លោក ស សុខា រដ្ឋលេខាធិការក្រសួងអប់រំ យុវជន និងកីឡា ប្រកាសផ្តល់អគារស្នាក់នៅមួយខ្នងដល់អត្តពលិកជនពិការ ដើម្បីជួយសម្រួលដល់ការស្នាក់នៅក្នុងអំឡុងពេលប្រមូលផ្តុំហ្វឹកហាត់។ ការប្រកាសផ្តល់អគារនេះ ធ្វើឡើងពេលលោក ធ្វើជាអធិបតីក្នុងពិធីបិទការប្រកួតជើងឯកកីឡាបាល់ទះអង្គុយជនពិការ កាលពីថ្ងៃទី២៩ ខែកញ្ញា ឆ្នាំ២០២០។
កន្លែងស្នាក់នៅរបស់អត្តពលិកជនពិការ ដែលប្រក់ស័ង្កសីបិទបាំងដោយក្តារកុងផ្លាកេ និងស័ង្កសីចាស់ៗនៅមជ្ឈមណ្ឌលជាតិជនពិការតេជោសែន នឹងប្រែមុខមាត់នៅជាអគារធ្វើពីថ្មក្នុងពេលឆាប់ៗខាងមុខនេះ។ ការផ្លាស់ប្តូរមុខមាត់នេះ ធ្វើឡើងក្រោយ លោក ស សុខា រដ្ឋលេខាធិការក្រសួងអប់រំយុវជននិងកីឡា ប្រកាសជួយសាងសង់អគារស្នាក់នៅជូនអត្តពលិកជនពិការ។
ការប្រកាសជួយសាងសង់អគារស្នាក់នៅសម្រាប់អត្តពលិកជនពិការនេះ ធ្វើឡើងក្រោយ លោក ឃើញកន្លែងស្នាក់នៅរបស់អត្តពលិកជនការមានសភាពតូចចង្អៀត ខ្វះអនាម័យ និងចាស់រិចរិលទាំងដំបូលនិងជញ្ជាំង ហើយការសាងសង់គ្មានស្តង់ដាត្រឹមត្រូវ។ បើតាមលោក យី វាសនា អគ្គលេខាធិការនៃគណៈកម្មាធិការជាតិប៉ារ៉ាឡាំពិកកម្ពុជា អគារដ៏តូចចង្អៀតខាងលើមានកីឡាករស្នាក់នៅប្រមាណ២០នាក់។
តែយ៉ាងណា រដ្ឋលេខាធិការរូបនេះ មិនបានបញ្ជាក់លម្អិតពីអគារនោះថា មានកម្ពស់ និងប៉ុន្មានបន្ទប់នោះទេ គ្រាន់តែថា លោកនឹងជួយសាងសង់អគារស្នាក់នៅដ៏សមរម្យមួយ។
«ដើម្បីជួយសម្រួលដល់ការស្នាក់នៅរបស់អត្តពលិក ដែលហាត់នៅទីនេះ(មជ្ឈមណ្ឌលជាតិជនពិការតេជោសែន)ក្នុងនាមឯកឧត្តមបណ្ឌិតសភាចារ្យ ហង់ជួន ណារ៉ុន ក៏ដូចជាខ្លួនខ្ញុំផ្ទាល់ និងក្រុមការងារ នឹងរៀបចំកូនអគារតូចមួយសមរម្យជូនដល់កីឡាករកីឡាការិនីយើងស្នាក់នៅ»។ នេះជាការលើកឡើងរបស់លោក ស សុខា។
លោកបានបន្ថែមថា៖«មុនដំបូងខ្ញុំអត់ដឹងទេ ខ្ញុំសូមនិយាយត្រង់ ដំបូងនៅខាងមុខនេះ(អគារស្នាក់របស់អត្តពលិកជនពិការ)ខ្ញុំស្មានថាជាឃ្លាំង ផ្ទះដែលមានស័ង្កសី និងឈើពីមុខនេះ។ ពេលសួរគាត់(លោក យី វាសនា)ទៅ លោកថា មានកីឡាករកីឡាការិនីរបស់យើងស្នាក់នៅក្នុងហ្នឹង តែដោយសារកូវីដយើងបានឲ្យគាត់ត្រឡប់ទៅវិញខ្លះ តែមិនក្រោមជាង២០នាក់នោះទេ»។
ការប្រកាសផ្តល់អគារនេះ ធ្វើឡើងពេល លោក ធ្វើជាអធិបតីក្នុងពិធីបិទការប្រកួតជើងឯកកីឡាបាល់ទះអង្គុយជនពិការ កាលពីថ្ងៃទី២៩ ខែកញ្ញា ឆ្នាំ២០២០។ បើតាមលោក យី វាសនា ការប្រកួតជើងឯកបាល់ទះអង្គុយជនពិការឆ្នាំនេះ មានក្រុមចំនួន៦បានចុះឈ្មោះចូលរួម តែពីរបានដកខ្លួនវិញ ដោយសារខ្វះថវិកាក្នុងការធ្វើដំណើរ។
លោក យី វាសនា អគ្គលេខាធិការនៃគណៈកម្មាធិការជាតិប៉ារ៉ាឡាំពិកកម្ពុជា, រូបភាពពី Cambodia SEA Games 2023
ក្រោយឆ្លងកាត់ការប្រកួតយ៉ាងស្វិតស្វាញចន្លោះពីថ្ងៃទី២៥-២៩ ខែកញ្ញា នៅទីលានបាល់ទះអង្គុយក្នុងមជ្ឈមណ្ឌលជាតិនៃជនពិការតេជោសែន ក្រុមតេជៈ សន្តិភាពទទួលបានចំណាត់ថ្នាក់លេខ១ រីឯត្នោតជ័យកំពង់ស្ពឺបានលេខ២ ខណៈក្រុមម្ចាស់ផ្ទះមជ្ឈមណ្ឌលជាតិនៃជនពិការតេជោសែន ទទួលបានចំណាត់ថ្នាក់លេខ៣។ លោក ស សុខា បានឧបត្ថម្ភក្រុមនីមួយៗដែលចូលរួមការប្រកួតនៅឆ្នាំនេះចំនួន២០០ដុល្លារ និងគណៈកម្មការរៀបចំការប្រកួតចំនួន៤០០ដុល្លារ៕