លីគ២៖ ការប្រកួតសប្តាហ៍ទី១ក្រុមទាំងអស់មានការស៊ុតបញ្ចូលទីគ្នាចំនួន៣០គ្រាប់

កីឡាជាតិ

ជាតិ

លីគ២៖ ការប្រកួតសប្តាហ៍ទី១ក្រុមទាំងអស់មានការស៊ុតបញ្ចូលទីគ្នាចំនួន៣០គ្រាប់

04, Oct 2020 , 4:39 pm

រូបភាព

ដោយ:

ការប្រកួតបាល់ទាត់ក្របខណ្ឌលីគលំដាប់ទី២ឆ្នាំ២០២០(Cambodian League 2)ក្នុងសប្តាហ៍បើកឆាក ក្រុមទាំងអស់មានការស៊ុតបញ្ចូលទីគ្នារហូត៣០គ្រាប់។ ក្នុងចំណោមការប្រកួតទាំង៥គូ ជំនួបរវាងសមាគមកីឡាបាល់ទាត់ខេត្តព្រៃវែងជាមួយឬទ្ធី មានការស៊ុតបញ្ចូលទីគ្នាច្រើនជាងគេ។

ការប្រកួតបាល់ទាត់ដណ្តើមពានរង្វាន់លីគលំដាប់ទី២បានប្រកួតបើករដូវកាលរបស់ខ្លួន កាលពីថ្ងៃទី៣ ខែតុលា ឆ្នាំ២០២០។ គ្រាប់បាល់ចំនួន៣០គ្រាប់ត្រូវបានក្រុមទាំងអស់ស៊ុតបញ្ចូលទីគ្នាទៅវិញទៅមក នាជំនួបសប្តាហ៍ទី១ ដែលមានការប្រកួតចំនួន៥គូ។ នាជំនួបនៅកីឡដ្ឋានខេត្តព្រៃវែង ក្រុមម្ចាស់ផ្ទះសមាគមបាល់ទាត់ខេត្តព្រៃវែង បានលត់ក្រុមភ្ញៀវឬទ្ធីសែនក្នុងលទ្ធផល ១១-២ នាំឲ្យការប្រកួតនេះក្លាយជំនួប ដែលមានការស៊ុតបញ្ចូលទីគ្នាច្រើនជាងគេប្រចាំសប្តាហ៍បើកឆាក។

ចំណែកជំនួបនៅកីឡដ្ឋាន TBC ក្រុម Tiffy Army អាយុក្រោម២១ឆ្នាំ បានយកឈ្នះក្រុមមន្ទីរអប់រំយុវជននិងកីឡាខេត្តស្វាយរៀងក្នុងលទ្ធផល ៦-៥ ដែលនាំឲ្យការប្រកួតនេះមានការស៊ុតបាល់បញ្ចូលទីច្រើនលំដាប់ទីពីរ។ ខណៈជំនួបភ្នំពេញក្រោនយកឈ្នះមន្ទីរអប់រំយុវជននិងកីឡាខេត្តត្បូងឃ្មុំ ៤-០ ជាការប្រកួតមានការស៊ុតបញ្ចូលទីច្រើនជាងគេលំដាប់ទី៣។

ដោយឡែកការប្រកួតនៅទីលានវិទ្យាល័យវត្តកោះ ក្រុមកោះកុង អែហ្វស៊ី បានយកឈ្នះមន្ទីរ អ.យ.ក ខេត្តកំពង់ស្ពឺក្នុងលទ្ធផល ១-០ ស្របពេលក្រុម ISI ដង្កោសែនជ័យយកឈ្នះក្រុមសៀមរាបអែហ្វស៊ីក្នុងលទ្ធផល ១-០ ដូចគ្នា។

ការប្រកួតសប្តាហ៍ទី២ធ្វើឡើងនៅថ្ងៃទី១០ ខែតុលា ឆ្នាំ២០២០ ក្នុងនោះក្រុមមន្ទីរ អ.យ.ក ខេត្តស្វាយរៀងបើកទ្វារកីឡដ្ឋាន TBC ស្វាគមន៍មន្ទីរ អ.យ.ក ខេត្តកំពង់ស្ពឺ រីឯសមាគមបាល់ទាត់ខេត្តព្រៃវែងប៉ះកោះកុងអែហ្វស៊ីនៅកីឡដ្ឋានខេត្តព្រៃវែង។ ជាមួយគ្នាទីលាន KMH ក្លាយជាទីតាំងកាត់សេចក្តីរវាងក្រុម ISI ដង្កោសែនជ័យជាមួយយុវជនភ្នំពេញក្រោន ស្របពេលក្រុមសៀមរាបអែហ្វស៊ីទទួលក្រុមឬទ្ធីសែន ខណៈមន្ទីរ អ.យ.ក ខេត្តត្បូងឃ្មុំតទល់ជាមួយ Tiffy Army អាយុក្រោម២១ឆ្នាំ៕