កីឡាជាតិ
ជាតិ
លោក ជា សែនវិស្សុត ជឿថា សូហ្វតិន្នីសនឹងអាចដណ្តើមមេដាយជូនជាតិ បើមានក្នុងស៊ីហ្គេមនៅវៀតណាម សកម្មភាពប្រកួត និងហ្វឹកហាត់របស់កីឡាករកីឡាការិនីសូហ្វតិន្នីស កាលពីពេលកន្លងទៅ
× បើពុំមានការប្រែប្រួលទេ វៀតណាមនឹងធ្វើជាម្ចាស់ផ្ទះការប្រកួតកីឡាស៊ីហ្គេមលើកទី៣១នៅអំឡុងខែវិច្ឆិកា ឆ្នាំ២០២១។ ម្ចាស់ផ្ទះវៀតណាម បានសម្រេចជាឯកតោភាគី ដោយគ្រោងដាក់កីឡា៣៦ប្រភេទឲ្យចូលរួមប្រកួតប្រជែង។ ថ្នាក់ដឹកនាំសហព័ន្ធសូហ្វតិន្នីសកម្ពុជា បង្ហាញជំនឿចិត្តយ៉ាងមុតមាំចំពោះកីឡាសូហ្វតិន្នីស ក្នុងការដណ្តើមមេដាយជូនជាតិ ក្នុងព្រឹត្តិការណ៍កីឡាស៊ីហ្គេមនៅវៀតណាម។ ប៉ុន្តែបច្ចុប្បន្នកីឡានេះពុំទាន់មានក្នុងបញ្ជីបឋមរបស់វៀតណាមនៅឡើយទេ។
លោក ជា សែនវិស្សុត អគ្គលេខាធិការនៃសហព័ន្ធកីឡាសូហ្វតិន្នីសកម្ពុជា បានបង្ហាញជំនឿចិត្តយ៉ាងមុតមាំលើសមត្ថភាពកីឡាករខ្លួនក្នុងការមេដាយពីព្រឹត្តិការណ៍កីឡាស៊ីហ្គេមជូនជាតិ។ លោក ជឿជាក់ថា កីឡាករកីឡាការិនីសូហ្វតិន្នីស នឹងអាចស្វែងរកមេដាយជូនជាតិមាតុភូមិ បើវៀតណាមដាក់កីឡានេះក្នុងការប្រកួតកីឡាស៊ីហ្គេម ដែលពួកគេធ្វើជាម្ចាស់ផ្ទះនៅឆ្នាំ២០២១។ តែលោក មិនបានបញ្ជាក់មេដាយណាមួយនោះទេ។
កត្តាដែលធ្វើឲ្យលោកមានជំនឿចិត្តបែបនេះ ដោយសារក្រុមអត្តពលិកកីឡាសូហ្វតិន្នីស ធ្នាប់ដណ្តើមបានមេដាយសំរឹទ្ធជូនជាតិម្តងរួចមកហើយ ក្នុងការប្រកួតកីឡាស៊ីហ្គេមលើកទី៣០នៅប្រទេសហ្វីលីពីនកាលពីឆ្នាំ២០១៩ ដែលពួកគេបង្ហាញខ្លួនជាលើកដំបូង។ មេដាយសំរឹទ្ធស៊ីហ្គេមទាំងពីរនោះ ពួកគេដណ្តើមបានលើវិញ្ញាសាវាយជាក្រុមបុរស និងឯកត្តជន។
អគ្គលេខាធិការរូបនេះបានបញ្ជាក់បន្ថែមថា ប្រសិនបើវិញ្ញាសាសូហ្វតិន្នីស ត្រូវបានវៀតណាម ដាក់ឲ្យប្រកួតក្នុងព្រឹត្តិការណ៍នេះ សហព័ន្ធ នឹងបញ្ជូនកីឡាករកីឡាការិនីទៅហ្វឹកហាត់នៅតាមបណ្តាប្រទេសសក្តានុពលលើប្រភេទកីឡានេះ ឬអញ្ជើញគ្រូបង្វឺកពីប្រទេសទាំងនោះមកបង្វឹកនៅកម្ពុជា។ ប្រទេសគោលដៅរបស់សហព័ន្ធនេះ រួមមានជប៉ុន និងកូរ៉េខាងត្បូង។
លោក ជា សែនវិស្សុត (ឆ្វេង)ថតជាមួយសម្តេច ទៀ បាញ់ រដ្ឋមន្ត្រីក្រសួងការពារជាតិពេលសម្តេចចុះត្រួតពិនិត្យមើលទីលានហ្វឹកហាត់កីឡាសូហ្វតិន្នីស
បើតាមលោក ជា សែនវិស្សុត បច្ចុប្បន្នសហព័ន្ធកំពុងខិតខំប្រឹងប្រែងបញ្ចុះបញ្ចូលម្ចាស់ផ្ទះវៀតណាម ឲ្យដាក់កីឡានេះក្នុងការប្រកួតកីឡាស៊ីហ្គេមនៅឆ្នាំ២០២១។ មិនមែនមានតែកម្ពុជានោះទេ សូម្បីហ្វីលីពីន ឥណ្ឌូណេស៊ី ថៃ និងឡាវ ក៏បានដាក់សំណើទៅកាន់ម្ចាស់ផ្ទះវៀតណាម និងក្រុមប្រឹក្សាកីឡាអាស៊ីអាគ្នេយ៍ ដើម្បីសុំដាក់កីឡាសូហ្វតិន្នីសក្នុងការប្រកួតនេះផងដែរ។
កាលពីពេលកន្លងទៅ វៀតណាម បានសម្រេចជាឯកតោភាគីដោយសម្រេចដាក់កីឡា៣៦ប្រភេទក្នុងព្រឹត្តិការណ៍កីឡាស៊ីហ្គេមលើកទី៣១ ដែលពួកគេធ្វើជាម្ចាស់ផ្ទះនៅឆ្នាំ២០២១។ ប៉ុន្តែចំនួននេះអាចមានការប្រែប្រួល ដ្បិតប្រទេសជាសមាជិកទាំង១០ផ្សេងទៀតរួមមានកម្ពុជា ថៃ ឥណ្ឌូណេស៊ី ហ្វីលីពីន សិង្ហបុរី ព្រុយណេ ឡាវ ម៉ាឡេស៊ី មីយ៉ាន់ម៉ា និងទីម័រខាងកើត មានសិទ្ធិស្នើសុំដាក់ប្រភេទកីឡា ដែលជាសក្តានុពលរបស់ខ្លួនបន្ថែមទៀត។
តាមគម្រោងការប្រកួតកីឡាស៊ីហ្គេមលើកទី៣១ គ្រោងធ្វើឡើងចន្លោះពីថ្ងៃទី២១ ខែវិច្ឆិកា ដល់ថ្ងៃទី២ ខែធ្នូ ឆ្នាំ២០២១ នៅទីក្រុងហាណូយប្រទេសវៀតណាម៕
Tag:
សូហ្វតិន្នីស
ជា សែនវិស្សុត
SEA Games 2021
© រក្សាសិទ្ធិដោយ thmeythmey.com