ជាតិ
ស្រុកបន្ទាយស្រីលែងត្រី២ម៉ឺនក្បាល និងប្រវឹកជិត៤០០ក្បាលនៅសហគមន៍បឹងឈូក
× កូនត្រីប្រា ត្រីក្រាញ់ និងត្រីឆ្ពិន ប្រមាណ២ម៉ឺនក្បាល ត្រូវបានលែងចូលក្នុងបឹងធម្មជាតិ«បឹងឈូក» ស្ថិតក្នុងស្រុកបន្ទាយស្រីដើម្បីរក្សាតុល្យភាព នៃការអភិវឌ្ឍ និងអភិរក្ស តាមយៈការធានានិរន្តរភាពនៃរជីវៈចម្រុះ និងចីរភាពនៃប្រព័ន្ធអេកូឡូស៊ី នៅក្នុងតំបន់។ កាលពី២ថ្ងៃកន្លងមក ពោលគឺនៅថ្ងៃទី២៧ ខែកញ្ញា លោក ឃឹម ហ្វីណង់ដែលជាអភិបាលស្រុក ក៏បានដឹកនាំពិធីដោះលែងសត្វប្រវឹកជិត៤០០ក្បាល ឲ្យរស់នៅក្នុងសហគមន៍បឹងឈូកផងដែរ។
ការលែងកូនត្រី២ម៉ឺនក្បាលនាថ្ងៃទី២៩ ខែកញ្ញា ដែលធ្វើឡើងក្រោមកិច្ចសហការនិងបដិភាគថវិកា ពីសហគមន៍ទេសចរណ៍បឹងឈូក ត្រូវបានលោកអភិបាលស្រុកបន្ទាយស្រី លើកឡើងពីសារប្រយោជន៍ក្នុងការជំរុញសក្ដានុពលនៃវិស័យទេសចរណ៍ផង និងជាការបង្កើនទិន្នផលត្រីធម្មជាតិផងដែរ។
លោកអភិបាលស្រុកបន្ទាយស្រី ព្យាយាមប្រែក្លាយឲ្យដែនរដ្ឋបាលខ្លួនឲ្យក្លាយជាទិសដៅកសិ-ទេសចរណ៍មួយ និងចង់ឲ្យរមណីយដ្ឋានបឹងឈូក ក្លាយទៅជា”បឹងស្ទូចត្រីធម្មជាតិ” ដែលជាផ្នែកមួយជួយបង្កើនទេសចរក្នុងតំបន់។
បន្ថែមពីនេះ លោក ឃឹម ហ្វីណង់ ចង់ឲ្យសហគមន៍មានបំរាមចំពោះសកម្មភាពនេសាទដូចជាការដាក់មង ដោយបង្កើតជាកន្លែងស្ទូចត្រី ដោយយកកម្រៃតិចតួចដើម្បីទាក់ទាញអ្នកទេសចរ និងយកថវិកា ដែលរកបានទៅទិញកូនត្រីធម្មជាតិ សម្រាប់ចាក់បំពេញបន្ថែមវិញ។
ដោយឡែកកាលពីថ្ងៃទី២៧ ខែកញ្ញា រដ្ឋបាលស្រុកបន្ទាយស្រី បានដោះលែងសត្វប្រវឹកប្រមាណ៤០០ក្បាលដែល ត្រូវបានអាជ្ញាធរបង្ក្រាបនៅក្នុងភូមិសាស្ត្រស្រុកប្រាសាទបាគង កាលពីពេលកន្លងទៅ។ ការលែងសត្វនេះ គឺដើម្បីចូលរួមក្នុងការអភិរក្សសត្វព្រៃ ដែលជិតផុតពូជ និងជាការចូលរួមថែរក្សាជីវចម្រុះ នៅក្នុងមូលដ្ឋាន ឱ្យមានភាពស្រស់បំព្រងឡើងវិញ។ នេះបើតាមរដ្ឋបាលស្រុកបន្ទាយស្រី៕
Tag:
បន្ទាយស្រី
លែងកូនត្រី
ប្រវឹក
© រក្សាសិទ្ធិដោយ thmeythmey.com