COVID-19
កីឡាអន្តរជាតិ
អន្តរជាតិ
Genoa សុំពន្យារពេលប្រកួតទល់ Torino ព្រោះសមាជិកខ្លួន១៤នាក់ជាប់ធ្វើចត្តាឡីស័ក
× ក្រោយពីកីឡាករ និងបុគ្គលិកចំនួន ១៤នាក់ឆ្លង COVID-19 ក្លិប Genoa នៅថ្ងៃទី៣០ ខែកញ្ញាបានស្នើពន្យារពេលការប្រកួតទល់នឹង Torino ក្នុងក្របខណ្ឌ Serie A ចុងសប្តាហ៍នេះ។ នេះបើតាមការផ្សាយរបស់ទីភ្នាក់ងារព័ត៌មាន AFP។
កាលពីថ្ងៃទី២៨ ខែកញ្ញា ក្លិបក្នុងក្របខណ្ឌលីគកំពូលអ៊ីតាលីមួយនេះ បានប្រកាសពីចំនួនសមាជិកខ្លួនដល់ទៅ១៤នាក់បានឆ្លង COVID-19 ហើយក្នុងនោះក៏មានខ្សែបម្រើឆ្នើមរបស់ខ្លួន Lasse Schone និងអ្នកចាំទីដៃទី១ Mattia Perin ដែរ។
ច្បាប់របស់សហព័ន្ធកីឡាបាល់ទាត់អឺរ៉ុប (UEFA) ចែងថាការប្រកួតអាចកើតឡើងទៅបានដរាបណាក្រុមមួយអាចមានកីឡាករដែលមានសុខភាពល្អចំនួន ១៣ នាក់រួមទាំងអ្នកចាំទីម្នាក់ផង។ ប៉ន្តែយ៉ាងណាក៏ដោយ លោក Daniele Faggiani នាយកផ្នែកកីឡារបស់ Genoa និយាយថាកីឡាកររបស់លោកមិនអាចត្រៀមសម្រាប់ការប្រកួតនៅថ្ងៃសៅរ៍ទី៣នេះបានទេព្រោះកីឡាករភាគច្រើនកំពុងធ្វើចត្តាឡីស័ក។
លោក Faggiani បានប្រាប់វិទ្យុ Kiss Kiss ដែលមានមូលដ្ឋានក្នុងក្រុង Naples ថា៖ «យើងទាំងអស់គ្នាស្ថិតក្នុងផ្ទះ ដើម្បីដាក់ឲ្យនៅដាច់ដោយឡែកពីគេ។ អាជ្ញាធរសុខាភិបាលក្នុងតំបន់ជាអ្នកឲ្យយើងអនុវត្តន៍ដូច្នេះ។ យើងមិនអាចលេងថ្ងៃសៅរ៍នេះទល់នឹង Torino បានទេ បើទោះបីមានកីឡាករ ១៣ នាក់ក៏ដោយ។ បើគ្មានការហ្វឹកហាត់ទេ យើងត្រូវពន្យាពេលប្រកួតនៅសប្តាហ៍ទី៣នេះហើយ»។
Genoa ទើបតែចាញ់ក្រុម Napoli ក្នុងលទ្ធផល ៦-០ ក្នុងការប្រកួត Serie A សប្តាហ៍ទី២កាលពីចុងសប្តាហ៍មុន។ ពួកគេនឹងត្រូវទទួលភ្ញៀង Torino នៅថ្ងៃទី៣ ខែតុលា សម្រាប់ជំនួបលីគលើកទី៣រដូវកាលនេះ ប៉ុន្តែពួកគេសុំបន្យារពេលទៅហើយ។
ដោយឡែក អនុរដ្ឋលេខាធិការក្រសួងសុខាភិបាលអ៊ីតាលីលោកស្រី Sandra Zampa បានអំពាវនាវឲ្យលីគកំពូលអ៊ីលីនេះផ្អាកបណ្តោះអាសន្នសិន បន្ទាប់ពីមានករណីឆ្លងជាច្រើននាក់ក្នុងក្រុម Genoa៕
© រក្សាសិទ្ធិដោយ thmeythmey.com