ភ្នំពេញ៖ បើគ្មានអ្វីប្រែប្រួលទេ ! រដ្ឋាភិបាល នឹងអនុវត្តការប្រមូលពន្ធមូលធន នៅដើមឆ្នាំ២០២១ទៅ។ គោលដៅនៃការអនុវត្តពន្ធនេះ គឺដើម្បីប្រមូលលុយពីអ្នកមានប្រាក់ចំណេញលើអចលនទ្រព្យ មកជួយ«អ្នកក្រ»។ លោក គង់ វិបុល អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ ថ្លែងបែបនេះនៅក្នុងកម្មវិធីពន្ធដារកម្ពុជា ស្តីពី «ពន្ធលើចំណេញមូលធន» នៅថ្ងៃទី១ តុលានេះ។
មុនពន្ធមូលធននេះ លេចចេញជារូបរាង សាធារណជន ជាពិសេសអ្នករកស៊ីអចលនទ្រព្យ កំពុងបង្ហាញក្តីព្រួយបារម្ភពីអាជីវកម្មខ្លួន ស្របពេលដែលវិបត្តិកូវីដ-១៩ កំពុងអូសបន្លាយពេល។ ពួកគេមិនទាន់ចង់ឱ្យរដ្ឋ ឆាប់អនុវត្តពន្ធចំណេញលើមូលធននេះឡើយ។
ផ្ទុយពីក្តីព្រួយបារម្ភនេះ លោក គង់ វិបុល អគ្គនាយកដ្ឋានពន្ធដារ អះអាងថា ការអនុវត្តពន្ធនេះ មិនមែនជាការសង្កត់«ក» រាស្ត្រនោះទេ។ បើតាមលោក គង់ វិបុល ការបង្កើតពន្ធនេះ គឺដើម្បីយកប្រាក់ចំណេញពីអ្នកលក់អចលនទ្រព្យ មកជួយពលរដ្ឋក្រីក្រប៉ុណ្ណោះ។
អគ្គនាយកដ្ឋានពន្ធដាររូបនេះ បាននិយាយដូច្នេះថា៖«ពន្ធនេះ ជាពន្ធចំណេញមូលធន មានន័យថា បើសិនជាប្រជាពលរដ្ឋ លក់(អចលនទ្រព្យ)បានចំណេញត្រូវបង់ហើយ គឺអត់សង្កត់ ក ទេ។ ហើយបើប្រជាជន(លក់អចលនទ្រព្យខាត) នៅក្នុងកាលៈទេសៈហ្នឹង ឧទាហរណ៍ គាត់ត្រូវបង្ខំលក់ដីហ្នឹង ដែលបានទិញដីមួយកន្លែងសម្រាប់ទុកលក់ តែវិបត្តិកូវីដនេះ វាលក់ទៅខាត គឺអត់ត្រូវបង់ទេ។ អ៊ីចឹងមិនមែនពន្ធនេះ ដាក់មកសម្រាប់សង្កត់ ក រាស្ត្រទេ គឺដើម្បីយកពន្ធពីអ្នកចំណេញ យកទៅជួយរាស្ដ្រ ដែលប៉ះពាល់»។
លោក គង់ វិបុល បានសង្កត់ធ្ងន់ថា ពន្ធលើចំណេញមូលធននេះ វានឹងអត្ថប្រយោជន៍សម្រាប់ប្រជាពលរដ្ឋក្រក្រី រួមទាំងការអភិវឌ្ឍជនបទ កសាងមន្ទីរពេទ្យ សាលារៀន ផ្លូវ អណ្ដូងទឹក និងស្រះទឹកជាដើម។ «បើសិនជាយើង មិនយក(ពន្ធ)ពីអ្នកដែលមានប្រាក់ចំណេញ វាហាកបីដូចជាបានពន្ធពីណាយក ។ ហើយរដ្ឋអត់យកពន្ធទេ ពីអ្នកដែលលក់ខាត ហើយប្រជាពលរដ្ឋទូទៅ បើសិនជាអត់មានការលក់ ក៏អត់ជាប់ពន្ធដែរ។ ពន្ធមូលធននេះ បើលក់ចំណេញចាំបង់ បើលក់មិនចំណេញ អត់បង់ អត់ត្រូវជាប់(ពន្ធ)ទេ»។ នេះជាការបញ្ជាក់របស់លោក គង់ វិបុល ។
