ភ្នំពេញ៖ រដ្ឋមន្ត្រីក្រសួងកសិកម្ម លោក វេង សាខុន បានណែនាំពូជស្រូវចំនួន១៧ ប្រភេទ ដល់កសិករងាយស្រួលជ្រើសរើសប្រភេទពូជស្រូវ ឱ្យសមស្របតាមលក្ខខណ្ឌដាំដុះ បំរែបំរួលអាកាសធាតុ និងទីផ្សារ។
បើតាមហ្វេសប៊ុករបស់លោក វេង សាខុន រដ្ឋមន្ត្រីក្រសួងកសិកម្ម ប្រភេទពូជស្រូវទាំង១៧នោះ រួមមាន៖
១, ប្រភេទពូជស្រូវខា១៥ មានអាយុកាល៩៥-១០៥ថ្ងៃ មានកម្ពស់៩៥-១១៥សង់ទីម៉ែត្រ និងពណ៌អង្ករសថ្លា។ ពូជស្រូវនេះ ធន់នឹងជំងឺប្លាស់ និងមមាចត្នោត ហើយទទួលបានផល ៤,០-៧,៤តោនក្នុងមួយហិកតា ។
២, ប្រភេទពូជស្រូវខា១៦ មានអាយុកាល ៩៥-១១០ថ្ងៃ មានកម្ពស់ ១០០-១១០សង់ទីម៉ែត្រ និងពណ៌អង្ករសថ្លា។ ពូជស្រូវនេះ ធន់នឹងកម្ដៅ និងទទួលបានផល ៤,១-៦,៨ តោនក្នុងមួយហិកតា។
៣, ពូជស្រូវ ផ្ការំដេង ជាប្រភេទស្រូវធន់នឹងទឹកជំនន់ និងដីប្រៃ មានកម្ពស់១១០-១៧០ សង់ទីម៉ែត្រ។ ពូជស្រូវនេះ អាចទទួលផល ៣,០-៦,៥ តោនក្នុងមួយហិកតា លក្ខណៈពិសេសនៃស្រូវនេះ គឺមានក្លិនក្រអូបខ្លាំង និងបាយមានរសជាតិឆ្ងាញ់។
៤, ពូជស្រូវ ផ្កាច័ន្ទសែនសរ ជាស្រូវធន់នឹងជំងឺប្លាស់ មានកម្ពស់១៥០-១៦០ សង់ទីម៉ែត្រ ទទួលផលបាន ៣,០-៥,០ តោនក្នុងមួយហិកតា ហើយពេលវេលាចេញផ្កា ថ្ងៃ២៥តុលា-២ វិច្ឆិកា។ ពូជស្រូវនេះ មានពណ៌អង្ករ សស្រអាប់បន្តិច និងបាយទន់ល្មម។
៥,ពូជស្រូវ ផ្កាមាលតី ជាស្រូវធន់នឹងទឹកជំនន់ រាំងស្ងួត និងការដួលដើម។ ស្រូវនេះ ទទួលបានផល ៣,០-៥,៥តោនក្នុងមួយហិកតា មានកម្ពស់១៤០-១៦០សង់ទីម៉ែត្រ។ រីឯពណ៌អង្ករ សថ្លា និងបាយមានក្លិនក្រអូបស្រាល។
៦, ពូជស្រូវ ខា៤ ជាស្រូវធន់មធ្យមនឹងទឹកជំនន់ រាំងស្ងួត និងមមាចត្នោត។ ស្រូវនេះ មានកម្ពស់១៣០-១៧០ សង់ទីម៉ែត្រ ពេលវេលាចេញផ្កា ថ្ងៃ៨-១៥វិច្ឆិកា និងទទួលផលបាន ២,៥-៥,០តោនក្នុងមួយហិកតា។
៧,ពូជស្រូវខា៦ ជាស្រូវធន់នឹងទឹកជំនន់និងមមាចត្នោត។ ស្រូវនេះមានកម្ពស់ ១៣០-១៨០សង់ទីម៉ែត្រ ចេញផ្កានៅថ្ងៃទី១០-១៥ ខែវិច្ឆិកា។ រីឯអង្ករមានពណ៌សស្រអាប់បន្តិច និងទទួលផលបាន២,៥-៥,០តោនក្នុងមួយហិកតា។
៨, ពូជស្រូវ ខា៩ ជាស្រូវធន់នឹងទឹកជំនន់ និងការដួលដើម។ ស្រូវប្រភេទនេះ ចេញផ្កាថ្ងៃទី១០-១៧ ខែវិច្ឆិកា មានកម្ពស់១៤០-១៨០សង់ទីម៉ែត្រ ទទួលផលបាន២,៥-៤,៥តោនក្នុងមួយហិកតា ហើយអង្ករមានពណ៌សស្រអាប់បន្តិច។
