគ្នាបានមកវិញ បើមានការកែប្រែអ៊ីចឹង»។
នៅថ្ងៃទី១១ ខែកុម្ភៈ ឆ្នាំ២០១៩ គណៈកម្មការអឺរ៉ុប បានចាប់ផ្តើមនីតិវិធីនៃព្យួរ EBA នៅកម្ពុជា។ មួយឆ្នាំក្រោយមក គឺនៅថ្ងៃទី១២ កុម្ភៈ ឆ្នាំ២០២០ គណៈកម្មការអឺរ៉ុប ក៏សម្រេចព្យួរ EBA ២០ភាគរយ។ កន្លះឆ្នាំមកទៀត គឺរហូតដល់ថ្ងៃទី១២ ខែសីហា ឆ្នាំ២០២០ សេចក្តីសម្រចស្តីពីការព្យួរ EBA ២០ភាគរយ ក៏ចូលជាធរមាន ដែលមានន័យថា កម្ពុជា ត្រូវបង់ពន្ធលើមុខទំនិញប្រមាណ២០ភាគរយ ពេលនាំចូលទៅទីផ្សារអឺរ៉ុប។
គណៈកម្មការអឺរ៉ុប វាយតម្លៃថា ការព្យួរ EBA ២០ភាគរយនេះ នឹងធ្វើឲ្យកម្ពុជា ប៉ះពាល់ខ្លាំង ទៅលើការនាំចេញផលិតផលមួយចំនួន រួមមាន សម្លៀកបំពាក់ ស្បែកជើង រួមទាំងផលិតផលធ្វើដំណើរ ដូចជាវ៉ាលី និង កាបូប ជាដើម ព្រមទាំងស្ករសផងដែរ។
មុននឹងសេចក្តីសម្រេចស្តីការព្យួរ EBA ២០ភាគរយ ចូលជាធរមាន សមាគមរោងចក្រកាត់ដេរ រួមជាមួយស្ថាប័នឯកជនពីរទៀត គឺ សមាគមស្បែកជើងនៅកម្ពុជា (CFA) និង សភាពាណិជ្ជកម្មអឺរ៉ុបនៅកម្ពុជា (EuroCham) បានប្រឹងប្រែងខ្លាំង ក្នុងការសុំឲ្យគណៈកម្មការអឺរ៉ុប ពិចារណាឡើងវិញ។ លើសពីនេះ ស្ថាប័នក្រៅរដ្ឋាភិបាលទាំងបី ក៏ធ្លាប់សរសេរលិខិតរួមគ្នា ផ្ញើទៅគណៈកម្មការអឺរ៉ុបដែរ ដើម្បីសុំឲ្យពន្យារពេលមួយឆ្នាំទៀត ពោលគឺ ចាំដល់ខែសីហា ឆ្នាំ២០២១ ចាំព្យួរ EBA ២០ភាគរយ។ ប៉ុន្តែ ការខ្នះខ្នែងនេះ មិនទទួលបានលទ្ធផលវិជ្ជមានឡើយ។
ថ្វីបើ ការព្យួរ EBA ២០ភាគរយ ចូលជាធរមានហើយក៏ដោយ តែគណៈកម្មការអឺរ៉ុប នៅផ្តល់ផ្លូវដល់កម្ពុជា ដើម្បីបានមកវិញ។ គណៈកម្មការអឺរ៉ុប ប្រាប់ថា៖«បើរដ្ឋាភិបាលកម្ពុជា បង្ហាញការវិវឌ្ឍគួរកត់ឲ្យសម្គាល់ណាមួយ លើ [ការគោរព] សិទ្ធិនយោបាយនិងសិទ្ធិស៊ីវិល គណៈកម្មការអឺរ៉ុប នឹងពិចារណាជាថ្មីពីសេចក្តីសម្រេច [នៃការដក EBA ២០ភាគរយនេះ] ហើយអាចនឹងផ្តល់ជូន EBA ដូចដើមវិញ»។
រដ្ឋាភិបាលកម្ពុជា ប្រកាសជាដដែលៗថា នឹងមិនយកអធិបតេយ្យនិងឯករាជ្យទៅដោះដូរនឹងជំនួយឬការអនុគ្រោះឡើយ។ រដ្ឋាភិបាលកម្ពុជា បង្ហាញជំហររឹងពឹងថា កម្ពុជា នឹងប្រឹងរស់ដោយខ្លួនឯង៕