លោក វ៉ាន់ ពុទ្ធិពល អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ដែលបានបន្ថែមថា ពន្ធនេះ មិនគ្របដណ្ដប់លើពលរដ្ឋទូទៅទេ បើសិនជាពួកគេ គ្មានអចលនទ្រព្យលក់នោះ។ បើតាមលោក ពុទ្ធិពល អ្នកដែលជាប់ពន្ធភាគច្រើន គឺអ្នករកស៊ីអចលនទ្រព្យ។ «កន្លងមកមានការយល់ច្រឡំថា ប្រជាជនគ្រប់រូបត្រូវបង់ពន្ធនេះ អ៊ីចឹងហើយបានជាគាត់ជ្រួលច្រាល។ ខ្ញុំគិតថាអ្នកដែលបង់ពន្ធនេះច្រើនគេ ៩០ភាគរយ គឺអ្នកដែលមានរបរអាជីវកម្មទៅលើខាងផ្នែកអចលនទ្រព្យនោះឯង។ប៉ុន្តែចំពោះប្រជាជនទូទៅ ច្បាស់ជាមិនជាប់(ពន្ធ)ទេ»។ នេះជាការបញ្ជាក់របស់អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ។
កន្លងមកប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា លោក ច្រឹក សុខនីម ធ្លាប់បាននិយាយថា បើរដ្ឋនឹងអនុវត្តយកពន្ធមូលធននេះមែន នោះអ្នករកស៊ីវិស័យអចលនទ្រព្យ នឹងរងផលប៉ះពាល់។ លោក អះអាងថា ការយកពន្ធនេះ វាគឺជាការបន្ថែមបន្ទុកដល់អ្នករកស៊ីវិស័យអចលនទ្រព្យទៅវិញទេ ខណៈដែលពួកគេកំពុងប្រឈមមុខធ្លាក់ចុះចំណូល ដោយសារបញ្ហាកូវីដ-១៩។
ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជារូបនេះ បានលើកឡើងដូច្នេះថា៖«ពាក់ព័ន្ធនឹងវិស័យអចលនទ្រព្យ រាល់ថ្ងៃដំណើរការដោយសារអ្នកទិញនៅក្នុងស្រុកទេ ពាក់ព័ន្ធនឹងបរទេសសឹងតែមិនសូវមាន(អ្នកទិញ)ហើយ។ អ៊ីចឹងបញ្ហាការអនុវត្តពន្ធសម្រាប់មូលធននេះ ខ្ញុំគិតថា វាជាពេលវេលាដែលលំបាកសម្រាប់អ្នកវិនិយោគិននៅក្នុងប្រទេសរបស់យើង ដើម្បីទ្រទ្រង់នូវវិស័យអចលនទ្រព្យនេះ។ ហើយប្រសិនជាពន្ធនេះ ត្រូវបានអនុវត្តពិតប្រាកដមែន ខ្ញុំមើលឃើញថាវា គឺជាអម្រែកយ៉ាងធ្ងន់សម្រាប់អ្នកវិនិយោគិនទៅលើវិស័យអចលនទ្រព្យ ហើយរដ្ឋាភិបាលក៏ជួបប្រឈមនូវបញ្ហាមួយចំនួនដែរ។ ប្រសិនជាពន្ធនេះចេញឡើង ដូច្នេះខ្ញុំគិតថា ការទិញដូរ(អចលនទ្រព្យ)មួយចំនួននឹងធ្លាក់ចុះ»។
