Mourinho តាមទៅហៅ Dier ដល់បង្គន់ ក្រោយពេលខ្សែការពាររូបនេះរត់ទៅជុះ ខណៈប្រកួតជាមួយ Chelsea

កីឡាអន្តរជាតិ

អន្តរជាតិ

Mourinho តាមទៅហៅ Dier ដល់បង្គន់ ក្រោយពេលខ្សែការពាររូបនេះរត់ទៅជុះ ខណៈប្រកួតជាមួយ Chelsea

30, Sep 2020 , 3:02 pm

រូបភាព

ដោយ: ទេព ពិទូរ្យ

លោក Jose Mourinho បានសាទរចំពោះ Eric Dier ដែលបង្ហាញពីការខិតខំប្រឹងប្រែងក្នុងនាមកីឡាករដែលទទួលខុសត្រូវខ្ពស់។ ក្នុងអំឡុងការប្រកួតរវាង Totteham Hotspur ទល់ Chelsea ពានរង្វាន់ EFL Cup ខ្សែការពារ Dier បានរត់ចេញពីទីលានយ៉ាងលឿនសំដៅទៅបន្ទប់ទឹកដោយសាររូបគេឈឺបត់ជើងធំ។

ក្នុងជំនួប EFL Cup វគ្គ១៦ក្រុមចុងក្រោយនៅរាត្រីថ្ងៃទី២៩ កញ្ញា មាន់ខ្នាយមាសបានយកឈ្នះតោខៀវដោយការទាត់បាល់ប៉េណាល់ទី ៥-៤។ ក្រុមទាំងពីរបញ្ចប់ក្នុងការប្រកួត៩០នាទីក្នុងលទ្ធផល ១-១ ដោយ Timo Werner ជាអ្នករកគ្រាប់ឲ្យក្រុមលោក Lampard នៅនាទី១៩ មុន Erik Lamela ស៊ុតតាមស្មើឲ្យក្រុមលោក Mourinho នៅនាទី៨៣។ ចូលដល់វគ្គប៉េណាល់ទី Mason Mount ធ្វើមិនបានសម្រេចក្នុងស៊ុតលើកទី៥ ដែលធ្វើឲ្យ Chelsea ធ្លាក់ត្រឹមវគ្គ១៦ក្រុម។

អ្វីដែលគួរឲ្យភ្ញាក់ផ្អើល ខណៈការប្រកួតឈានដល់នាទី២ Dier បានរត់ចេញពីទីលានទៅបន្ទប់ផ្លាស់សម្លៀកបំពាក់ដើម្បីចូលបង្គន់បត់ជើងធំ ហើយ Mourinho បានតាមក្រោយខណៈក្រុមកំពុងត្រូវគេនាំមុខ។ ត្រឹមរយៈពេលមិនដល់១នាទីផង ខ្សែការពារអន្តរជាតិអង់គ្លេស បានរត់ត្រឡប់ចូលទីលានវិញភ្លាមៗ។

អាការរបស់ Dier បែបនេះ ត្រូវបានលោក Mourinho មើលឃើញថាដោយសាររូបគេប្រឹងខ្លាំងរហូតដល់ខ្សោះជាតិទឹក។ ខ្សែការពារវ័យ ២៦ ឆ្នាំរូបនេះ ថែមទាំងត្រូវអ្នកចាត់ការសញ្ជាតិព័រទុយហ្គាល់ចាត់ទុកជាកីឡាករឆ្នើម និងជាប់ជម្រើសដំបូងរបស់លោកទាំងការប្រកួតក្នុងលីគរដូវកាលនេះ។

ក្រោយចប់ការប្រកួតលោក Mourinho បានប្រាប់ទូរទស្សន៍ Sky Sports ថា៖ «អ្វីដែលបានកើតឡើងចំពោះ Dier មិនមែនជារឿងធម្មតាទេ។ ខ្ញុំត្រូវសរសើរគាត់ជាពិសេស។ គាត់ត្រូវតែទៅបង្គន់ជារឿងធម្មតានៅពេលដែលអ្នកខ្សោះជាតិទឹកពីខ្លួន។ ខ្ញុំដឹងថាគាត់ត្រូវទៅបង្គន់ ហើយខ្ញុំក៏រត់តាមគាត់ ដើម្បីព្យាយាមដាក់សម្ពាធលើគាត់ដើម្បីឲ្យគាត់ឆាប់ត្រឡប់មកវិញ។ Dier ជាគំរូល្អសម្រាប់អ្នករាល់គ្នាដើម្បីបង្ហាញពីការទទួលខុសត្រូវ»។

អ្នកចាត់ការ Spurs ថែមទាំងកោតសរសើរចំពោះ Dier ដែលបានស៊ុតបាល់ប៉េណាល់ទីបញ្ចូលទីជួយក្រុមឈានទៅវគ្គបន្តពាន EFL Cup ផង៕