អន្តរជាតិ
នយោបាយអន្តរជាតិ
ថៃ ផ្លាស់ប្ដូរតំណែងមេទ័ពជើងគោកដ៏មានឥទ្ធិពល ចំពេលនយោបាយក្នុងស្រុកកំពុងក្ដៅ ឧត្តមសេនីយ៍ Narongpan Jitkaewtae មេបញ្ជាការថ្មីកងទ័ពជើងគោកថៃ។ រូបភាព AFP
× នៅថ្ងៃទី២៩ ខែកញ្ញា មេទ័ពជើងគោកថៃ ត្រូវបានផ្លាស់ប្ដូរក្នុងការផ្ទេរតំណែងដែលជាផ្នែកមួយនៃការផ្លាស់ប្ដូរតំណែងសំខាន់ក្នុងជួរកងទ័ពថៃដែលធ្វើឡើងប្រចាំឆ្នាំ។ ទោះជាការផ្លាស់ប្ដូរតាមទម្លាប់ក្ដី ការដោះដូរនៅឆ្នាំនេះកើតឡើង ខណៈដែលស្ថានការណ៍នយោបាយក្នុងស្រុកកំពុងក្ដៅដោយសារបាតុកម្មស្ទើរមិនលស់ថ្ងៃ។ មេបញ្ជាការកងទ័ពជើងគោកថ្មី ដែលជាតំណែងមានឥទ្ធិពលបំផុត បានប្រកាសការពារសន្តិសុខជាតិ និងស្ថាប័នមហាក្សត្រ។
ក្នុងពិធីផ្ទេរតំណែងនៅថ្ងៃទី២៩ ខែកញ្ញា ឧត្តមសេនីយ៍ Apirat Kongsompong បានប្រគល់ទង់កងទ័ពជើងគោកឲ្យឧត្តមសេនីយ៍ Narongphan Jitkaewtae ដែលក្លាយជាមេបញ្ជាការងកងទ័ពជើងគោកថ្មី។ លោក Narongphan ជាមេទ័ពស្និទ្ធរាជវាំងថៃ ហើយត្រូវបានជ្រើសរើសសម្រាប់តំណែងនេះដោយលោក Apirat ផ្ទាល់។ លោក Apirat ក៏ជាមនុស្សសិ្នទ្ធរាជវាំងដែរ។
ការផ្លាស់ប្ដូរតំណែងនេះ ជាការធ្វើតាមទម្លាប់ប៉ុណ្ណោះដោយសារលោក Apirat ដែលកាន់តំណែងតាំងពីឆ្នាំ២០១៨ មក ដល់អាយុចូលនិវត្តន៍។ ប៉ុន្តែអ្វីដែលគេចាប់អារម្មណ៍នោះ វាកើតចំពេលដែលបាតុកម្មតវ៉ាប្រឆាំងរដ្ឋាភិបាល និងមហាក្សត្រថៃ បានកើនឡើងកាន់តែខ្លាំង។ ខណៈលោក Apirat មានជំហរដាច់ខាតចំពោះមុខការតវ៉ា គេក៏រំពឹងថា លោក Narongphan នឹងការពារស្ថាប័នមហាក្សត្រយ៉ាងម៉ឺងម៉ាត់ដែរ។
ថ្លែងក្នុងពិធីផ្ទេរកាន់តំណែងនៅទីបញ្ជាការកងទ័ពជើងគោក លោក Narongphan បានប្ដេជ្ញាចិត្តបំពេញការងារសម្រាប់ជាតិ និងការពាររាជបល្ល័ង្ក។ មេបញ្ជាការទ័ពជើងគោកថ្មីរូបនេះ ក៏បានកោតសរសើរលោក Apirat ដែលតាំងចិត្តបានល្អ និងប្ដេជ្ញាចិត្តបំពេញការងារសម្រាប់សង្គម ក៏ដូចជាកែប្រែមុខមាត់កងទ័ព ហើយលោក នឹងបន្តមរតកនេះទៀត។
«ខ្ញុំនឹងការពារ និងអភិវឌ្ឍកងទ័ព ដូចនេះកងទ័ពអាចឈរជាស្ថាប័នគោលការពារសន្តិសុខដែលលើកកម្ពស់ជាតិ និងបល្ល័ង្ក។» នេះជាការសន្យារបស់លោក Narongphan ដែលជាធ្លាប់ទទួលបានការហ្វឹកហាត់ជាអង្គរក្សស្ដេចផង។ នេះបើតាមការផ្សាយរបស់កាសែតបាងកកប៉ុស្តិ៍។
ឧត្តមសេនីយ៍ Narongphan ដឹកនាំកងទ័ពជើងគោកថៃដល់ឆ្នាំ២០២៣ ឯណោះ។ ក្រៅពីតំណែងមេទ័ពជើងគោក តំណែងសំខាន់ៗមួយចំនួនទៀតក៏ត្រូវបានផ្លាស់ប្ដូរ។ ឧត្តសេនីយ៍ Chalermpol Srisawasdi នឹងក្លាយជាអគ្គមេបញ្ជាការកងទ័ពថៃ, ឧត្តសេនីយ៍ Airbull Suttiwan ជាមេទ័ពជើងអាកាស ហើយឧត្តមនាវី Chatchai Srivorakhan ជាមេទ័ពជើងទឹក។ តំណែងទាំងអស់ នឹងចូលធរមានចាប់ពីថ្ងៃទី១ ខែតុលាទៅ៕
Tag:
ថៃ
Apirat Kongsompong
Narongphan Jitkaewtae
© រក្សាសិទ្ធិដោយ thmeythmey.com