វិមានប្រធានាធិបតីរុស្ស៊ី បានចោទប្រកាន់មេដឹកនាំប្រឆាំង លោក Alexei Navalny ថា ធ្វើការឲ្យភ្នាក់ងារចារកម្មអាមេរិក (CIA) ហើយចាត់ទុកការអះអាងរបស់លោក Navalny ថា ប្រធានាធិបតី វ្ល៉ាឌីមៀ ពូទីន ជាអ្នកនៅពីក្រោយផែនការដាក់ថ្នាំបំពុលលោក គ្មានមូលដ្ឋាន ។ ជាការឆ្លើយតប លោក Navalny បានទាមទារឲ្យក្រុងមូស្គូបញ្ចេញភស្តុតាងបង្ហាញថាលោកពិតជាបម្រើការឲ្យ CIA អាមេរិក។
លោក Navalny បានដឹងស្មារតីឡើងវិញកាលពីថ្មីៗ ក្រោយធ្លាក់ខ្លួនឈឺភ្លាមៗអំឡុងពេលធ្វើដំណើរក្នុងជើងហោះហើរមួយក្នុងទីក្រុង Siberia ហើយត្រូវបានដឹកទៅព្យាបាលនៅទីក្រុង បែរឡាំង នៃប្រទេស អាល្លឺម៉ង់។ គ្រូពេទ្យអាល្លឺម៉ង់ អះអាងថា លោកត្រូវបំពុលដោយថ្នាំប្រភេទ Novichok ដែលជាថ្នាំពុលកម្រិតយោធា ហើយត្រូវបានអភិវឌ្ឍដោយអតីតសហភាពសូវៀតក្នុងចន្លោះទសវត្សរ៍ឆ្នាំ១៩៧០ និងឆ្នាំ១៩៨០។
«ខ្ញុំជឿជាក់ថា លោក ពូទីន នៅពីក្រោយឧក្រិដ្ឋកម្មនេះ»។ លោក Navalny បានប្រាប់ទស្សនាវដ្តីអាល្លឺម៉ង់ Der Spiege បែបនេះ ក្នុងកិច្ចសម្ភាសមួយ ដែលចុះផ្សាយនៅថ្ងៃទី ១ ខែតុលា មុននឹងបន្ថែមថា លោកគ្មានគិតឃើញរូបភាពអ្វីផ្សេងក្រៅពីនេះទៀតឡើយ។
ជាការឆ្លើយតប អ្នកនាំពាក្យវិមានប្រធានាធិបតីរុស្ស៊ី លោក Dmitry Peskov បានបញ្ជាក់ថា ការចោទប្រកាន់របស់មេដឹកនាំប្រឆាំង Navalny ទៅលើលោកពូទីន គឺគ្មានមូលដ្ឋានច្បាស់លាស់ មិនអាចទទួលយកបាន ហើយជាការប្រមាថផងដែរ។ ម្យ៉ាងវិញទៀត លោក Peskov ក៏បានចោទប្រកាន់ត្រង់ៗថា លោក Navavny កំពុងធ្វើការជាមួយភ្នាក់ងារចារកម្មអាមេរិក (CIA)។
យ៉ាងណាមិញ លោក Navalny នៅតែមិនអស់ចិត្តហើយបន្តប្រតិកម្មចំពោះការចោទប្រកាន់ពីសំណាក់រដ្ឋាភិបាលរុស្ស៊ីមកលើលោកថាបម្រើការឲ្យភ្នាក់ងារបរទេស។ ត្រង់នេះលោកសរសេរលើវេបសាយផ្ទាល់ខ្លួនថា៖«ជាដំបូង ខ្ញុំនឹងប្ដឹងលោក Peskov។ ហើយរឿងទី២ គឺ ខ្ញុំទាមទារឲ្យមានការបង្ហាញភស្តុតាងនិងការពិតបញ្ជាក់ថា ខ្ញុំពិតជាធ្វើការជាមួយ CIA មែន»។ លោកថែមទាំងឌឺដងទៀតថា លោកអនុញ្ញាតឲ្យក្រុងមូស្គូចាក់ផ្សាយភស្តុតាងលើទូរទស្សន៍។
លោក Navalny បានប្រាប់ទស្សនាវដ្តី Der Spiege ពីការតាំងចិត្តវិលទៅកាន់ប្រទេសរុស្ស៊ីផងដែរ។ លោកនិយាយដូច្នេះថា៖«កិច្ចការខ្ញុំឥឡូវនេះ គឺរក្សាស្មារតីមិនភ័យខ្លាច។ ហើយខ្ញុំអត់ខ្លាចឡើយ! ប្រសិនបើដៃទាំងទ្វេខ្ញុំញ័រ វាព្រោះតែថ្នាំពុលប៉ុណ្ណោះ, មិនកើតចេញពីភាពភ័យខ្លាចឡើយ។ ខ្ញុំនឹងមិនឲ្យអំណោយទៅលោកពូទីន ដោយការមិនវិលត្រលប់ទៅរុស្ស៊ីវិញឡើយ»។
ពាក់ព័ទ្ធនឹងការវិវត្តចុងក្រោយក្នុងករណីបំពុលលោក Navalny ទីក្រុងមូស្គូ បានអញ្ជើញអ្នកជំនាញពីអង្គការបង្ការអាវុធគីមី(OPCW)ឲ្យទៅកាន់ប្រទេសរុស្ស៊ីដើម្បីសហការស៊ើបអង្កេតលើបញ្ហានេះ។ នេះបើតាមការចុះផ្សាយរបស់ទីភ្នាក់ងារព័ត៌មានរុស្ស៊ី RIA ។ ការអញ្ជើញនេះ ធ្វើឡើងក្រោយអាល្លឺម៉ង់កាលពីខែមុនបានស្នើសុំជំនួយពីអង្គការ OPCW លើករណីបំពុលលោក Navalny។
ទាំងអាល្លឺម៉ង់ និងបណ្ដាប្រទេសលោកខាងលិចផ្សេងទៀត បានទាមទារការបកស្រាយពីសំណាក់រដ្ឋាភិបាលរុស្ស៊ីពាក់ព័ន្ធនឹងការឈឺថ្កាត់របស់លោក Navalny ខណៈរុស្ស៊ីអះអាងថាខ្លួនគ្មានរកឃើញភស្តុតាងណាមួយបញ្ជាក់ថាមេដឹកនាំប្រឆាំងត្រូវថ្នាំពុលឡើយ ហើយក៏បដិសេធជាប់ទាក់ទងក្នុងករណីនេះ៕