ទឹកធ្លាក់ភ្នំកំពូលនៅស្រុករតនមណ្ឌលជាតំបន់ទេសចរណ៍ធម្មជាតិកែច្នៃដ៏ទាក់ទាញ

ជាតិ

ទឹកធ្លាក់ភ្នំកំពូលនៅស្រុករតនមណ្ឌលជាតំបន់ទេសចរណ៍ធម្មជាតិកែច្នៃដ៏ទាក់ទាញ

04, Oct 2020 , 8:39 am

រូបភាព

ទឹកធ្លាក់ភ្នំកំពូល

ដោយ:

ទឹកធ្លាក់ភ្នំកំពូល ជាតំបន់ទេសចរណ៍ធម្មជាតិកែច្នៃមួយ មានសម្រស់យ៉ាងទាក់ទាញ ដែលមានរុក្ខជាតិ តូច ធំ ដុះអមសងខាង ទឹកធ្លាក់មើលឃើញដល់ផ្ទៃស្ទឹង។ ទឹកធ្លាក់មួយនេះ ស្ថិតនៅភូមិអូរល្មូន ឃុំផ្លូវមាស ស្រុករតនៈមណ្ឌល ខេត្តបាត់ដំបង ចម្ងាយប្រមាណជាង៦០គីឡូម៉ែត្រ ពីក្រុងបាត់ដំបង។

រមណីយដ្ឋានទេសចរណ៍ធម្មជាតិ ទឹកធ្លាក់ភ្នំកំពូល មានទឹកត្រជាក់ល្ហឹម ទេសចរអាចងូតទឹកកម្សាន្ត ជិះទូកកៃយ៉ាក់ និងលេងកីឡាលើទឹក។ ទេសចរ ក៏អាចអង្គុយបរិភោគអាហារនៅលើខ្យុស ដែលសាងសងឡើងនៅជាប់មាត់ទឹក ជាមួយខ្យល់អាកាសបរិសុទ្ធ អាចធ្វើឲ្យទេសចររំសាយអស់ទុក្ខកង្វល់ ជាងនេះទៅទៀតទេសចរក៏អាចបោះតង់ សម្រាកកម្សាន្តនៅទឹកធ្លាក់ភ្នំកំពូលផងដែរ។ នេះបើតាមគេហទំព័រមន្ទីរទេសចរណ៍ខេត្តបាត់ដំបង។

ទឹកធ្លាក់ភ្នំកំពូល

លោកស្រី ចឹង សុភក្ត្រ័ ប្រធានការិយាល័យរមណីយដ្ឋានទេសចរណ៍ខេត្តបាត់ដំបង បានប្រាប់សារព័ត៌មានThmeyThmey25 ថា ទឹកធ្លាក់ភ្នំកំពូលជាតំបន់ទេសចរណ៍ធម្មជាតិកែច្នៃមួយដែលទើប បង្កើតឡើង និងមិនសូវមានទេសចរស្គាល់នៅឡើយនោះទេ។ លោកស្រីបានថ្លែងដូច្នេះថា៖ « នៅទឹកធ្លាក់ភ្នំកំពូលនេះ មិនទាន់មានទេសចរស្គាល់ច្រើនទេ ព្រោះកំពុងរៀបចំ ប៉ុន្តែនឹងមានការរៀបចំបន្ថែមទៀត ព្រោះទីនេះជាតំបន់ធម្មជាតិ ហើយមានការកែច្នៃបន្ថែម»។

ទឹកធ្លាក់ភ្នំកំពូល

លោកស្រីបានអះអាងថា ក្រុមការងារទេសចរណ៍ខេត្តបាត់ដំបង នឹងព្យាយាមផ្សព្វផ្សាយពីតំបន់ទេសចរណ៍មួយនេះដល់សាធារណជន ដើម្បីឲ្យមានទេសចរទៅកម្សាន្តនៅ ទឹកធ្លាក់ភ្នំកំពូល ច្រើនឡើង៕