ជាតិ
រមណីយដ្ឋានត្រីមាសនៅត្រាំកក់ព័ទ្ធជុំវិញដោយភ្នំ មានដំណាំហូបផ្លែ និងមានការកម្សាន្តជាច្រើន
× រមណីយដ្ឋានទេសចរណ៍កែច្នៃ ថ្មីសន្លាងមួយបានលេចខ្លួនឡើងក្នុងធម្មជាតិ ហ៊ុមព័ទ្ធទៅដោយទេសភាពជួរភ្នំ ដ៏ស្រស់ស្អាត។ រមណីយដ្ឋានត្រីមាស ដី ស្រុក ត្រាំកក់ ខេត្តតាកែវ ចម្ងាយប្រមាណ ៩៩គីឡូម៉ែត្រ ពីរាជធានីភ្នំពេញ ទើបបើកដំណើរការកាលពីខែសីហាកន្លងទៅ។ នៅទីនេះ ទេសចរអាចគយគន់ទេសភាពជួរភ្នំ ជិះទូកកម្សាន្ត ផ្តល់ចំណីត្រី និងអាចទិញ ដំណាំហូបផ្លែ ដែលដាំដុះនៅក្នុងរមណីយដ្ឋានកែច្នៃមួយនេះ។
រមណីយដ្ឋានត្រីមាស ជាគឺរមណីដ្ឋានកែច្នៃថ្មីមួយ ដែលមានទីតាំងនៅស្រុកត្រាំកក់ ខេត្តតាកែវ។ ទើបតែបើកដំណើរការនៅក្នុងខែសីហា ប៉ុន្តែរមណីដ្ឋានកែច្នៃ ដែលមានធម្មជាតិជុំវិញអំណោយផលនេះ បានទទួលការគាំទ្រពីទេសចរ ក្នុងស្រុកបណ្តើរៗហើយ។
ចំការផ្កាឈូករ័ត្នក្នុង រមណីយដ្ឋានត្រីមាស
លោក មាស ចាន់ថេង អ្នកគ្រប់គ្រងរមណីយដ្ឋានត្រីមាស បានប្រាប់សារព័ត៌មាន ThmeyThmey25 ថា ទេសចរ អាចទទួលបានឃើញនូវការកម្សាន្តចម្រុះ នៅរមណីយដ្ឋានកែច្នៃនេះ ដែលមានទាំងបែបធម្មជាតិផង ការកែច្នៃផង និងបែបកសិទេសចរណ៍ផង។ បើតាមអ្នកគ្រប់គ្រងរូបនេះ ក្រៅតែពីសម្រស់នៃធម្មជាតិ នៅក្បែរជើងភ្នំដ៏ស្រស់ត្រកាលហើយនោះ ស្រះទឹកដ៏ធំហំមួយ ដែលត្រូវបានកែច្នៃឡើង ដែលមិនត្រឹមតែអនុញ្ញាឲ្យអ្នកទេសចរ បានជិះទូកកៃយ៉ាក ឬទូកទាកម្សាន្តតែមួយមុខទេ ពួកគេក៏អាចគយគន់ត្រីរាប់ពាន់ក្បាលនៅក្នុងស្រះនោះ និងផ្តល់ចំណីទៅឲ្យពពួកត្រីបានផងដែរ។
លោក មាស ចាន់ថេង បន្ថែមដូច្នេះថា៖«ចំណុចទាក់ទាញនៃរមណីយដ្ឋាននេះ គឺដោយសារមានភ្នំព័ទ្ធជុំវិញ មានដំណាំហូបផ្លែ មានការកម្សាន្តជាច្រើន ដូចជាការមើលត្រី ឲ្យចំណីត្រី និងមានខ្យល់អាកាសបរិសុទ្ធ»។
ត្រីជាច្រើនប្រភេទ ដែលចិញ្ចឹមសម្រាប់ភ្ញៀវទស្សនាក្នុង រមណីយដ្ឋានត្រីមាស
សួនផ្កាឈូករ័ត្ន ក៏ជាកត្តាទាក់ទាញទេសចរមួយដែរ ក្នុងរមណីយដ្ឋានត្រីមាសដែរ។ នេះបើតាមការបន្ថែមរបស់លោក មាស ចាន់ថេងដោយលោកបានបន្តទៀតថា ទេសចរអាចទិញ និងបរិភោគផ្លែឈើជាច្រើនប្រភេទ ដែលត្រូវបានដាំដុះនៅក្នុង រមណីយដ្ឋានត្រីមាសនេះដែរ ដូចជា ផ្លែមៀន មៀនប៉ៃលិន ឬតាង៉ែន និងទុរេនជាដើម។ រមណីយដ្ឋានត្រីមាសក៏មានរៀបចំកន្លែងអង្គុយ និងសម្រាកលម្ហែ ទទួលទានអាហារសម្រាប់ទេសចរផងដែរ៕
ភោជនីយដ្ឋាន ក្នុងរមណីយដ្ឋានត្រីមាស
រូបភាពពីទំព័រហ្វេសប៊ុករមណីយដ្ឋានត្រីមាស
Tag:
តាកែវ
ទេសចរណ៍
ThmeyThmey25
© រក្សាសិទ្ធិដោយ thmeythmey.com