ភ្នំពេញ៖ សមត្ថកិច្ចខេត្តត្បូងឃ្មុំនិងខេត្តក្រចេះ កំពុងស្រាវជ្រាវរកជនបង្កហិង្សាលើក្រុមអ្នកសារព័ត៌មានមួយក្រុម ដែលបានចុះប្រមាញ់ព័ត៌មានទាក់ទងនឹងការដឹកឈើខុសច្បាប់។ សម្ព័ន្ធអ្នកសារព័ត៌មានកម្ពុជា(CamboJa)បង្ហាញការព្រួយបារម្ភកាន់តែខ្លាំង លើការប្រើហិង្សាលើអ្នកសារព័ត៌មានកើតឡើងជាបន្តបន្ទាប់នេះ។
ការស្រាវជ្រាវរកមុខជនបង្កហេតុនេះ ធ្វើឡើងបន្ទាប់ពីក្រុមអ្នកសារព័ត៌មានមួយក្រុមបានចុះតាមដានករណីព្រៃឈើនៅខេត្តក្រចេះ ហើយក៏ត្រូវមិនជនមិនស្គាល់មុខប្រើអំពើហិង្សាដាក់ក្រុមអ្នកសារព័ត៌មាន។
ស្នងការនគរបាលខេត្តត្បូងឃ្មុំ លោក ប៉ែន រ័ត្ន អះអាងប្រាប់សារព័ត៌មានថ្មីៗតាមទូរស័ព្ទនៅថ្ងៃនេះថា ករណីប្រើអំពើហិង្សាលើអ្នកកាសែតនៅស្រុកមេមត់ អាចជាប់ពាក់ព័ន្ធនឹងករណីព្រៃឈើនៅខេត្តក្រចេះ។ លោកថា បច្ចុប្បន្នសមត្ថកិច្ចខេត្តត្បូងឃ្មុំនិងខេត្តក្រចេះ កំពុងស្រាវជ្រាវរកអ្នកបង្កហិង្សានេះ។
«ករណីអ្នកកាសែតនេះ អាចជាប់ពាក់ព័ន្ធតាំងពីខេត្តក្រចេះមក ព្រោះពួកគាត់តាមដានរឿងព្រៃឈើក្នុងខេត្តក្រចេះ ហើយក្រុមការងារកំពុងសហការជាមួយសមត្ថកិច្ចខេត្តក្រចេះដើម្បីរកអ្នកបង្កហេតុនេះ។ ករណីនេះ ជាករណីហិង្សា មិនមែនជាករណីគ្រោះថ្នាក់ឡើយ ប៉ុន្តែបើតាមមើលទៅវា(ជនបង្កហេតុ)គ្រាន់តែវាយឡានទេ បើវាយមនុស្សងាប់បាត់ហើយ តែនេះវាយឡាននិងបែកកញ្ចក់របួសតិចតួចអី»។ នេះបើតាមការលើកឡើងរបស់លោក ប៉ែន រ័ត្ន។
សម្ព័ន្ធអ្នកសារព័ត៌មានកម្ពុជា(CamboJa) បានចេញសេចក្ដីថ្លែងការណ៍មួយ កាលពីថ្ងៃទី៣០ កញ្ញា ដោយបង្ហាញការព្រួយបារម្ភយ៉ាងខ្លាំងចំពោះករណីហិង្សាលើអ្នកសារព័ត៌មាន រួមទាំងថ្កោលទោសចំពោះជនល្មើសទាំងនោះថាមិនខ្លាចច្បាប់ទៀតផង។
អ្នកសារព័ត៌មាន៤រូប ត្រូវបានជនមិនស្គាល់មុខមួយក្រុមប្រដាប់ដោយកាំបិតពូថៅវាយនៅស្រុកមេមត់ ខណៈធ្វើដំណើរមកភ្នំពេញនៅយប់ថ្ងៃទី២៨កញ្ញា។ ការបង្កហិង្សាលើអ្នកសារព័ត៌មាន៤រូបនេះ ធ្វើឲ្យអ្នកសារព័ត៌មានម្នាក់រងរបួសធ្ងន់និងម្នាក់ទៀតរងរបួសស្រាល។ នៅយប់ថ្ងៃទី២៨ដដែល អ្នកសារព័ត៌មានម្នាក់ទៀត ត្រូវបានអាជ្ញាធរប្រទេះឃើញសាកសព នៅតាមផ្លូវបេតុង ក្នុងសង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។ ការស្លាប់នេះ គឺ មិនទាន់មានការស៊ើបអង្កេតឲ្យច្បាស់លាស់នៅឡើយទេ។ នេះបើតាមការសេចក្ដីថ្លែងការណ៍របស់ CamboJa ដោយបញ្ជាក់ថា ក្នុងរយៈពេលបីខែចុងក្រោយនេះ មានអ្នកសារព័ត៌មាន១៥នាក់ រងការធ្វើទុក្ខបុកម្នេញ មានអំពើហិង្សា ចាប់ខ្លួន និងពាក្យបណ្ដឹងពីតុលាការជាដើម។
លោក ណុប វី នាយកប្រតិបត្តិCamboJa កត់សម្គាល់ក្រុមអ្នកធ្វើទុក្ខបុកម្នេញដល់អ្នកសារព័ត៌មានថា៖ «ពួកគេចាត់ទុកអ្នកសារព័ត៌មានដែលហ៊ានរាយការណ៍ពីបទល្មើសដែលពួកគេកំពុងប្រព្រឹត្ត ជាសត្រូវ ហើយបង្កការគម្រាមកំហែងដោយប្ដឹង និងសម្លាប់ដោយមិនញញើត»។
ទន្ទឹមនឹងនេះ លោក ស្នើឲ្យអាជ្ញាធរចាត់វិធានការឲ្យមានប្រសិទ្ធភាពលើករណីទាំងនេះ ដើម្បីទទួលយុត្តិធម៌។ CamboJa បានអំពាវនាវដល់រដ្ឋាភិបាលឲ្យធានាសុវត្ថិភាព និងសន្តិភាព ដល់អ្នកសារព័ត៌មានគ្រប់រូប ដើម្បីអនុវត្តសិទ្ធិសេរីភាពនិងរាយការណ៍បញ្ហាសង្គមដោយគ្មានភាពភ័យខ្លាច៕