COVID-19
អន្តរជាតិ
មន្ត្រីទូតចិន៖ ចិនមានឆន្ទៈអភិវឌ្ឍទំនាក់ទំនាក់ជាមួយអាមេរិកដោយសុច្ឆន្ទៈ និងស្មោះត្រង់ អគ្គរដ្ឋទូតចិនប្រចាំនៅអាមេរិក លោក Cui Tiankai។ រូបភាព៖ Reuters
× អគ្គរដ្ឋទូតចិនប្រចាំនៅអាមេរិក លោក Cui Tiankai កាលពីថ្ងៃទី១ ខែតុលា បានលើកឡើងថា ចិន រីករាយក្នុងការអភិវឌ្ឍទំនាក់ទំនងការទូតជាមួយអាមេរិក។ ការអះអាងរបស់មន្ត្រីជាន់ខ្ពស់ចិនរូបនេះ ធ្វើឡើងស្របពេលទីក្រុងប៉េកាំង និងវ៉ាស៊ីនតោន កំពុងមានទំនាស់ជាច្រើន។
ទំនាក់ទំនងអាមេរិក-ចិន កំពុងតែល្អក់កករលើបញ្ហាជាច្រើន ចាប់តាំងពីCOVID-19 ពាណិជ្ជកម្ម ហុងកុង កោះតៃវ៉ាន់ សមុទ្រចិនខាងត្បូង ការទូត និងបញ្ហាជាច្រើនទៀត។ ស្របពេលភាពចម្រូងចម្រាសទាំងនេះ ដែលមិនរំពឹងថា នឹងមានច្រកចេញឆាប់ៗ បេសកជនចិប្រចាំអាមេរិក បានអះអាងថា ចិននៅតែមានបំណងស្ដារទំនាក់ទំនងជាមួយអាមេរិកឡើងវិញ។
ថ្លែងនៅក្នុងកម្មវិធីប្រារព្ធខួបសាធារណរដ្ឋចិនតាមប្រព័ន្ធវីដេអូ លោក Cui Tiankai អគ្គរដ្ឋទូតចិនប្រចាំនៅអាមេរិក បានលើកឡើងយ៉ាងដូច្នេះថា៖ «យើងមានឆន្ទៈក្នុងការអភិវឌ្ឍទំនាក់ទំនងជាមួយអាមេរិក ដោយសុច្ឆន្ទៈ និងស្មោះត្រង់ ហើយប្រទេសទាំងពីរគួរតែស្តារទំនាក់ទំនង ឲ្យដើរលើផ្លូវត្រូវឡើងវិញ ដោយមិនមានជម្លោះ, ការប្រឈមមុខដាក់គ្នា, ការគោរពគ្នាទៅវិញទៅមក និងសហប្រតិបត្តិការឈ្នះៗ»។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ទំនាក់ទំនងចិន និងអាមេរិកក្នុងពេលនេះ គឺជាការប្រឈមមុខដាក់គ្នាខ្លាំងបំផុត ក្នុងរយៈពេល៤១ឆ្នាំកន្លងមកនេះ ព្រោះភាគីទាំងពីរគឺព្យាយាមផ្តាច់សេដ្ឋកិច្ចចេញពីគ្នា និងបង្កឲ្យមានការប្រឈមមនោគមវិជ្ជានយោបាយ និងសង្គ្រាមត្រជាក់សារជាថ្មី។ លោក Cui បានយល់ឃើញបែបនេះ ដោយបន្ថែមថា វាគឺជាបំផ្លាញផលប្រយោជន៍របស់ប្រជាជនអាមេរិក និងចិនយ៉ាងធ្ងន់ធ្ងរ ហើយមានតែទំនាក់ទំនងល្អទេ ទើបអាចការពារផលប្រយោជន៍ប្រជាជនប្រទេសទាំងពីរបាន។
នៅក្នុងកិច្ចប្រជុំមហាសន្និបាតអង្គការប្រជាជាតិ នាពេលកន្លងទៅ ប្រធានាធិបតីអាមេរិក លោក ដូណាល់ ត្រាំ និងសមភាគីចិន លោក ស៊ី ជិនភីង បានយកវេទិកាអន្តរជាតិមួយនេះ វាយប្រហារគ្នាទៅវិញទៅមក។
សូមបញ្ជាក់ថា តាមការចុះផ្សាយរបស់ក្រសួងការបរទេសអាមេរិក នៅថ្ងៃទី២៩ ខែកញ្ញា ប្រមុខការទូតអាមេរិក លោក ម៉ៃ ប៉ុមប៉េអូ នឹងទស្សនកិច្ចមកជប៉ុន កូរ៉េខាងត្បូង និងម៉ុងហ្គោលី នៅថ្ងៃខាងមុខនេះ។ ចិន អាចជាប្រធានបទដ៏សំខាន់ក្នុងកិច្ចប្រជុំសន្ទនាសន្តិសុខ៤ភាគី (Quadrilateral Security Dialogue) នៅក្នុងទីក្រុងតូក្យូលោក ប៉ុមប៉េអូ និងសមភាគីជប៉ុន អូស្ត្រាលី និងឥណ្ឌាដែរ៕
© រក្សាសិទ្ធិដោយ thmeythmey.com