កូនស្រីលួចលាក់អតីតស្ដេចបែលហ្ស៊ិក ឈ្នះក្ដីក្លាយជាព្រះនាងពេញសិទ្ធិ

អន្តរជាតិ

កូនស្រីលួចលាក់អតីតស្ដេចបែលហ្ស៊ិក ឈ្នះក្ដីក្លាយជាព្រះនាងពេញសិទ្ធិ

02, Oct 2020 , 1:59 pm

រូបភាព

ព្រះនាង Delphine ដែលឈ្នះក្ដីក្លាយជាបុត្រីស្របច្បាប់របស់អតីតស្ដេចបែលហ្ស៊ិក Albert II ។ រូបភាព The Telegraph

ដោយ: តន ចាន់រិទ្ធារ៉ា

នៅបែលហ្ស៊ិក វិចិត្រករគំនូរម្នាក់ឈ្មោះ Delphine Boel បានក្លាយជាព្រះនាងរបស់ប្រទេសតំបន់អឺរ៉ុបមួយនេះ បន្ទាប់ពីឈ្នះក្ដីដ៏យូរអង្វែងមួយ។

Delphine Boel វ័យ៥២ នឹងក្លាយទៅជាព្រះនាង Delphine Saxe-Cobourg នៃរាជាណាចក្របែលហ្ស៊ិក បន្ទាប់ពីតុលាការទីក្រុងព្រុចសែលឯកភាពលើលទ្ធផលធ្វើតេស្ត DNA រវាងនាង និងអតីតមហាក្សត្របែលហ្ស៊ិក Albert II នៅថ្ងៃទី១ ខែតុលា។ នេះបើតាមការបញ្ជាក់របស់លោក Marc Uyttendaele ដែលជាមេធាវីរបស់លោកស្រី Boel ដែលក្លាយជាព្រះនាងហើយនោះ។

ការសម្រេចរបស់តុលាការទីក្រុងព្រុចសែល ទំនងជាបញ្ចប់សំណុំរឿងមិនទទួលស្គាល់ខ្លួនឯងរបស់អតីតប្រមុខរដ្ឋបែលហ្ស៊ិក ដែលបានដាក់រាជ្យកាលពីឆ្នាំ២០១៣ ។ សំណុំរឿងនេះ ផ្ទុះឡើងនៅឆ្នាំ១៩៩៧ ពេលដែល Boel អះអាងថាជាកូនស្រីលួចលាក់របស់ស្ដេច Albert II ។ ទើបដល់ឆ្នាំ២០១៩ ប៉ុណ្ណោះ ដែលតុលាការសម្រេចឲ្យមានការធ្វើតេស្ត DNA ដើម្បីរកការពិត។

«តុលាការបញ្ជាក់ថា ស្ដេច Albert II ពិតជាឪពុកនាងមែន។» លោក Uyttendaele ប្រាប់ទីភ្នាក់ងារព័ត៌មាន AFP បែបនេះ។ ជាមួយគ្នានោះ តុលាការបែលហ្ស៊ិក ក៏បានយល់ព្រមតាមសំណើផ្សេងទៀតរាប់ទាំងការទទួលបានការយកចិត្តទុកដាក់ដូចបុត្រាបុត្រីឯទៀតដែរ។

មហាក្សត្របែលហ្ស៊ិកសព្វថ្ងៃ Phillip ជាបុត្រាស្របច្បាប់របស់ទ្រង់ Albert II នឹងក្លាយជាព្រះរាមរបស់ព្រះនាងថ្មី៕