ជាតិ
«មីដាម» ផលិតផលរបស់អតីតនិស្សិតកសិកម្ម ដែលច្នៃសរសៃមីពីល្ពៅ ត្រាវ និងដំឡូង
×![]()
លោក បេ អ៊ិញហ៊ាន ជាកូនកសិករក្នុងស្រុកចំការលើ ខេត្តកំពង់ចាម។ យុវជនរូបនេះ បានចំណាយពេលជាង១ឆ្នាំ នៅក្នុងការកែច្នៃផលិតផលមី ដែលកែច្នៃចេញពីកសិផលក្នុងស្រុក រួមមានផ្លែល្ពៅ មើមត្រាវ និងដំឡូង។ អតីតនិស្សិតសាកលវិទ្យាល័យភូមិន្ទកសិកម្ម វ័យ២៩ឆ្នាំរូបនេះ បានដាក់ឈ្មោះ ផលិតផលរបស់ខ្លួនថា «មីដាម» ហើយដែលមានទីផលិតនៅក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ។ លោក បេ អ៊ិញហ៊ាន បានប្រាប់សារព័ត៌មាន Thmeythmey25 ថាមូលហេតុដែល លោកកែច្នៃសរសៃមី ពីដំណាំក្នុងស្រុកស្រុកនេះ ព្រោះតែលោក ចង់ជំរុញការកែច្នៃផលិតផលកសិកម្ម ដែលជាផ្នែកមួយនៃការលើកកម្ពស់ទីផ្សារកសិកម្ម ក៏ដូចជាចង់ផ្ដល់អាហារកែច្នៃ ដែលមានសុវត្ថិភាពសម្រាប់ពលរដ្ឋកម្ពុជា។
លោក បេ អ៊ិញហ៊ាន ជាម្ចាស់អាជីវកម្ម «មីដាម» ដែលជាសរសៃមី កែច្នៃពីផលិតផលកសិកម្មក្នុងស្រុក រួមមានផ្លែល្ពៅ ត្រាវ និងដំឡូង។ ជាអតីតនិស្សិតផ្នែកក្សេត្រសាស្ត្រនៃសាកលវិទ្យាភូមិន្ទកសិកម្ម លោក បេ អ៊ិញហ៊ាន បានប្រាប់សារព័ត៌មាន ThmeyThmey25 ថាលោកបានចាប់ផ្តើមកែច្នៃសរសៃមី គឺដោយសារលោកមើលឃើញពីសំទុះការគាំទ្រផលិតផលក្នុងស្រុក របស់ពលរដ្ឋខ្មែរ។ មិនតែប៉ុណ្ណោះ យុវជនវ័យ២៩ឆ្នាំ មកពីស្រុកចំការលើ ខេត្តកំពង់ចាមរូបនេះ បន្ថែមថា រូបគេ ចង់ជំរុញឲ្យការកែច្នៃកសិផលខ្មែរ និងចង់ផ្តល់អាហារកែច្នៃដែលមានសុវត្ថិភាពសម្រាប់អ្នកប្រើប្រាស់។ បើតាម លោកអ៊ិញហ៊ាន រូបគេបានស្រាវជ្រាវពីរបៀបផលិតសរសៃមី តាមអ៊ីនធឺណិត ហើយបរាជ័យច្រើនលើកច្រើនសារ ទម្រាំអាចផលិតបាន មី ដែលមានរសជាតិដែលលោកចង់បាន។ ក្នុងដំណាក់កាលនេះ ខេត្តកំពង់ចាមរូបនេះ បានចំនាយប្រើពេលប្រមាណកន្លះឆ្នាំ។
រហូតមកដល់ពេលនេះ គឺប្រមាណ១ឆ្នាំហើយ ដែលអាជីវកម្មកែច្នៃរបស់ខ្លួន បានចាប់ដំណើរការ។ យុវជនរូបនេះ អះអាងថា ផលិតផលរបស់ខ្លួន មានការគាំទ្រច្រើនគួរសមដោយសារការផលិតមិនប្រើសារធាតុគីមី ឬសារធាតុរក្សាទុកបានយូរ និងមានរសជាតិទទួលយកបាន។ លោក បេ អ៊ិញហ៊ាន រៀបរាប់ថា៖«មីដាម នេះ បានយកល្ពៅ ដំឡូង ត្រាវ មកច្នៃធ្វើជាមី ដែលមិនមានដាក់សារធាតុគីមី ឬសារធាតុរក្សាទុកនោះទេ។ ដូច្នេះមី នេះទុកបានត្រឹមរយៈពេល ២ទៅ ៣ខែប៉ុណ្ណោះ តែត្រូវទុកនៅកន្លែងត្រឹមត្រូវ»។
សម្រាប់ទីផ្សារមីរបស់លោក បេ អ៊ិញហ៊ាន បច្ចុប្បន្នកំពុងចរាចរណ៍នៅតាមហាងបន្លែ ផ្លែឈើធម្មជាតិ ក៏ដូចជា តាមម៉ាតផ្សេងៗ ប្រមាណជាង ២០ក្នុងរាជធានីភ្នំពេញ។ ហើយលោក ក៏កំពុងស្វែងរកដៃគូសហការបន្ថែម ដើម្បីពង្រីកការផលិតរបស់លោកបន្ថែមទៀត។ ក្រៅពីនេះលោកក៏បានបំណងបង្កើតអាហារដ្ឋាននៅតាមសាលាមធ្យមសិក្សា ដើម្បីឲ្យក្មេងៗ មានលទ្ធភាពទទួលបានអាហារមានសុវត្ថិភាព និងតម្លៃសមរម្យផងដែរ។ សម្រាប់«មីដាម»របស់លោកក្នុងមួយកញ្ចប់មានតម្លៃ ១ម៉ឺនរៀល និងមានទម្ងន់ ៥០០ក្រាម។
យុវជនដែលកើតក្នុងត្រកូលកសិកររូបនេះ ក៏បានចែករំលែកត្រួសៗពីដំណើរការ នៃការផលិតមី ដើម្បីឲ្យទទួលបានប្រសិទ្ធភាពនោះនោះ ។ តាមលោក អ៊ិញហ៊ាន ដើម្បីទទួលបានសរសៃមីដែលមានគុណភាព ត្រូវគិតលើវត្ថុធាតុដើម និងបច្ចេកទេសផលិត។ សម្រាប់ការជ្រើសរើសវត្ថុធាតុដើម (ល្ពៅ,ត្រាវ,ដំឡូង) ត្រូវមានគុណភាព មិនគ្រឹង និងទើបប្រមូលពីចម្ការថ្មីៗ។ ដោយឡែកសម្រាប់ធាតុផ្សំមីល្ពៅ មានដូចជា ល្ពៅ, ស្រូវសាលី,និងទឹកជាដើម។ ក្រៅពីមីទាំងបីរសជាតិនេះ លោកអ៊ិញហ៊ាន ក៏កំពុងសិក្សាចំណង់ចំណូលចិត្ត របស់អ្នកបរិភោគ ខណៈបច្ចុប្បន្ន មីរសជាតិល្ពៅ ទទួលបានការគាំទ្រខ្លាំងជាងគេ៕
Tag:
មីល្ពៅ
មីត្រាវ
មីដំឡូង
© រក្សាសិទ្ធិដោយ thmeythmey.com
