អន្តរជាតិ
លោក ចនសុន សន្យាបង្កើនដីអភិរក្សឲ្យបាន៣០ភាគរយនៃផ្ទៃដីសរុបចក្រភពអង់គ្លេសនៅឆ្នាំ២០៣០ រូបភាព RSBP
×
ដោយ៖កង ម៉េងហុង
នាយករដ្ឋមន្ត្រីចក្រភពអង់គ្លេស បូរីស ចនសុន បានសន្យាបង្កើនទំហំដីអភិរក្សឲ្យដល់៣០ភាគរយនៃនៃផ្ទៃដីសរុបរបស់ចក្រភពអង់គ្លេស។ ដើម្បីអនុវត្តតាមការប្ដេជ្ញាចិត្តដែលមានគោលដៅគាំទ្រដល់ការងើបឡើងនៃធម្មជាតិ តំបន់ជនបទរបស់ប្រទេសអង់គ្លេសចំនួនបួនសែននាក់ហិកតា នឹងត្រូវដាក់ឲ្យក្រោមការការពារ ស្របពេលដែលទំហំដីអភិរក្សនៅផ្នែកផ្សេងទៀតនៅចក្រភពអង់គ្លេស ក៏នឹងត្រូវបង្កើនដែរ។
យោងតាមសារព័ត៌មាន BBC លោកនាយករដ្ឋមន្ត្រី បូរីស ចនសុន នឹងប្រកាសពីការប្ដេជ្ញាចិត្តរបស់ចក្រភពអង់គ្លេសក្នុងការបង្កើនទំហំដីអភិរក្សក្នុងកិច្ចប្រជុំអន្តរជាតិមួយស្ដីពីធម្មជាតិ។ លោក ចនសុន នឹងចូលរួមជាមួយមេដឹកនាំចំនួនប្រទេស ក្នុងយុទ្ធនាការបញ្ចៀសការបាត់បង់នៅក្នុងពិភពលោកធម្មជាតិនៅត្រឹមឆ្នាំ២០៣០។
សព្វថ្ងៃ ផ្ទៃដីឧទ្យានជាតិដែលជាតំបន់មានសម្រស់ធម្មជាតិល្អប្លែក និងតំបន់ការពារផ្សេងៗទៀត មានទំហំ២៦ភាគរយនៃផ្ទៃដីប្រទេសអង់គ្លេស។ ក្នុងសម្រង់សុន្ទរកថាដែលលោក ចនសុន នឹងថ្លែងក្នុងជំនួបខាងមុខ រដ្ឋាភិបាលរបស់លោក នឹងបង្កើនចំនួនផ្ទៃដីដែលទទួលបានការការពារនេះពី២៦ភាគរយនាពេលបច្ចុប្បន្នដល់៣០ភាគរយនៅឆ្នាំ២០៣០។ នេះបើតាមប្រភព័ត៌មានដដែល។
ខណៈបរិស្ថាន ជាបញ្ហាដែលស្មុគស្មាញនោះ រដ្ឋាភិបាលអង់គ្លេស នឹងធ្វើការជាមួយប្រទេសស្កុតលែន វែលស៍ និងអៀរឡង់ខាងជើង ក៏ដូចជាម្ចាស់ដីឯកជនដើម្បីបង្កើនបរិមាណដីការពារនៅទូទាំងចក្រភពអង់គ្លេស។ អង់គ្លេស ស្កុតលែន វែលស៍ និងអៀរឡង់ខាងជើង ជារដ្ឋចំណុះចក្រភពអង់គ្លេស។
«យើងមិនអាចស្ទាក់ស្ទើរ និងពន្យារពេលបានទេ ព្រោះជីវចម្រុះកំពុងបាត់បង់រាល់ថ្ងៃ ហើយការបាត់បង់នេះ មានអត្រាគួរឲ្យភ័យខ្លាចទៀតផង។» នេះជាអ្វីដែលលោក ចនសុន នឹងថ្លែងក្នុងកិច្ចប្រជុំអន្តរជាតិខាងលើ។ លោកក៏នឹងទទូចឲ្យប្រទេសទាំងអស់ប្រែក្លាយការនិយាយទាំងអម្បាលម៉ានទៅជាសកម្មភាពជាក់ស្ដែង និងសម្រេចឲ្យបានគោលដៅសម្រាប់ការការពារធម្មជាតិជាមួយការដាក់កំហិតតែម្ដង។
ជាមួយគ្នានេះ លោកនាយករដ្ឋមន្ត្រី ចនសុន ក៏នឹងចុះហត្ថលេខាលើ «ការសន្យារបស់មេដឹកនាំសម្រាប់ធម្មជាតិ» ដែលរួមបញ្ចូលការប្តេជ្ញាចិត្តផ្តល់អាទិភាពដល់ការស្តារបរិស្ថានឡើងវិញក្នុងវិធានការស្ដារសេដ្ឋកិច្ចក្រោយការរីករាលដាលនៃវីរុសកូរ៉ូណា ការស្រេចឲ្យបានគោលដៅជីវចម្រុះ និងការបង្កើនហិរញ្ញប្បទានសម្រាប់ធម្មជាតិ៕
Tag:
អង់គ្លេស
ធម្មជាតិ
បូរីស ចនសុន
© រក្សាសិទ្ធិដោយ thmeythmey.com