ចំណុចសំខាន់ក្នុងការជជែកដេញដោល ត្រាំ-បៃឌិន លើកទី១

COVID-19

សង្គមអន្តរជាតិ

អន្តរជាតិ

នយោបាយអន្តរជាតិ

ចំណុចសំខាន់ក្នុងការជជែកដេញដោល ត្រាំ-បៃឌិន លើកទី១

30, Sep 2020 , 4:03 pm

រូបភាព

ដោយ:

៩០នាទីពេញ លោក ដូណាល់ ត្រាំ និងលោក ចូ បៃឌិន ជជែកវែកញែកប្រធានបទសំខាន់ចំនួន ៦ ដែលជ្រើសរើសដោយអ្នកសម្របសម្រួល លោក Chris Wallace នៃទូរទស្សន៍ Fox News ។ ពីលើឆាកតស៊ូមតិនាទីក្រុង Cleveland រដ្ឋ Ohio ចាប់ផ្ដើមនៅម៉ោង៩យប់ថ្ងៃទី ២៩ ខែកញ្ញា (ម៉ោងអាមេរិក) គូប្រជែងទាំងពីរ រិះគន់គ្នាមិនសំចៃមាត់។ ស្ទើរគ្រប់ប្រធានបទ អ្នកទាំងពីរនិយាយកាត់សម្តីទៅវិញទៅមក ដែលបង្កភាពអនាធិបតេយ្យ ហើយសូម្បីអ្នកសម្របសម្រួលក៏ពិបាកគ្រប់គ្រង។

ក្នុងបរិបទជំងឺរាតត្បាតសកល COVID-19 ការតស៊ូមតិប្រធានាធិបតីនេះ រៀបចំឡើងដោយគោរពតាមវិធានការសុខាភិបាល ដោយគ្មានការចាប់គ្នារវាងប្រធានាធិបតី ត្រាំនិងអតីតអនុប្រធានាធិបតី បៃឌិន និងអនុញ្ញាតឲ្យមនុស្សមួយចំនួនតូចប៉ុណ្ណោះចូលទស្សនាផ្ទាល់។ ហើយអ្នកទាំងពីរក៏តម្រូវឲ្យមានលទ្ធផលតេស្តអវិជ្ជមាន COVID-19 ក្នុងពេល៧២ម៉ោងចុងក្រោយផងដែរ។

តំណែងចៅក្រមតុលាការកំពូល

សំណួរទី១ ដែលត្រូវចោទសួរក្នុងវេទិកាតស៊ូមតិនេះ ពាក់ព័ន្ធនឹងបំណងតែងតាំងចៅក្រមតុលាការកំពូលថ្មី ខណៈការបោះឆ្នោតខិតជិតមកដល់ នាថ្ងៃទី ៣ ខែវិច្ឆិកា។ លោក ត្រាំ ដែលបានស្នើតែងតាំងចៅក្រម Amy Coney Barrett សម្រាប់តំណែងនេះ បានអះអាងថា លោកមានសិទ្ធិបំពេញកៅអីតុលាការកំពូល នៅមុនការបោះឆ្នោត ព្រោះបក្សសាធារណរដ្ឋរបស់លោក គ្រប់គ្រងព្រឹទ្ធសភា និងសេតវិមាន។

យ៉ាងណាមិញ លោក បៃឌិន ប្រាប់ឲ្យរង់ចាំចប់ការបោះឆ្នោតសិន។ លោកនិយាយដូច្នេះថា៖«ប្រជាជនអាមេរិក មានសិទ្ធិក្នុងការបញ្ចេញមតិថា តើនរណាគួរក្លាយជាបេក្ខជនចៅក្រមតុលាការកំពូលនោះ។ ឥឡូវនេះ ពួកគេនឹងពុំទាន់មានឱកាសឡើយ ព្រោះយើងកំពុងស្ថិតនៅពាក់កណ្ដាលទីនៃការបោះឆ្នោត»។ ត្រង់នេះ លោកសង្កត់ធ្ងន់ថា៖«វាពុំមែនជារឿងសមគួរឡើយដែលធ្វើរឿងនេះមុនពេលបោះឆ្នោតនោះ»។

អំឡុងប្រធានបទដំបូងនៃការតស៊ូមតិ៩០នាទីផងដែរ ដោយទ្រាំលែងបាននឹងការនិយាយរំខានពីលោក ត្រាំ ខណៈលោកព្យាយាមឆ្លើយ លោក បៃឌិន បានស្រែកឲ្យលោកត្រាំបិទមាត់។ លោកចាត់ទុកទង្វើនេះមិនសមនឹងឥរិយាបថរបស់ប្រធានាធិបតីអាមេរិកឡើយ។ ចុងក្រោយលោក Wallace ដែលជាអ្នកសម្របសម្រួល សម្រេចបញ្ចប់ប្រធានបទទី១ ហើយចោទសួរប្រធានបទថ្មី។

