អន្តរជាតិ
ចិន៖ គ្រូបង្រៀនម្នាក់ត្រូវទទួលទោសប្រហារជីវិតក្រោយបំពុលសិស្សស្លាប់ម្នាក់ រូបភាពពី CTVNews
×
ដោយ៖កង ម៉េងហុង
គ្រូបង្រៀនថ្នាក់សាលាមត្តេយ្យម្នាក់នៅតំបន់ Jiaozuo ខេត្ត Henan នាភាគកណ្តាលប្រទេសចិន ដែលមានទោសបំពុលសិស្សខ្លួនបណ្តាលឲ្យស្លាប់ម្នាក់ត្រូវតុលាការកាត់ទោសប្រហារជីវិតកាលពីថ្ងៃច័ន្ទទី ២៨ ខែកញ្ញា។
ករណីបំពុលសិស្សខ្លួនឯងបណ្តាលឲ្យមានអ្នកស្លាប់ និងរងរបួសនោះបាននាំឲ្យគ្រូបង្រៀនម្នាក់នៅក្នុងប្រទេសចិនត្រូវរងទោសប្រហារជីវិត។
កាសែតចិន China Daily ចុះផ្សាយថា តុលាការប្រជាជនចិនប្រចាំទីក្រុង Jiaozuo សម្រេចកាត់ទោសប្រហារជីវិតអ្នកស្រី Wang Yun វ័យ ៣៧ឆ្នាំ ដែលជាគ្រូបង្រៀននៅសាលាមត្តេយ្យម្នាក់ពីបទដាក់សារធាតុគ្រោះថ្នាក់ចូលក្នុងអាហាររបស់កុមារដែលបណ្តាលឱ្យកុមារម្នាក់ស្លាប់។
បើតាមសាលក្រមរបស់តុលាការ ដើមហេតុដែលជំរុញឲ្យមានការដាក់ថ្នាំពុលធ្វើឲ្យសិស្សស្លាប់នេះគឺផ្តើមចេញពីជម្លោះដែលខ្លួនមានជាមួយគ្រូសាលាមត្តេយ្យម្នាក់ទៀតឈ្មោះ Sun។ ថ្ងៃទី ២៧ ខែមីនាឆ្នាំ ២០១៩ ដើម្បីសងសឹកគូបដិបក្ខ លោកស្រី Wang Yun បានដាក់សូដ្យូមនីត្រាតក្នុងបបរដែលជាអាហារបន្ថែមសម្រាប់កុមារដែលរៀននៅក្នុងថ្នាក់របស់ Sun។ ទង្វើនេះបានបណ្តាលឱ្យកុមារចំនួន ២៥ នាក់បានពុល ហើយក្នុងចំណោមនោះមានម្នាក់បានធ្លាក់ខ្លួនឈឺខ្លាំងរហូដល់ស្លាប់។
ក្នុងអំឡុងពេលសវនាការក្នុងខែកក្កដាអ្នកស្រី Wang បានសារភាពកំហុសនិងបង្ហាញពីឆន្ទៈខ្លួនក្នុងការបង់ប្រាក់ឱ្យជនរងគ្រោះដោយនិយាយថានាងបានធ្វើបាបកុមារដោយអចេតនាហើយមិនដឹងថាពួកគេនឹងមានជំងឺអ្វីទេបន្ទាប់ពីបរិភោគបបរមានសារធាតុគីមីនេះទេ។
តាមទៅ សេចក្តីសម្រេចដដែលបានលាតត្រដាងថា ស្ត្រីរូបនេះក៏ធ្លាប់ដាក់សារធាតុគីមីដូចគ្នាក្នុង ដបទឹកដែលប្តីនាងខ្លួនក្នុងឆ្នាំ ២០១៧ រហូតដល់ប្តីធ្លាក់ខ្លួនឈឺផង។ សកម្មភាពនេះធ្វើឡើងបន្ទាប់ពីពួកគេទាំងពីរបានឈ្លោះគ្នា។
យ៉ាងណាមិញក្នុងសាលក្រម តុលាការបានថ្កោលទោសស្ត្រីខាងលើ ដ្បិតថា សកម្មភាពនោះវាបង្ហាញបំណងឧក្រិដ្ឋដែលគួរអោយស្អប់ខ្ពើម និងពោរពេញដោយភាពឃោរឃៅបំផុតផង។
« ជនជាប់ចោទគួរតែត្រូវបានផ្តន្ទាទោសឱ្យធ្ងន់ធ្ងរជាងមុនពីព្រោះនាងដឹងថាសារធាតុគីមីនេះបង្កគ្រោះថ្នាក់ដល់សុខភាពមនុស្ស ប៉ុន្តែនៅតែប្រើវាជាលើកទី ២ បន្ទាប់ពីនាងបានឃើញប្តីរបស់នាងបានឈឺដោយសារការពុលលើកដំបូង»។ តុលាការបានបន្ថែមដូច្នេះ៕
Tag:
ចិន
ទោសប្រហារជីវិត
© រក្សាសិទ្ធិដោយ thmeythmey.com