កសិដ្ឋានចិញ្ចឹមត្រីរបស់លោក ហោង ទ្រី បានចូលរួមចំណែកកាត់បន្ថយការនាំចូលត្រីជាច្រើនតោនពីបរទេស

ជាតិ

កសិដ្ឋានចិញ្ចឹមត្រីរបស់លោក ហោង ទ្រី បានចូលរួមចំណែកកាត់បន្ថយការនាំចូលត្រីជាច្រើនតោនពីបរទេស

03, Oct 2020 , 4:59 pm

រូបភាព

រូបភាពពីហ្វេសប៊ុកលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ

ដោយ: សារព័ត៌មានថ្មីៗ

កសិដ្ឋានចិញ្ចឹមត្រីមួយស្ថិតក្នុង ឃុំក្អមសំណរ ស្រុកលើកដែក ខេត្តកណ្ដាល បានចូលរួមចំណែកយ៉ាងច្រើនក្នុងការកាត់បន្ថយការនាំចូលត្រីពីបរទេស។ បើកដំណើរការអស់រយៈពេល១០ឆ្នាំមកហើយ លោក ហោង ទ្រី ដែលជាម្ចាស់កសិដ្ឋានចិញ្ចឹមត្រីនេះ បានឲ្យដឹងថា លោកមានស្រះចិញ្ចឹមត្រីចំនួន១០ ដែលក្នុងនោះមានស្រះធំៗចំនួន៦។ ដោយសារលោកមានពិសោធន៍ និងបច្ចេកទេសចិញ្ចឹមត្រឹមត្រូវ លោកអាចប្រមូលផលត្រីចិញ្ចឹមទាំងនោះនៅក្នុងរយៈពេល៨ខែ។ លោក ហោង ទ្រី បញ្ជាក់ថា ស្រះត្រីធំ អាចផ្តល់ផលត្រីពី៦៥-៧០តោន នៅក្នុងមួយស្រះ និងអាចលក់បានចន្លោះពី១០ទៅ១៥ម៉ឺនដុល្លារ។ ដ្បិតតែមានចំណូលច្រើន តែលោក ហោង ទ្រី មិនបានបញ្ជាក់ពីទំហំចំណាយ ឬប្រាក់ចំណេញ/ខាតប៉ុន្មាន ពីការចិញ្ចឹមត្រីនេះទេ។

លោក ហោង ទ្រី ជាអ្នកចិញ្ចឹមត្រីនៅក្នុងឃុំក្អមសំណរ ស្រុកលើកដែក ខេត្តកណ្តាល។ តាមគណនីហ្វេសប៊ុករបស់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ហោង ទ្រី បានចាប់ផ្តើមចិញ្ចឹមត្រីត្រីប្រា ត្រីឆ្ដោ និងត្រីសណ្ដាយ រួមទាំងកូនត្រីពូជប្រមាណ១០ឆ្នាំហើយ។ បច្ចុប្បន្ន លោកមានស្រះចិញ្ចឹមត្រីចំនួន១០ ដែលក្នុងនោះស្រះចំនួន៦ មានទំហំ ៨០ម៉ែត្រ គុណនឹង៩០ម៉ែត្រ ហើយស្រះនីមួយៗអាចដាក់កូនត្រីបានជាង១០ម៉ឺនក្បាល។ ចំណែកស្រះ៤ទៀត មានទំហំ ៤៥ម៉ែត្រ គុណនឹង៧០ម៉ែត្រ ដែលអាចដាក់ពូជកូនត្រី ជាង៥ម៉ឺនក្បាលក្នុងស្រះនីមួយៗ។

លោក វេង សាខុន បានឲ្យដឹងតាមរយៈគណនីហ្វេសប៊ុកដដែលថា ត្រីចិញ្ចឹមក្នុងកសិដ្ឋានរបស់លោក អាចហុចផលនៅក្នុងរយៈពេលចិញ្ចឹម៨ខែ ដោយសារតែកសិកររូបនេះ បានអនុវត្តតាមគោលការណ៍បច្ចេកទេសចិញ្ចឹមត្រី ដូចជាការផ្តល់ចំណី ការសម្អាតស្រះ ការគ្រប់គ្រង ប្រើប្រាស់ ការសម្អាតទឹកបូករួមជាមួយពូជត្រីល្អជាដើម។

នាឱកាសដែល លោក វេង សាខុន រដ្ឋមន្ត្រីក្រសួងកសិកម្ម ចុះទៅពិនិត្យកសិដ្ឋានចិញ្ចឹមត្រីរបស់ខ្លួន កសិកររូបនេះ បានជម្រាបទៅលោក វេង សាខុនថា ក្នុងពេលប្រមូលផលម្តងៗ ស្រះធំ អាចផ្តល់ផលត្រី ពី៦៥-៧០តោន ដែលអាចលក់បានប្រាក់ ចន្លោះពី១០ ទៅ ១៥ម៉ឺនដុល្លារ។ ដ្បិតបង្ហើបប្រាប់ចំណូលរាប់ម៉ឺនដុល្លារប្រចាំឆ្នាំ ប៉ុន្តែលោក ហោង ទ្រី មិនបានបញ្ជាក់ពីប្រាក់ចំណេញ ឬខាត ពីរបរមួយនេះឡើយ។

ទោះជាយ៉ាងណាក៏ដោយ នាឱកាសត្រួតពិនិត្យកសិដ្ឋានចិញ្ចឹមត្រីនោះ រដ្ឋមន្ត្រីក្រសួងកសិកម្មលោក វេង សាខុន បានវាយតម្លៃខ្ពស់ ចំពោះការចាប់យករបរចិញ្ចឹមត្រីរបស់កសិកររូបនេះ។ លោក វេង សាខុន បានបន្តថា កសិដ្ឋាននេះ បានចូលរួមចំណែកបំពេញសេចក្តីត្រូវការទីផ្សារក្នុងស្រុក និងកាត់បន្ថយការនាំចូល។ បើទោះជាតម្រូវការទីផ្សារ និងតម្លៃមានការធ្លាក់ចុះបន្តិចក្តី។ ទន្ទឹមនឹងនេះ លោករដ្ឋមន្ត្រីក៏បានអំពាវនាវឲ្យវិនិយោគិនក្នុងស្រុក ងាកមកវិនិយោគក្នុងវិស័យកសិកម្មនេះឲ្យបានច្រើនផងដែរ៕