៩, ពូជស្រូវ រាំងជ័យ ជាស្រូវធន់នឹងការដួលដើម និងជំងឺប្លាស់។ ស្រូវប្រភេទនេះ ចេញផ្កានៅថ្ងៃទី៥-១០វិច្ឆិកា មានកម្ពស់១០៥-១៧០សង់ទីម៉ែត្រ ទទួលបានផល ៣,៥-៥-៥តោនក្នុងមួយហិកតា និងអង្ករ មានពណ៌សថ្លា។ ស្រូវប្រភេទនេះ កសិករពេញនិយមដាំដុះលើដីស្រែក្រោមដែលមានជាង៤០ភាគរយ នៃស្រែទំនាបរំពឹងទឹកភ្លៀង។
១០, ពូជស្រូវ អ៊ីអ៊ែរ៦៦ ជាស្រូវធន់នឹងជំងឺប្លាស់ មមាចត្នោត និងដង្កូវរូងដើម។ ស្រូវប្រភេទនេះ មានអាយុកាល១០៥-១១៥ ថ្ងៃ មានកម្ពស់ ៨០ -១១៨សង់ទីម៉ែត្រ ទទួលផលបាន៤,០-៦,៥តោនក្នុងមួយហិកតា និងអង្ករ មានពណ៌សថ្លា។
១១, ពូជស្រូវ ជលសារ ជាស្រូវធន់នឹងជំងឺប្លាស់ និងមមាចត្នោត។ ស្រូវប្រភេទនេះ មានអាយុកាល ៩៥-១១០ថ្ងៃ មានកម្ពស់ ៧៥-៩៥សង់ទីម៉ែត្រ ទទួលផលបាន៤,០-៦,០តោនក្នុងមួយហិកតា និងអង្ករមានពណ៌ សស្រអាប់បន្តិច។
១២, ពូជស្រូវ សែនពិដោរ ជាស្រូវធន់នឹងប្លាស់ និងមានក្លិនក្រអូបមធ្យម។ ស្រូវប្រភេទនេះ មានអាយុកាល ១១០-១២០ថ្ងៃ មានកម្ពស់៩៤-១១០ សង់ទីម៉ែត្រ អង្ករមានពណ៌សថ្លា ទទួលផលបាន ៣,៧-៧,៥ហិកតា។
១៣,ពូជស្រូវ សែនក្រអូប០១ មានអាយុកាល១០៥-១១៥ ថ្ងៃ កម្ពស់១០៥-១១៥ សង់ទីម៉ែត្រ និងទទួលផលបាន ៣,៩-៤-៩តោន ក្នុងមួយហិកតា។
១៤, ពូជស្រូវ ផ្ការំដួល ជាស្រូវធន់នឹងទឹកជំនន់និងដីប្រៃ។ ស្រូវប្រភេទនេះ ចេញផ្កានៅថ្ងៃទី ១៥-២៥ ខែតុលា មានកម្ពស់ ១១០-១៧០សង់ទីម៉ែត្រ អង្ករមានពណ៌សថ្លា និងបាយមានរសជាតិឆ្ងាញ់ និងក្លិនក្រអូបខ្លាំង។
១៥, ពូជស្រូវ ផ្ការមៀត ជាស្រូវធន់នឹងទឹកជំនន់ដីប្រៃ និងជំងឺប្លាស់។ ស្រូវប្រភេទនេះ ចេញផ្កានៅថ្ងៃទី ១០-២៥តុលា មានកម្ពស់១១០-១៧០សង់ទីម៉ែត្រ ទទួលផល៣,០-៦,៥តោនក្នុងមួយហិកតា។ រីឯ អង្ករមានពណ៌សថ្លា និងបាយមានក្លិនក្រអូបខ្លាំង។
១៦, ពូជស្រូវ ដំណើបស្បៃមង្គម ជាស្រូវដំណើប ដែលធន់នឹងជំនន់ រាំងស្ងួត និងជំងឺប្លាស់។ ប្រភេទស្រូវនេះ ចេញផ្កានៅថ្ងៃទី១០-២០ខែវិច្ឆិកា មានកម្ពស់១៤០-១៦០សង់ទីម៉ែត្រ ទទួលផលបាន ៣,២-៥,៥ តោនក្នុងមួយហិកតា។ រីឯ អង្ករមានពណ៌ស្រអាប់ និងមានតម្លៃថ្លៃ។
១៧,ពូជស្រូវ ស្មាច់០២ មានកម្ពស់១៦០-១៧០សង់ទីម៉ែត្រ ចេញផ្កានៅថ្ងៃទី២៥ វិច្ឆិកា- ១០ធ្នូ ទទួលផលបាន ៣,២-៤,២ តោនក្នុងមួយហិកតា។ ស្រូវប្រភេទនេះ អង្ករមានពណ៌ក្រហមថ្លា សម្បូរសារធាតុសរសៃ សមប្រកបសម្រាប់អ្នកជំងឺទឹកនោមផ្អែម និងមានតម្លៃថ្លៃ៕