តែយ៉ាងណាអ្នកជំនាញសេដ្ឋកិច្ច លោក គី សេរីវឌ្ឍន៍ អះអាងថា វិស័យអចលនទ្រព្យ គឺមិនងាយដួលឡើយ។ អ្នកជំនាញសេដ្ឋកិច្ចរូបនេះ យល់ឃើញបែបវិជ្ជមានវិញថា ការអនុវត្តពន្ធមូលធន គឺជាការទប់ស្កាត់មិនឱ្យវិស័យអចលនទ្រព្យប៉ោងផ្ទុះទៅវិញទេ។ ត្រង់ចំណុចនេះលោក សេរីវឌ្ឍន៍ ពន្យល់ថា នៅពេលការអនុវត្តពន្ធមូលធនចូលជាធរមាន វាធ្វើឱ្យពលរដ្ឋឈប់នាំគ្នាសម្រុកទិញ និងលក់ដីដូចមុន ព្រោះតម្លៃអចលនទ្រព្យឡើងខ្ពស់ដោយសារកម្រិតពន្ធ ហើយករណីចាក់ដីលុបបឹង ដើម្បីលក់ដីនោះ ក៏លែងសូវមានទៀតដែរ។ ជាពិសេសវានឹងជំរុញឱ្យការប្រើប្រាស់ដីធ្លី មានគោលដៅច្បាស់លាស់ និងបង្កើនកំណើនផលិតកម្មទៀតផង។
បើតាមអ្នកជំនាញសេដ្ឋកិច្ចរូបនេះ វិធានការប្រមូលពន្ធមូលធននេះ វាផ្ដល់ផលវិជ្ជមានសម្រាប់សេដ្ឋកិច្ចកម្ពុជា ក្រោយវិបត្តិកូវីដ-១៩។ សម្រាប់លោក គី សេរីវឌ្ឍន៍ ការយកពន្ធមូលធននេះ មិនមានអ្វីប្លែកទេ ខណៈបណ្ដាប្រទេសអាស៊ាន និងអឺរ៉ុបខ្លះ បានអនុវត្តទៅហើយ។
យ៉ាងណាក៏ដោយ ក៏លោក ច្រឹក សុខនីម យល់ឃើញថា ឆ្នាំ២០២១ខាងមុខនេះ មិនមែនជាពេលវេលាត្រូវកំណត់យកពន្ធមូលធន ឬពន្ធផ្សេងៗលើអ្នករកស៊ី ឬពលរដ្ឋនោះទេ ។ ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជារូបនេះ សង្កត់ធ្ងន់ថា រដ្ឋាភិបាលគួរតែជួយដល់វិស័យវិនិយោគនៅកម្ពុជា ជាពិសេសវិស័យអចលនទ្រព្យ ដែលត្រូវការទុនវិនិយោគបន្ថែម ក្រោយវិបត្តិកូវីដ-១៩ផុតរលត់។
ជុំវិញបញ្ហានេះ លោក គង់ វិបុល ក៏មិនទាន់ប្រាកដច្បាស់ថា ពន្ធលើប្រាក់ចំណេញមូលធននេះ នឹងត្រូវអនុវត្ត១០០ភាគរយ នៅថ្ងៃទី១ មករា ឆ្នាំ២០២១ ដែរ។ បើតាមអគ្គនាយកដ្ឋានពន្ធដាររូបនេះ ការអនុវត្តពន្ធមូលធននេះ គឺអាស្រ័យលើការសម្រេចជាផ្លូវការពីសម្ដេចនាយករដ្ឋមន្ត្រី ហ៊ុន សែន សិន។
តាមពិតទៅរដ្ឋាភិបាលបានបង្កើតពន្ធប្រភេទនេះ នៅក្នុងច្បាប់ថវិកាជាតិ តាំងឆ្នាំ២០១០ មកម្ល៉េះ ហើយឱ្យអនុវត្តការយកពន្ធនេះនៅក្នុង ឆ្នាំ២០២០។ ប៉ុន្តែ ដោយសារត្រូវការពេលវេលាផ្សព្វផ្សាយឱ្យបានទូលំទូលាយ ដល់អ្នកមានជាប់កាតព្វកិច្ចបង់ពន្ធនេះ ទើបរាជរដ្ឋាភិបាលសម្រេចពន្យារពេលអនុវត្តនៅដើមឆ្នាំ២០២១។ នេះបើតាមលោក គង់ វិបុល៕