ផ្តិតរូបភាពត្រកាលនៅសួនផ្កាពណ៌លឿងដ៏ធំនៅស្រុកគូលែន ខេត្តព្រះវិហារ

ជាតិ

ផ្តិតរូបភាពត្រកាលនៅសួនផ្កាពណ៌លឿងដ៏ធំនៅស្រុកគូលែន ខេត្តព្រះវិហារ

05, Oct 2020 , 8:59 am

រូបភាព

ដោយ:

សួនផ្កាពណ៌លឿងដ៏ធំនៅព្រះវិហារ កំពុងទាក់ទាញអ្នកទេសចរទៅថតរូបកម្សាន្ត។ សួនផ្កានេះ មានទំហំ១២ហិកតា ស្ថិតក្នុងស្រុកគូលែន ខេត្តព្រះវិហារ។ ទេសចរ ដែលចូលទៅទស្សនា និងថតរូបនៅក្នុងសួនផ្កាលឿងនេះ ត្រូវចំណាយថ្លៃសំបុត្រចូល៣ពាន់រៀលក្នុង១នាក់។

សួនផ្កាលឿង ជាឈ្មោះទីតាំងចម្ការសាំងហ៊ីន ដ៏ធំមួយលាតសន្ធឹងលើផ្ទៃដី១២ហិកតា មានទីតាំងនៅឃុំស្រយ៉ង់ ស្រុកគូលែន ខេត្តព្រះវិហារ។ សួនផ្កាលឿងនេះ បានទាក់ទាញចំណាប់អារម្មណ៍អ្នកទេសចរ ដែលធ្វើដំណើរឆ្លងកាត់ ឲ្យចូលចតដើម្បីគយគន់ សម្រស់ផ្កាលឿងរីកស្គុសស្គាយ ដ៏ស្រស់ស្អាត។ ក្រៅពីអ្នកទេសចរ ដែលស្កាត់ទៅថតរូប សួនផ្កាដ៏ល្វឹងល្វើយនេះ ក៏បានទាក់ទាញចំណាយរបស់គូស្នេហ៍មិនតិចទេ ឲ្យទៅថតរូបមុនអាពាហ៌ពិពាហ៌របស់ខ្លួន។

។ អ្នកស្រី ភិន ម៉ារ៉ា ម្ចាស់សួនផ្កាលឿង បានប្រាប់សារព័ត៌មាន ThmeyThmey25 ថា មូលហេតុដែលអ្នកស្រីដាំសួនផ្កាលឿងនេះ ព្រោះអ្នកស្រីជាអ្នកស្រលាញ់ផ្កា ហើយអ្នកស្រី អះអាងថា ផ្កាសាំងហ៊ីននេះ ងាយដាំ មិនពិបាកថែ ហើយសម្រស់ផ្ការបស់វា ក៏ខុសប្លែកពីផ្កាដទៃដែរ។ ម្យ៉ាងទៀត អ្នកស្រីមានដីដែលអំណោយផលសម្រាប់ផ្កាលឿងនេះ ហើយវាក៏ស្ថិតក្នុងភូមិសាស្ត្រអំណោយផលរវាងខេត្តទេសចរណសៀមរាប និងព្រះវិហារផង។

តាមអ្នកស្រី ភិន ម៉ារ៉ា ផ្កាសាន់ហ៊ីននេះ ដាំតែ ៤០ថ្ងៃក៏បញ្ចេញផ្កាដ៏ស្រស់ស្អាតមកហើយ ហើយផ្កាវានៅរីកស្គុសស្គាយបន្តបន្ទាប់គ្នា ប្រមាណ១ខែកន្លះ ទើបរោយទៅវិញ។

ដើម្បីចូលទស្សនា និងថតរូបកម្សាន្តនៅសួនផ្កាលឿង ទេសចរត្រូវទិញសំបុត្រ ដែលមានតម្លៃ៣ពាន់រៀល ក្នុងសំបុត្រមួយសន្លឹក។ ជាធម្មតា ចម្ការផ្កានេះ ទាក់ទាញបានទេសចរប្រមាណ២០០នាក់ក្នុងមួយថ្ងៃ ខណៈថ្ងៃបុណ្យទានធំៗ អាចទទួលបានទេសចរបានច្រើនជាង១ពាន់នាក់ឯណោះ។ អ្នកស្រី ភិន ម៉ារ៉ា បានថ្លែងដូច្នេះថា៖«កាលថ្ងៃភ្ជុំ មានទេសចរ ចន្លោះពី ១ ៣០០នាក់ ទៅ១ ៥០០នាក់។ បើថ្ងៃធម្មតា ទទួលបានទេសចរ ប្រហែល២០០នាក់ប៉ុណ្ណឹង»៕