COVID-19
សេដ្ឋកិច្ច
អន្តរជាតិ
ធនាគារពិភពលោក ត្រូវការលុយ១២ពាន់លានដុល្លារ ដើម្បីទិញវ៉ាក់សាំង COVID-19 ចែករដ្ឋក្រីក្រ
ធនាគារពិភពលោក។ រូបភាព៖AFP
×![]()
ធនាគារពិភពលោក នៅថ្ងៃទី២៩ ខែកញ្ញា បានអះអាងថា ខ្លួនបានលើកសំណើទៅកាន់ក្រុមប្រឹក្សាភិបាលស្ថាប័ននេះឲ្យអនុម័តកញ្ចប់ថវិកាចំនួន១២ពាន់លានដុល្លារ ដើម្បីជួយប្រទេសក្រីក្រក្នុងការទិញ និងចែកចាយវ៉ាក់សាំង COVID-19 នៅពេលដែលវ៉ាក់សាំងទាំងនោះមានសុវត្ថិភាព ប្រសិទ្ធភាព និងចាប់ផ្តើមផលិត។ 
ធនាគារពិភពលោក ដែលធ្លាប់បានបញ្ចេញសាច់ប្រាក់៤៥ពាន់លានដុល្លារចន្លោះខែមេសា និងមិថុនាដើម្បីជួយដល់សេដ្ឋកិច្ចពិភពលោក បានអះអាងនៅថ្ងៃទី២៩ ខែកញ្ញានេះថា ខ្លួនត្រូវការទឹកប្រាក់១២ពាន់លានដុល្លារបន្ថែមទៀតក្នុងការជួយទិញ និងចែកចាយវ៉ាក់សាំងCOVID-19។ បើសិនជាថវិកា១២ពាន់លានដុល្លារនេះត្រូវបានអនុម័ត ថវិការទាំងនោះ នឹងត្រូវបង្វែរទៅជួយប្រទេសមានចំណូលទាប និងមធ្យម។
«សេដ្ឋកិច្ចពិភពលោក នឹងមិនអាចស្រោចស្រង់បានឡើយបើសិនជាមនុស្សមិនអាចរស់នៅ ធ្វើសកម្មភាពសង្គម ធ្វើការ និងធ្វើដំណើរដោយមានទំនុកចិត្ត»។ នេះជាការលើកឡើងរបស់អ្នកនាំពាក្យធនាគារពិភពលោក ដោយបន្ថែមថា វ៉ាក់សាំង COVID-19 ដែលមានប្រសិទ្ធភាព និងសុវត្ថិភាព ជាវិធីដ៏សក្ដិសមក្នុងការបើកដំណើរការពិភពលោកឡើងវិញដោយមានសុវត្ថិភាព។
បើទោះបីជាវ៉ាក់សាំង COVID-19 ពុំទាន់មានវត្តមានក្នុងទីផ្សាយ៉ាងណាក្តី លោក David Malpass ប្រធានធនាគារពិភពលោក បានអះអាងថា៖« ដំណើរការក្នុងការចែកចាយវ៉ាក់សាំងមានសភាពស្មុគស្មាញ ដូច្នេះហើយវាជារឿងសំខាន់ក្នុងការប្រមើលនូវអ្វីដែលត្រូវការ»។
លោក Malpass បន្ថែមថា ធនាគារពិភពលោកចង់ឲ្យប្រទេសក្រីក្របំផុតអាចទទួលបានវ៉ាក់សាំង ហើយនៅក្នុងប្រទេសទាំងនោះ អ្នកដែលងាយរងគ្រោះខ្លាំង និងគ្រូពេទ្យគួរណាស់តែទទួលបានវ៉ាក់សាំង។ ជាស្ថាប័នហិរញ្ញវត្ថុក៏ពិតមែន ធនាគារពិភពលោកក៏មានបទពិសោធផងដែរក្នុងកម្មវិធីវ៉ាក់សាំងសម្រាប់ជំងឺគ្រុនស្វិតដៃជើង និងកញ្ជ្រឹល ក៏ដូចជាការគ្រប់គ្រងការផ្ទុះជំងឺអេបូឡាផងដែរ។
ស្របពេលជាមួយគ្នានេះ អង្គការសហប្រជាជាតិវិញ ក៏មានគម្រោងផ្ទាល់ឈ្មោះ COVAX សម្រាប់ចែកចាយវ៉ាក់សាំងដល់ប្រទេសកំពុងអភិវឌ្ឍផងដែរ ដែលត្រូវការថវិកាដល់ទៅ៣៥ពាន់លានដុល្លារ។ អង្គការសុខភាពពិភពលោក(WHO) និង អង្គការយូនីសេហ្វ(UNICEF) ដែលគ្រប់គ្រងគម្រោង COVAX អះអាងថា ក្នុងដំណាក់កាលដំបូង ប្រទេសនីមួយៗគួរទទួលបានវ៉ាក់សាំង២០ភាគរយនៃចំនួនប្រជាជនរបស់ខ្លួនដោយចាប់ផ្តើមពីក្រុមដែលងាយរងគ្រោះ។
ការទទួលបានវ៉ាក់សាំងសម្រាប់ប្រទេសតូច និងកំពុងអភិវឌ្ឍ បានក្លាយជាបញ្ហាប្រឈម និងការបារម្ភរបស់អង្គការអន្តរជាតិ។ ជាក់ស្តែង របាយការណ៍របស់អង្គការ Oxfam បានបង្ហាញថាក្រុមប្រទេសអ្នកមាន ដែលតំណាងឲ្យត្រឹមតែ១៣ភាគរយនៃប្រជាជនទូទាំងពិភពលោក បានកក់វ៉ាក់សាំង COVID-19ចំនួនពាក់កណ្តាល ដែលនឹងត្រូវផលិតនៅពេលអនាគត៕
Tag:
ធនាគារពិភពលោក
COVID-19
© រក្សាសិទ្ធិដោយ thmeythmey.com
