COVID-19
អន្តរជាតិ
ប្រមុខការទូតចិន៖ ការប្រយុទ្ធជាមួយ COVID-19 តែម្នាក់ឯង គឺជាគ្រោះមហន្តរាយ
លោក វ៉ាង យី រដ្ឋមន្រ្តីការបរទេសចិន និងជាទីប្រឹក្សារដ្ឋចិន។ រូបភាព៖ Reuters
×![]()
ដោយ: ធៀន ភារិន្ទ
ការប្រយុទ្ធប្រឆាំងCOVID-19 តែម្នាក់ឯង និងការបន្ទោសដាក់គ្នាទៅវិញទៅមក គឺមានតែនាំមកនូវគ្រោះមហន្តរាយប៉ុណ្ណោះ។ ប្រមុខការទូតចិន លោកវ៉ាង យី នៅថ្ងៃទី២៩ ខែកញ្ញា បានលើកឡើងបែបនេះ ដោយបន្ថែមថា ពិភពលោក គួរតែសហការជាមួយគ្នា ដើម្បីលុបបំបាត់ជាមួយជំងឺឆ្លងសកលមួយនេះ។ 
ថ្លែងនៅក្នុងវេទិកាមួយ ដែលរៀបចំដោយសមាគមការទូតសាធារណៈចិន លោកវ៉ាង យី រដ្ឋមន្ត្រីការបរទេស និងជាទីប្រឹក្សារដ្ឋចិន បានលើកឡើងថា ប្រទេសនីមួយៗ មិនអាចប្រយុទ្ធប្រឆាំងCOVID-19 តែម្នាក់ឯងឡើយ។ «ក្រៅពីសហការជាមួយគ្នា និងជួយគ្នាទៅវិញទៅមក យើងគ្មានជម្រើសផ្សេងទេ»។ លោកវ៉ាង បានលើកឡើងបែបនេះ ដោយបន្ថែមថា ដូចការលើកឡើងរបស់អគ្គលេខាធិការអង្គការសហប្រជាជាតិលោកអាន់តូនីញ៉ូ ហ្គូតេរ៉េស កន្លងមក COVID-19 មិនមែនជាការដាស់តឿនប្រាប់ពិភពលោកប៉ុណ្ណោះទេ ប៉ុន្តែវាគឺជាសញ្ញានៃវិបត្តិ។
បើសិនបើមិនសហការជាមួយគ្នាទេ ពិភពលោកនឹងជួបគ្រោះមហន្តរាយ។ បើតាមការអះអាងប្រមុខការទូតចិន «នៅក្នុងការប្រឈមមុខនឹងបញ្ហាសកលដូចជាជំងឺរាតត្បាត បើសិនបើយើងប្រយុទ្ធតាមផ្លូវខ្លួនឯង ឬចាត់ទុកប្រទេសផ្សេងទៀតជាសត្រូវ វានឹងនាំមកនូវគ្រោះមហន្តរាយដ៏ធំធេង»។
ក្នុងវេទិកាក្នុងទីក្រុងប៉េកាំងដដែលនេះ លោកវ៉ាង បានបន្ថែមទៀតថា នៅក្នុងមហាសន្និបាតអង្គការសហប្រជាជាតិកន្លងមក ប្រទេសមួយចំនួន បានយកកិច្ចប្រជុំអន្តរជាតិមួយនេះ មកបម្រើឲ្យផលប្រយោជន៍ និងនយោបាយផ្ទាល់ខ្លួន ដើម្បីវាយប្រហារលើប្រទេសផ្សេង។ យ៉ាងក៏ដោយ ប្រមុខការទូតចិនរូបនេះ មិនបានបញ្ជាក់ប្រទេសណាមួយឡើយ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
សូមបញ្ជាក់ថា នៅក្នុងមហាសន្និបាតអង្គការសហប្រជាជាតិកន្លងទៅ ប្រធានាធិបតីអាមេរិក លោកដូណាល់ ត្រាំ បានចោទចិនថា បើកផ្លូវឲ្យប្រជាជនខ្លួនចាកចេញពីប្រទេសក្នុងដំណាក់កាលដំបូងនៃការផ្ទុះរាលដាល COVID-19។ ជាការឆ្លើយតប អគ្គរដ្ឋទូតចិនប្រចាំអង្គការសហប្រជាជាតិ លោកZhang Jun បានបដិសេធការចោទប្រកាន់់របស់លោក ត្រាំ ប្រឆាំងចិន ដោយចាត់ទុកថា គ្មានមូលដ្ឋានច្បាស់លាស់ បង្ករឿងក្តៅក្រហាយ និងបង្កើតការបែកបាក់គ្នា៕
Tag:
ចិន
COVID-19
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
