ភ្នំពេញ៖ សេចក្តីព្រាងច្បាប់បទល្មើសបច្ចេកវិទ្យាព័ត៌មាន កំពុងស្ថិតនៅក្នុងដំណាក់កាលប្រជុំពិគ្រោះយោបល់ នៅក្រសួងមហាផ្ទៃ ។ សេចក្តីព្រាងច្បាប់នេះ មានគោលបំណងរក្សាសន្តិសុខ និងសណ្ដាប់ធ្នាប់សង្គម នៃអន្តរកាលបច្ចេកវិទ្យាទំនើប។ សម្ព័ន្ធអ្នកសារព័ត៌មាន ហៅកាត់ថា CamboJa គាំទ្រឲ្យមានច្បាប់នេះ តែមិនត្រូវបង្កើតមកដើម្បីរឹតត្បិតសិទ្ធិសេរីភាពពលរដ្ឋឡើយ។
រដ្ឋលេខាធិការក្រសួងមហាផ្ទៃ លោក ប៊ុន ហុន បានបញ្ជាក់ថា ក្រសួងបានប្រជុំពិភាក្សាលើសេចក្តីព្រាងច្បាប់បទល្មើសបច្ចេកវិទ្យានេះ ចំនួន៦៨ហើយ បើគិតចាប់តាំងពីឆ្នាំ២០១៦មក។ លោក អះអាងថា ការបង្កើតច្បាប់មួយឡើងត្រូវការប្រជុំពិភាក្សាឲ្យបានគ្រប់ជ្រុងជ្រោយ ទើបប្រើរយៈពេលយូរ។
ថ្លែងប្រាប់សារព័ត៌មានថ្មីៗ លោក ប៊ុន ហុន បានបញ្ជាក់ដូច្នេះថា៖« បង្កើតច្បាប់មួយៗត្រូវសិក្សាពាក់ព័ន្ធពីផលប្រយោជន៍សង្គម សិទ្ធិមនុស្សនិងសិទ្ធិសេរីភាពបុគ្គល...អ្នកមិនយល់គិតថាច្បាប់នេះយូរ ហើយខ្ញុំមិនអាចកំណត់បានទេថាចប់ពេលណា តែឆន្ទៈរបស់រដ្ឋាភិបាលចង់ចប់រហ័ស ប៉ុន្តែត្រូវគិតគ្រប់ជ្រុងជ្រោយទាំងអស់។ ប៉ុណ្ណឹងហើយ នៅមានអ្នករិះគន់ ខ្វះនេះខ្វនោះ»។
បើតាមរដ្ឋលេខាធិការក្រសួងមហាផ្ទៃរូបនេះ សេចក្ដីព្រាងច្បាប់បទល្មើសបច្ចេកវិទ្យា ក៏មានការចូលរួមផ្ដល់មតិយោបល់ពីមន្រី្តជំនាញយុត្តិធម៌របស់អាមេរិក និងអ្នកជំនាញក្រុមហ៊ុនធំៗរបស់អាមេរិក ដូចជា Facebook Google និង Amazon ជាដើម។
ប្រធានសម្ព័នអ្នកសារព័ត៌មានកម្ពុជា(CamboJa) លោក ណុប វី គាំទ្រឲ្យកម្ពុជាមានច្បាប់នេះ ប៉ុន្តែច្បាប់នេះមិនត្រូវមានលក្ខណៈរឹតត្បិតសិទ្ធិសេរីភាពពលរដ្ឋ ឬអ្នកប្រើប្រាប់បណ្ដាញសង្គមឡើយ។
លោក ណុប វី ថ្លែងប្រាប់សារព័ត៌មានថ្មីៗតាមទូរស័ព្ទយ៉ាងដូច្នេះថា៖ «សម្រាប់ខ្ញុំផ្ទាល់ធ្វើការក្នុងវិស័យព័ត៌មាន មានការប្រើប្រាស់និងផ្សព្វផ្សាយព័ត៌មានតាមប្រព័ន្ធអ៊ីនធឺណេត យើងគិតថាវាជាអ្វីដែលយើងត្រូវទទួលបានដឹងពីដំណើរការសេចក្ដីព្រាងច្បាប់នេះ។ ប៉ុន្តែជាលើកទីមួយសម្រាប់ខ្ញុំដែលបានដឹងថា មានកិច្ចប្រជុំជាផ្លូវការនៅក្រសួង...។ ច្បាប់នេះកម្ពុជាក៏គួរតែមាន ក៏ប៉ុន្តែចំណុចសំខាន់គឺគួរតែមានច្បាប់ដែលមានគុណភាព ឆ្លើយតបនឹងបញ្ហាដែលកើតមានឡើង ជាជាងច្បាប់មួយដែលមានទំនោរក្នុងការរឹតត្បិតទៅដល់សិទ្ធិសេរីភាពពលរដ្ឋឬអ្នកប្រើប្រាស់បណ្ដាញអ៊ីនធឺណេត»។
ទន្ទឹមនឹងនេះ លោក ណុប វី ស្នើឲ្យក្រសួងបើកកិច្ចប្រជុំពិភាក្សាជាមួយភាគីពាក់ព័ន្ធ ដូចជាអង្គការសង្គមស៊ីវិល វិស័យឯកជន ដើម្បីបានផ្ដល់យោបល់ និងមានធាតុចូលរួមផ្សេងៗទៀត ទៅក្នុងខ្លឹមសារនៃសេចក្ដីព្រាងច្បាប់។
«ខ្ញុំយល់ឃើញថា គួរតែមានការបើកចំហរឲ្យមានកិច្ចពិភាក្សាឲ្យបានទូលំទូលាយ ជាមួយតំណាងអង្គការសង្គមស៊ីវិល ដែលជាអ្នកធ្វើការដើម្បីបម្រើផលប្រយោជន៍ដល់ពលរដ្ឋ អ្នកប្រើប្រាស់បណ្ដាញអ៊ីនធឺណេត ជាក្រុមហ៊ុនអ៊ីនធឺណេតជាដើម។ ដើម្បីយើងធានាឲ្យមានគុណភាពនៃច្បាប់ហ្នឹង ជាជាងការជួបប្រជុំតែផ្ទៃក្នុងរបស់ក្រសួង។ ខ្ញុំគិតថាវាអាចតិចឬច្រើនប៉ះពាល់ដល់ផលប្រយោជនពលរដ្ឋ»។ នេះបើតាមការបញ្ជាក់របស់ លោក ណុប វី ដែលបានបន្ថែមថា ខាងសម្ព័នអ្នកសារព័ត៌មានកម្ពុជាត្រៀមខ្លួនរួចជាស្រេចក្នុងការចូលរួមកិច្ចពិភាក្សា ប្រសិនបើមានការអនុញ្ញាតឬអញ្ជើញឲ្យចូលរួម។
បច្ចុប្បន្នសេចក្ដីព្រាងច្បាប់នេះ មាន៩ជំពូក ៥០មាត្រា ប៉ុន្តែអាចនឹងមានការប្រែប្រួលបន្តទៀត តាមស្ថានភាពជាក់ស្ដែងនៃកិច្ចប្រជុំ ។ នេះបើតាមលោក ប៊ុន ហុន រដ្ឋលេខាធិការក្រសួងមហាផ្ទៃ៕