លោក បៃឌិន រិះគន់លោក ត្រាំ រឿង COVID-19

ប្រធានបទបន្ទាប់ដែលចោទសួរទៅកាន់បេក្ខជនប្រធានាធិបតីទាំងពីរ ទាក់ទងនឹងជំងឺរាតត្បាតសកល COVID-19។ ដោយអះអាងថាជាប្រធានក្តៅ លោក Wallace បានប្រាប់ទៅកាន់លោក ត្រាំ និងលោក បៃឌិន ឲ្យតាំងចិត្តឆ្លើយនឹងសំណួរនេះ ហើយលែងនិយាយកាត់គ្នាតទៀត។

ឈានដល់ប្រធានបទរសើបនេះ លោក បៃឌិន បានរិះគន់មិនសំចៃមាត់លើការឆ្លើយតបរបស់រដ្ឋបាលលោក ត្រាំ ប្រឆាំង COVID-19 ដែលបច្ចុប្បន្នបានឆក់យកជីវិតមនុស្សក្នុងសហរដ្ឋអាមេរិកអស់ជាង២០ម៉ឺននាក់ហើយ។

ពីលើវេទិកា លោក បៃឌិន និយាយថា លោក ត្រាំ គ្មានផែនការច្បាស់លាស់ ហើយគ្មានធ្វើអ្វីជាដុំកំភួនសោះដើម្បីទប់ស្កាត់ការរាតត្បាត COVID-19 ហើយលោកបានដឹងពីភាពធ្ងន់ធ្ងរនៃវិបត្តិនេះតាំងពីខែកុម្ភៈ តែលោកមិនព្រមប្រកាសអាសន្នដល់ប្រជាជនអាមេរិក។

ទោះរងការរិះគន់ពីលោកបៃឌិន លោកប្រធានាធិបតី ត្រាំ លើកឡើងពីការសម្រេចចិត្តបិទជើងហោះហើរពីប្រទេសចិន នៅចុងខែមករា ដោយអះអាងថា ទង្វើនេះបានជួយសង្គ្រោះជីវិតប្រជាជនអាមេរិករាប់លាននាក់ ។ មិនខុសពីការលើកឡើងមុនៗ លោក ត្រាំ បន្តទម្លាក់លើប្រទេសចិន ដែលបណ្ដែតបណ្ដោយឲ្យវីរុសនេះរាតត្បាតពេញពិភពលោក។

ម្យ៉ាងវិញទៀត លោក ក៏ឆ្លៀតវាយប្រហារលើប្រព័ន្ធផ្សព្វផ្សាយអាមេរិកខ្លះ ដែលចូលចិត្តផ្សាយរឿងអាក្រក់ៗពីលោក និងរដ្ឋបាលលោក ។ ដោយមិននិយាយចំឈ្មោះ លោកចាត់ទុកពួកសារព័ត៌មានទាំងអស់នេះថា«ព័ត៌មានក្លែងបន្លំ»។

និយាយដល់ដំណើរការស្ដារសេដ្ឋកិច្ចឡើងវិញ លោក ត្រាំ អះអាងថា លោក បៃឌិន នឹងបិទប្រទេសទាំងមូល ហើយលោកនឹងបំផ្លាញសេដ្ឋកិច្ចប្រទេស ខណៈលោក បៃឌិន លើកឡើងថា មហាសេដ្ឋី ដូចលោក ត្រាំ រកស៊ីកាក់កបអំឡុងវិបត្តិ COVID-19 បែបនេះ។

ក្នុងប្រធានបទសេដ្ឋកិច្ចដដែល អតីតអនុប្រធានាធិបតី បៃឌិន បន្តរិះគន់លោកត្រាំថាកំពុងចាត់ចែងការបើកសេដ្ឋកិច្ចដោយខ្វះការទទួលខុសត្រូវ ពោលគឺមិនខ្វាយខ្វល់ដល់ជីវិតមនុស្ស។ ត្រង់ចំណុចនេះ លោកសង្កត់ធ្ងន់ថា សេដ្ឋកិច្ចពុំអាចស្តារឡើងវិញបានឡើយ ប្រសិនបើវិបត្តិ COVID-19 ពុំទាន់ដោះស្រាយរួចនោះ។

