ពីនេះ ពីនោះ
សុខភាព
ស្គាល់ “សណ្ដែកហោឡាំងតាវ” ឬអត់ (Snow pea)? បន្លែនេះជួយទប់ស្កាត់បញ្ហាសុខភាពជាច្រើន
×![]()
ដោយ: សារព័ត៌មានថ្មីៗ
ទោះបីជាស្គាល់និងឧស្សាហ៍ទទួលទានសណ្ដែកហោឡាំងតាវ ប៉ុន្តែប្រហែលជាមិនធ្លាប់ចាប់អារម្មណ៍ពីអត្ថប្រយោជន៍ដ៏ប្រសើររបស់វាចំពោះសុខភាពឡើយ។ ថាតើសណ្ដែកនេះអាចផ្ដល់ផលល្អៗអ្វីខ្លះ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលអ្នកគួររួមបញ្ចូលសណ្ដែកហោឡាំងតាវក្នុងរបបអាហារប្រចាំថ្ងៃ ៖
១. កាត់បន្ថយហានិភ័យនៃជំងឺខ្វះគ្រាប់ឈាមក្រហម
មួយក្នុងចំណោមសារធាតុចិញ្ចឹមចាំបាច់ជាច្រើនដែលសណ្ដែកហោឡាំងតាវមានផ្ទុក គឺជាតិដែក។ នេះហើយជាមូលហេតុដែលអ្នកមានបញ្ហាខ្វះគ្រាប់ឈាមក្រហមដោយសារកង្វះជាតិដែកគួរព្យាយាមទទួលទាន ឬរួមបញ្ចូលសណ្ដែកហោឡាំងតាវក្នុងរបបអាហារ។ សណ្ដែកនេះក៏ជាជម្រើសដ៏ប្រសើរសម្រាប់អ្នកដែលប្រឈមមុខខ្ពស់នឹងហានិភ័យនៃជំងឺខ្វះគ្រាប់ឈាមក្រហមដូចជាស្ដ្រីដែលធ្លាក់ឈាមខ្លាំងកំឡុងពេលមករដូវនិងស្ត្រីដែលកំពុងមានផ្ទៃពោះជាដើម។
២. ទប់ស្កាត់បញ្ហាពាក់ព័ន្ធនឹងខួរក្បាលនិងប្រព័ន្ធសសៃប្រសាទរបស់ទារកក្នុងផ្ទៃ
សណ្ដែកហោឡាំងតាវមានផ្ទុកសម្បូតទៅដោយសារធាតុ folate ដែលជួយទប់ស្កាត់បញ្ហាពាក់ព័ន្ធនឹងខួរក្បាលនិងប្រព័ន្ធសសៃប្រសាទរបស់ទារកក្នុងផ្ទៃបានយ៉ាងប្រសើរ។
៣. ពង្រឹងសុខភាពឆ្អឹង
កាល់ស្យូមជាសារធាតុចិញ្ចឹមសំខាន់មួយទៀតដែលមានផ្ទុកក្នុងសណ្ដែកហោឡាំងតាវ។ ដូច្នេះប្រសិនបើអ្នកចង់កាត់បន្ថយហានិភ័យនៃជំងឺពុកឆ្អឹងចូរកុំភ្លេចរួមបញ្ចូលអាហារសម្បូរជាតិកាល់ស្យូមដូចជាសណ្ដែកហោឡាំងតាវក្នុងរបបអាហារប្រចាំថ្ងៃ។ ជាតិ Phosphorous និងប៉ូតាស្យូមដែលមានក្នុងសណ្ដែកនេះក៏ជួយពង្រឹងសុខភាពឆ្អឹងគួរឱ្យកត់សម្គាល់ផងដែរ។
៤. គ្រប់គ្រងសម្ពាធឈាម
បញ្ហាគួរឱ្យព្រួយបារម្ភបំផុតមួយនៃសម្ពាធឈាមឡើងខ្ពស់ គឺវាអាចធ្វើឱ្យអ្នកប្រឈមមុខនឹងជំងឺសាហាវៗជាច្រើន រួមទាំងជំងឺខ្សោយតម្រងនោមដាច់សសៃឈាមខួរក្បាល និងគាំងបេះដូង។ ទោះជាយ៉ាងណាសណ្ដែកហោឡាំងតាវមានផ្ទុកជាតិប៉ូតាស្យូមដែលជួយគ្រប់គ្រងសម្ពាធឈាមបានយ៉ាងប្រសើរ។
៥. ពង្រឹងប្រព័ន្ធភាពស៊ាំរាងកាយ
សណ្ដែកហោឡាំងតាវក៏មានផ្ទុកវីតាមីន C ដែលជួយពង្រឹងប្រព័ន្ធភាពស៊ាំរាងកាយទប់ទល់ជំងឺឆ្លងផ្សេងៗជាពិសេសជំងឺផ្ដាសាយធំ ឬគ្រុនផ្ដាសាយ។
៦. ពង្រឹងសុខភាពភ្នែក
វីតាមីន A ក្នុងសណ្ដែកហោឡាំងតាវជួយពង្រឹងសុខភាពភ្នែកកាត់បន្ថយហានិភ័យនៃបញ្ហាភ្នែកដែលអាចបណ្ដាលឱ្យបាត់បង់ការមើលឃើញ។
៧. សម្រួលចលនាពោះវៀន
សណ្ដែកហោឡាំងតាវមានផ្ទុកសម្បូរទៅដោយជាតិសសៃដែលជួយសម្រួលចលនាពោះវៀនទប់ស្កាត់បញ្ហាទល់លាមក៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
