អន្តរជាតិ
សិង្ហបុរី ចង់សហការជាមួយចិនដើម្បីការពារនិងគ្រប់គ្រងវិបត្តិដែលអាចរីករាលក្នុងតំបន់
×
តាមរយៈកិច្ចសម្ភាសន៍ស្តីពីខួបទំនាក់ទំនងសិង្ហបុរី-ចិន ៣០ឆ្នាំ ឧបនាយករដ្ឋមន្ត្រី និងជារដ្ឋមន្ត្រីហិរញ្ញវត្ថុសិង្ហបុរី លោក Heng Swee Keat បានលើកឡើងថា កិច្ចការបន្ទាន់ និងចាំំបាច់បំផុតសម្រាប់ប្រទេសទាំងពីរក្នុងទសវត្សរ៍ទី៤ នៃទំនាក់ទំនង គឺធ្វើការជាមួយគ្នាក្នុងការពង្រឹង និងគ្រប់គ្រងបញ្ហាដែលមានចរិកលក្ខណៈរាលដាល។ នេះបើយោងតាមការចុះផ្សាយរបស់សារព័ត៌មាន Strait Times នៅថ្ងៃទី២ ខែតុលាកន្លងទៅ។
សម្រាប់លោកឧបនាយករដ្ឋមន្ត្រី ប្រទេសទាំងពីរ មានលទ្ធភាព និងឱកាសច្រើនក្នុងការធ្វើកិច្ចសហប្រតិបត្តិការជាមួយគ្នាច្រើនវិស័យរាប់បញ្ចូលទាំងការលើកកម្ពស់ប្រព័ន្ធពាណិជ្ជកម្មពហុភាគី, ហិរញ្ញវត្ថុ និងបច្ចេកវិទ្យាជាដើម។ ក៏ប៉ុន្តែលោក អះអាងថា សកម្មភាពសេដ្ឋកិច្ច និងសង្គម នឹងអាចកើតឡើងក្រោយនោះទេ បន្ទាប់កិច្ចការការពារ និងទប់ស្កាត់បញ្ហារាលដាល ត្រូវបានធានាហើយនោះ។
លោកឧបនាយករដ្ឋមន្ត្រី បានរំលេចវិបត្តិហិរញ្ញវត្ថុអាស៊ី និងវិបត្តិហិរញ្ញវត្ថុសកលឆ្នាំ២០០៨ ជាមេរៀន និងបទពិសោធ ក្នុងការរៀបចំកិច្ចសហប្រតិបត្តិការធានាពីស្ថិរភាពសេដ្ឋកិច្ច និងកំណើន មិនឲ្យជាន់ដានប្រវត្តិសាស្ត្រឡើងវិញ។
លោក បានផ្តល់ជាឧទាហរណ៍ពាក់ព័ន្ធគម្រោងហេដ្ឋារចនាសម្ព័ន្ធ ក្រោមគំនិតផ្តួចផ្តើមផ្លូវ និងខ្សែក្រវ៉ាត់ចិន ដែលអាស៊ីត្រូវការប្រមាណ ១.៧ ទ្រីលានដុល្លារ ជារៀងរាល់ឆ្នាំសម្រាប់អភិវឌ្ឍន៍ហេដ្ឋារចនាសម្ព័ន្ធ។ រីឯធនាគារអភិវឌ្ឍន៍អាស៊ីវិញ ក៏បានបង្ហាញឲ្យដឹងផងដែរថា អាស៊ី នឹងត្រូវការថវិកា ១.៧ ទ្រីលាន ក្នុងមួយឆ្នាំ ក្នុងការអភិវឌ្ឍហេដ្ឋារចនាសម្ព័ន្ធរហូតដល់ឆ្នាំ២០៣០ ដើម្បីរក្សាពីកំណើន ដោះស្រាយភាពក្រីក្រ និងឆ្លើយតបនឹងការបម្រែបម្រួលអាកាសធាតុ។
ត្រង់ចំណុចនេះ លោក ព្រមានថា ទន្ទឹមនឹងគម្រោងអភិវឌ្ឍន៍ ដែលបានតាមរយៈកម្ចីខាងលើ ក៏មានហានិភ័យផងដែរ ប្រសិនបើគម្រោងនោះ មិនមានលក្ខណៈសមរម្យ ឬមានប្រព័ន្ធហិរញ្ញវត្ថុ មិនរឹងមាំ។ ចំណុចនេះហើយ ដែលលោក ចង់ឃើញ សិង្ហបុរី និងចិន ដែលសុទ្ធសឹងតែជាប្រទេសមានសេដ្ឋកិច្ចលូតលាស់ក្នុងតំបន់ ធ្វើការជាមួយនឹងអង្គការដូចជា ធនាគារពិភពលោក ធនាគារអភិវឌ្ឍអាស៊ី និងធនាគារវិនិយោគហេដ្ឋារចនាសម្ព័ន្ធអាស៊ី ដើម្បីបណ្តុះបណ្តាលមន្ត្រី និងធ្វើកិច្ចសហប្រតិបត្តិការជាមួយនឹងអ្នកធនាគារ អ្នកវិនិយោគ ដើម្បីបង្កើតយន្តការមួយល្អប្រសើរសម្រាប់គ្រប់គ្រងលំហូរមូលនិធិ៕
© រក្សាសិទ្ធិដោយ thmeythmey.com