ការបង់ពន្ធក្លាយជារឿងអាម៉ាស់ថ្មីរបស់លោក ត្រាំ

ទុករឿង COVID-19 និងសេដ្ឋកិច្ចមួយអន្លើ លោក Wallace បានសាកសួរលោកត្រាំជុំវិញរបាយការណ៍របស់កាសែត New York Times ដែលរកឃើញថា លោកប្រធានាធិបតីបង់ពន្ធចំណូលតែ៧៥០ដុល្លារក្នុងឆ្នាំ២០១៧។ នេះជាឆ្នាំលោកឡើងកាន់អំណាច។

យ៉ាងណា លោក ត្រាំ អះអាងថា លោកបានបង់ពន្ធរាប់លានដុល្លារ ហើយថា របាយការណ៍ប្រកាសពន្ធលោក កំពុងស្ថិតក្រោមការត្រួតពិនិត្យ ។ លោកនិយាយដូច្នេះថា៖«កាលណាវាចប់ អ្នកនឹងឃើញរបាយការណ៍នោះ»។

កន្លងទៅ លោក ត្រាំ ធ្លាប់បានអះអាងថា លោកបានកេងចំណេញពីគោលនយោបាយពន្ធ ដែលបង្កើតឡើងដោយរដ្ឋបាលលោក។ ទាក់ទងរឿងនេះ លោក បៃឌិន បានថ្កោលទោសចំពោះរឿងនេះ ហើយចាត់ទុកលោកត្រាំជា«ប្រធានាធិបតីអាក្រក់បំផុតដែលអាមេរិកមាន»។ បន្ថែមពីលើនេះ លោកក៏ប្តេជ្ញាលុបចោលគោលនយោបាយកាត់បន្ថយពន្ធលើក្រុមហ៊ុនធំៗដែលលោក ត្រាំ អនុម័តកាលពីឆ្នាំ២០១៧ ផងដែរ បើលោកក្លាយជាប្រធានាធិបតី។

ម្យ៉ាងនៅមុនពេលឡើងតតាំងនឹងលោកត្រាំលើឆាកតស៊ូមតិនេះ លោក បៃឌិន បានបញ្ចេញរបាយការណ៍ប្រកាសពន្ធ ដែលបង្ហាញថា លោកបានបង់ពន្ធចំណូលជិត៣០ម៉ឺនដុល្លារក្នុងឆ្នាំ២០១៩ ខណៈលោកក៏បានទាមទារឲ្យលោកត្រាំបញ្ចេញរបាយការណ៍ប្រកាសពន្ធរបស់លោកផងដែរ។

ដូចការស្មានទុក លោក ត្រាំ បានបន្តវាយប្រហារលើកូនប្រុសរបស់លោក បៃឌិន ហាន់ធើ បៃឌិន ដែលជាសមាជិកក្រុមប្រឹក្សាភិបាលនៃក្រុមហ៊ុនថាមពលអ៊ុយក្រែនមួយ ខណៈឪពុកកាន់តំណែងអនុប្រធានាធិបតីអាមេរិក។ លោក ត្រាំ និយាយថា កូនប្រុសលោកបៃឌិន រកលុយបានរាប់លានដុល្លារ ហើយចោទប្រកាន់ដោយគ្មានភស្តុតាងថា លោក ហាន់ធើ ទទួលលុយពីអតីតអភិបាលក្រុងមូស្គូ រុស្ស៊ីទៀតផង។

យ៉ាងណា លោក បៃឌិន បានប្រកាសពីភាពស្អាតស្អំរបស់កូនប្រុសខ្លួន ហើយលោកថែមទាំងប្រមាថលោក ត្រាំ ថា៖«វាពិបាកក្នុងការទទួលយកពាក្យសម្ដីដែលចេញពីមាត់មនុស្សត្លុកនេះណាស់»។ លោកលើកឡើងទៀតថា សម្រាប់គ្រួសារលោក ត្រាំ លោកនិយាយមួយយប់នេះក៏អត់អស់ដែរ។ លោកចង់សំដៅលើកូនៗលោកប្រធានាធិបតីដែលធ្វើការនៅសេតវិមាន។

ក្រៅពីបញ្ហាដូចបានរៀបរាប់ខាងលើ គូប្រជែងទាំងពីរនេះ ក៏បានបន្តជជែកគ្នាលើរឿងផ្សេងទៀត ដូចជា អំពើហិង្សានិងការរើសអើងពូជសាសន៍ ក៏ដូចជា បញ្ហាបម្រែបម្រួលអាកាសធាតុ និងសុចរិភាពនៃការបោះឆ្នោតអាមេរិកផងដែរ៕