អន្តរជាតិ
តំណាងកូរ៉េខាងជើងនៅ UN៖ ព្យុងយ៉ាង មិនប្តូរសេចក្តីថ្លៃថ្នូររបស់ខ្លួននឹងការអភិវឌ្ឍសេដ្ឋកិច្ចឡើយ លោក គីម សុង អគ្គរដ្ឋទូតកូរ៉េខាងជើងប្រចាំនៅអង្គការសហប្រជាជាតិ ថ្លែងសុន្ទរកថានៅក្នុងមហាសន្និបាត នៅថ្ងៃទី២៩ ខែកញ្ញា ឆ្នាំ២០២០។
× កូរ៉េខាងជើង នឹងមិនលក់សេចក្តីថ្លៃថ្នូររបស់ខ្លួន ដើម្បីប្តូរយកការអភិវឌ្ឍសេដ្ឋកិច្ចឡើយ។ នេះបើតាមការលើកឡើងរបស់អគ្គរដ្ឋទូតកូរ៉េខាងជើងប្រចាំនៅអង្គការសហប្រជាជាតិ (UN) លោក គីម សុង (Kim Song) នៅថ្ងៃទី២៩ ខែកញ្ញា។
ថ្លែងនៅក្នុងមហាសន្និបាតអង្គការសហប្រជាជាតិ អគ្គរដ្ឋទូតកូរ៉េខាងជើង លោកគីម សុង បានលើកឡើងថា វាគឺជារឿងពិត ដែលកូរ៉េខាងជើង ត្រូវការការអភិវឌ្ឍសេដ្ឋកិច្ចយ៉ាងខ្លាំងពីមជ្ឈដ្ឋានខាងក្រៅ ប៉ុន្តែកូរ៉េខាងជើង នឹងមិនប្តូរសេចក្តីថ្លៃថ្នូររបស់ខ្លួនទៅនឹងការអភិវឌ្ឍទាំងនោះឡើយ។ បើតាមលោក គីម សេចក្តីថ្លៃថ្នូរ គឺប្រៀបបានទៅនឹងជីវិតរបស់កូរ៉េខាងជើង ហើយកូរ៉េខាងជើង នឹងមិនផ្លាស់ប្តូរជំហររបស់ខ្លួនឡើយ។
ក្នុងន័យនេះ មន្ត្រីការទូតកូរ៉េខាងជើង បានលើកឡើងពីសម្តីរបស់មេដឹកនាំ គីម ជុងអ៊ុន ដែលបញ្ជាឲ្យកូរ៉េខាងជើង ប្រយុទ្ធជាមួយបញ្ហាលំបាកទាំងឡាយតាមរយៈការពឹងផ្អែកលើខ្លួនឯង។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
តំណាងកូរ៉េខាងជើង មិនបានបញ្ជាក់ឲ្យច្បាស់ពីរឿងដោះដូរនេះទេ តែលោកទំនងចង់សំដៅដល់ការសន្យារបស់អាមេរិកក្នុងការជួយកូរ៉េខាងជើង ជាថ្នូរនឹងការបោះបង់កម្មវិធីនុយក្លេអ៊ែរនោះ។ ការប្រឹងប្រែងរបស់វ៉ាស៊ីនតោនក្នុងបញ្ចុះបញ្ចូលព្យុងយ៉ាងឲ្យបោះបង់នុយក្លេអ៊ែរ មិនបានផលឡើយ ខណៈភាគីទាំងអស់ចង់បានការធ្វើសម្បទានពីភាគីម្ខាងទៀតមុន។
ក្រៅពីរឿងខាងលើ លោក គីម ក៏បន្ថែមថា ពេលនេះ កូរ៉េខាងជើង កំពុងផ្តោតលើការអភិវឌ្ឍសេដ្ឋកិច្ច បន្ទាប់ពីអាចធានាសន្តិសុខ និងសន្តិភាពបានដោយខ្លួនឯ។ លោក គីម បានអះអាងថា ការពង្រឹងកម្លាំងយោធារបស់ខ្លួនឲ្យខ្លាំង ជាការបង្ការមិនឲ្យមានសង្គ្រាម។ ត្រង់នេះ អ្នកការទូតកូរ៉េខាងជើង រៀបរាប់ថា សន្តិភាព មិនអាចបានមកដោយខ្លួនឯងទេ ហើយក៏មិនមែនបានមកដោយការប្រាថ្នាដែរ ប៉ុន្តែបានមកដោយសារកម្លាំងយោធាដ៏ខ្លាំង ព្រោះនៅពេលប្រទេសមួយមានកម្លាំងយោធាខ្លាំង ប្រទេសទាំងនោះ នឹងអាចទទួលបានសន្តិភាព តាមរយៈការបង្ការសង្គ្រាមមិនឲ្យកើតឡើង។
សូមបញ្ជាក់ថា កូរ៉េខាងជើង ធ្លាប់បានប្រកាសថា ខ្លួនបានអភិវឌ្ឍមីស៊ីលចម្ងាយឆ្ងាយ និងអាវុធនុយក្លេអ៊ែររបស់ខ្លួនយ៉ាងល្អ បន្ទាប់បានធ្វើតេស្តមីស៊ីលបាលីស្ទិកជាច្រើនលើកកន្លងមក និងការសាកល្បងអាវុធនុយក្លេអ៊ែរនៅក្នុងឆ្នាំ២០១៧កន្លងទៅ។ កូរ៉េខាងជើង ក៏ប្រកាសខ្លួនជារដ្ឋមាននុយក្លេអ៊ែរដែរ៕
© រក្សាសិទ្ធិដោយ thmeythmey.com