ច្បាប់ / សិទិ្ធមនុស្ស / តុលាការ
ជាតិ
តំណាងកម្ពុជា តបថា តំណាងអង្គការសហប្រជាជាតិ ច្បិចតែមួយជ្រុងនៃរបាយការណ៍សិទ្ធិមនុស្ស យកទៅផ្សាយ
លោក អាន សុខខឿន ឯកអគ្គរាជទូតនិងជាតំណាងអចិន្ត្រៃយ៍កម្ពុជាប្រចាំនៅទីស្នាក់ការអង្គការសហប្រជាជាតិ ក្នុងទីក្រុងហ្សឺណែវ បានចូលរួមកិច្ចប្រជុំលើកទី៤៥នៃក្រុមប្រឹក្សាសិទ្ធិមនុស្សអង្គការសហប្រជាជាតិ នៅរសៀលថ្ងៃទី២៥ ខែកញ្ញា ឆ្នាំ២០២០ (រូបពីទំព័រហ្វេសប៊ុក Permanent Mission of the Kingdom of Cambodia to the UN Office at Geneva)
×![]()
ដោយ: សារព័ត៌មានថ្មីៗ
ស្ថានបេសកកម្មអចិន្ត្រៃយ៍កម្ពុជាប្រចាំនៅទីស្នាក់ការអង្គការសហប្រជាជាតិ ក្នុងទីក្រុងហ្សឺណែវ ប្រទេសស្វីស បានប្រតិកម្មមកកាន់ការិយាល័យឧត្តមស្នងការអង្គការសហប្រជាជាតិប្រចាំនៅកម្ពុជា (OHCHR) ជុំវិញការស្រង់របាយការណ៍របស់លោក អាន់តូនីញ៉ូ ហ្គូតេរ៉េស (Antonio Guterres) អគ្គលេខាធិការអង្គការសហប្រជជាតិ ស្តីពីបញ្ហាសិទ្ធិមនុស្ស ទៅបង្ហោះលើបណ្តាញសង្គមហ្វេប៊ុក។ 
តាមរយៈសេចក្តីថ្លែងការណ៍ពីទីក្រុងហ្សឺណែវ នាថ្ងៃទី៣០ ខែកញ្ញា ឆ្នាំ២០២០ តំណាងកម្ពុជា បង្ហាញការខកចិត្តយ៉ាងខ្លាំងចំពោះឧត្តមស្នងការអង្គការសហប្រជាជាតិ ដ្បិតមើលឃើញថា តំណាងអង្គការសហប្រជាជាតិដ៏ធំមួយនេះ ស្រង់ព័ត៌មាន «តែមួយជ្រុងនិងមិនមានតុល្យភាព» ចេញពីរបាយការណ៍របស់លោក ហ្គូតេរ៉េស យកទៅផ្សព្វផ្សាយ។
នៅថ្ងៃទី៣០ ខែកញ្ញាម្សិលមិញ លោក ហ្គូតេរ៉េស បានធ្វើបទបង្ហាញពីរបាយការណ៍ប្រចាំឆ្នាំរបស់លោក ទាក់ទងនឹងបញ្ហាសិទ្ធិមនុស្សតាមបណ្តានានា រួមទាំងកម្ពុជាផងដែរ ទៅកាន់កិច្ចប្រជុំលើកទី៤៥ នៃក្រុមប្រឹក្សាសិទ្ធិមនុស្សអង្គការសហប្រជាជាតិ។ របាយការណ៍របស់លោក គឺស្តីពីការបំភិតបំភ័យ និងការសងសឹករបស់អាជ្ញាធរ ទៅលើអ្នកដែលបានសហការជាមួយអង្គការសហប្រជាជាតិ។
ប៉ុន្តែ មុនពេលលោក ហ្គូតេរ៉េស ធ្វើបទបង្ហាញ ទៅកាន់ក្រុមប្រឹក្សាសិទ្ធិមនុស្ស ឧត្តមស្នងការអង្គការសហប្រជាជាតិ បានយកបាយការណ៍របស់លោក ទៅបង្ហោះជាសាធារណៈលើបណ្តាញសង្គមហ្វេសប៊ុក។ ឧត្តមស្នងការអង្គការសហប្រជាជាតិ សរសេរសង្ខេបពីរបាយការណ៍នោះថា លោក ហ្គូតេរ៉េស បានគូសបញ្ជាក់ពីការសងសឹកនិងការបំភិតបំភ័យនៅកម្ពុជា ដែលធ្វើឡើងដោយមន្ត្រីសន្តិសុខ ប្រឆាំងនឹងអ្នកចូលរួមធ្វើការងារជាមួយអង្គការសហប្រជាជាតិ ឬតំណាងរបស់ខ្លួន។
ចំណែក អ្នកអ្នកស្រី រ៉ូណា ស្មីត អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកឃ្លាំមើលសិទ្ធិមនុស្សនៅកម្ពុជា បង្ហោះព័ត៌មានលើបណ្តាញសង្គមហ្វេសប៊ុកថា ចាប់ពីម៉ោង៨ ដល់ ម៉ោង១១យប់ (ម៉ោងនៅកម្ពុជា) នាថ្ងៃទី១ ខែតុលានេះ អ្នកស្រី នឹងបង្ហាញរបាយការណ៍របស់អ្នកស្រី ស្តីពីស្ថានភាពសិទ្ធិមនុស្សនៅកម្ពុជា ទៅកាន់កិច្ចប្រជុំនៃក្រុមប្រឹក្សាសិទ្ធិមនុស្សអង្គការសហប្រជាជាតិ។
អត្ថបទទាក់ទង
តំណាងម្ពុជា អះអាងថា របាយការណ៍របស់លោក ហ្គូតេរ៉េស គឺពឹងផ្អែកយ៉ាងខ្លាំងទៅលើការអត្ថាធិប្បាយរបស់អ្នកស្រី រ៉ូណា ស្មីត ដែលផ្តោតលើភាគី «តែម្ខាងនិងពុំបានផ្ទៀងផ្ទាត់ត្រឹមត្រូវ»។ តំណាងកម្ពុជា បកស្រាយថា រដ្ឋាភិបាលកម្ពុជា តែងពិនិត្យដោយយកចិត្តទុកដាក់បំផុតចំពោះរាល់ការចោទប្រកាន់នានា។
តំណាងកម្ពុជា សរសេរក្នុងសេចក្តីថ្លែងការណ៍ថា៖«ក្នុងន័យនេះ គេ ត្រូវចោទសួរភាពស្មោះត្រង់និងហេតុផលរបស់ការិយាល័យនេះ ដែលច្បិចយកតែមួយផ្នែកនៃរបាយការណ៍ ហើយពុំបង្ហាញផ្នែកពាក់ព័ន្ធនឹងការឆ្លើយតបរបស់រាជរដ្ឋាភិបាល [កម្ពុជា]។ ទង្វើបែបនេះ នឹងធ្វើឲ្យចុះខ្សោយនូវសុចរិតភាព ឯករាជ្យភាព និង ភាពទុកចិត្តបានរបស់ស្ថាប័នអង្គការសហប្រជាជាតិមួយនេះ»។
របាយការណ៍របស់លោក ហ្គូតេរ៉េស សរសេរដូច្នេះថា៖«តំណាងអង្គការសង្គមស៊ីវិលខ្លះ មិនហ៊ានបង្ហាញអត្តសញ្ញាណទៅក្រសួងមហាផ្ទៃ ថាពួកគេ ធ្វើការងារជាមួយអង្គការសហប្រជាជាតិឡើយ ដោយសារតែពួកគេ បារម្ភពីការសងសឹក។ ជនរងគ្រោះមួយចំនួនទៀត ដែលជាប់ឃុំ មិនហ៊ានទទួលជំនួយពីការិយាល័យឧត្តមស្នងការអង្គការសហប្រជាតិ ហើយពួកគេ ក៏មិនហ៊ានរាយការណ៍ពីករណីរបស់ពួកគេ ទៅកាន់តំណាងអង្គការសហប្រជាជាតិដែរ»។
ការចោទប្រកាន់ថា បុគ្គល ដែលបានសហការជាមួយយន្តការសិទ្ធិមនុស្សរបស់អង្គការសហប្រជាជាតិ ត្រូវបានបំភិតបំភ័យឬសងសឹក «គឺជាការបំផ្លើសទាំងស្រុង»។ នេះជាការឆ្លើយតបរបស់តំណាងកម្ពុជាដដែល ដោយបន្ថែមថា អង្គការសង្គមស៊ីវិលនៅកម្ពុជា បានអនុវត្តសកម្មភាព ស្របតាមច្បាប់ ដោយគ្មានការយាយីឬការសងសឹកអ្វីឡើយ។ តំណាងកម្ពុជា បន្តថា អង្គការសង្គមស៊ីវិលនៅកម្ពុជា ត្រូវបានណែនាំឲ្យប្រកាន់ខ្ជាប់តាមសេចក្តីណែនាំរបស់ក្រសួងមហាផ្ទៃ ស្តីពីការធ្វើសកម្មភាពស្របច្បាប់។
សារចុងក្រោយរបស់តំណាងកម្ពុជា ជូនដល់ឧត្តមស្នងការសង្គការសហប្រជាជាតិ គឺបង្ហាញពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការដោះស្រាយបញ្ហាប្រឈម ដែលអង្គការសង្គមស៊ីវិលជួបប្រទះ៕
Tag:
តំណាងកម្ពុជានៅហ្សឺណែវ
សិទ្ធិមនុស្ស
OHCHR
រ៉ូណា ស្មីត
ហ្គូតេរ៉េស
© រក្សាសិទ្ធិដោយ thmeythmey.com
