យុវសិស្ស សុខ លីហួរ យល់ថា ទិវាគ្រូបង្រៀនជាថ្ងៃដែលសិស្សានុសិស្សទាំងអស់ត្រូវយល់ដឹងពីគុណតម្លៃរបស់គ្រូដែលបានបង្រៀនដល់សិស្សានុសិស្ស។ យុវសិស្សរូបនេះបានរៀបរាប់ដូច្នេះថា៖«សម្រាប់ខ្ញុំអ្នកគ្រូលោកគ្រូ ពិតជាមានគុណតម្លៃខ្លាំងមែនទែន ដោយសារលោកគ្រូអ្នកគ្រូ គាត់ប្រៀបបានដូចជាឪពុកម្តាយទី២របស់យើង ដែលបានបង្រៀនយើងនៅក្នុងសាលា ហើយម៉ាក់ប៉ាយើងបង្រៀនយើងនៅផ្ទះ។ គាត់មិនត្រឹមតែបង្រៀនយើងឲ្យចេះពីមុខវិជ្ជារៀនសូត្រធម្មតាទេ គាត់ថែមទាំងបង្រៀនពីក្រមសីលធម៌ ជាមួយនឹងជីវិតរស់នៅផ្សេងៗទៀតផងដែរ»។
ចំពោះយុវសិស្ស រស់ សិរិវណ្ណ ក៏យល់ថា គ្រូបង្រៀនជាបុគ្គលដល់សំខាន់ដែលផ្តល់គំរូល្អៗសម្រាប់ឲ្យសិស្សានុសិស្សអនុវត្តតាម។ បើតាមយុវសិស្ស សិរិវណ្ណ តាំងពីរៀនថ្នាក់ទី១រហូតដល់ថ្នាក់ទី១២នេះមក គឺចងចាំនូវអនុស្សាវរីយ៍ច្រើនជាមួយនឹងគ្រូ ។ យុវសិស្ស សិរិវណ្ណ បានរៀបរាប់ដូច្នេះថា៖«គុណតម្លៃរបស់គ្រូ ពិតជាមានតម្លៃសម្រាប់សិស្សគ្រប់រូប។ គាត់ខិតខំបង្រៀនដោយចំណេះវិជ្ជារបស់គាត់ទាំងប៉ុន្មានផ្តល់ឲ្យសិស្សគ្រប់គ្នា។ អ៊ីចឹងយើងត្រូវតបស្នងគាត់វិញដោយខិតខំរៀនសូត្រ ដើម្បីយកចំណេះដឹងទៅអភិវឌ្ឍដល់មនុស្សជំនាន់ក្រោយ»។
ចំណែកយុវសិស្ស ស៊ឹម ចាន់កត្តវេតា ក៏មានអនុស្សាវរីយ៍ច្រើនជាមួយនឹងលោកគ្រូអ្នកគ្រូដែលមិនអាចនឹងបំភ្លេចបានផងដែរ។ យុវសិស្សរូបនេះបាននិយាយថា៖«មានគ្រប់សព្វ សប្បាយក៏មាន អនុស្សាវរីយ៍គឺមានច្រើន ទាំងជូរចត់ និងសប្បាយ។ ខ្ញុំចូលចិត្តគ្រូៗស្មើៗគ្នា ដោយសារគាត់បង្រៀនយើងស្មើៗគ្នា អត់មានគ្រូណាស្រឡាញ់លើសគ្រូណាឡើយ»។
ដើម្បីតបស្នងគុណគ្រូយុវសិស្សទាំងនេះនឹងព្យាយាមខិតខំ ប្រុងប្រែងរៀនសូត្រឲ្យទទួលបាននិទ្ទេសល្អនាថ្ងៃប្រឡងបាក់ឌុបនៅថ្ងៃទី២០ ខែធ្នូ ខាងមុខនេះ។ លើសពីនេះ យុវសិស្សទាំងនេះនឹងបង្ហាញក្តីស្រឡាញ់ទៅគ្រូតាមរយៈការផ្តល់ជាកាដូបន្តិចបន្តួច និងថតរូបអនុស្សាវរីយ៍ជាមួយគ្រូដោយនិយាយពាក្យអរគុណទៅគ្រូរបស់ពួកគេនាទិវាគ្រូបង្រៀន។
សកម្មភាពសិស្សនៅសាលាជំនាន់ថ្មីនៃវិទ្យាល័យព្រះស៊ីសុវត្ថិកំពុងរៀនជាមួយគ្រូនៅក្នុងថ្នាក់រៀន
ទិវាគ្រូបង្រៀននៅថ្ងៃទី៥ ខែតុលាខាងមុខនេះ នឹងប្រព្រឹត្តទៅក្រោមប្រធានបទស្តីពី«គ្រូបង្រៀនឆ្លាតវៃ ដើម្បីការអប់រំឌីជីថល» នៅឯវិទ្យាស្ថានជាតិអប់រំ។ នាថ្ងៃនោះក្រសួងអប់រំនឹងពិភាក្សាលើប្រធានបទចំនួន២ ដោយប្រធានបទទី១និយាយអំពី«ដំណើរការបើកសាលារៀនចំណេះដឹងទូទៅឡើងវិញ និងការអប់រំឌីជីថល» និងប្រធានបទទី២ «ការបង្រៀន និងការរៀនតាមប្រព័ន្ធបច្ចេកវិទ្យានៅគ្រឹះស្ថានឧត្តមសិក្សា។
បើតាមក្រសួងអប់រំ ការប្រារព្ធទិវាគ្រូបង្រៀននេះ ក្នុងគោលបំណងឲ្យសិស្ស និងនិស្សិតរំលឹកគុណូបការៈដ៏ថ្លៃថ្លារបស់គ្រូបង្រៀន ដែលធ្លាប់បានបង្រៀន និងបណ្តុះបណ្តាលធនធានមនុស្ស សម្រាប់ការពារ កសាង និងអភិវឌ្ឍមាតុភូមិលើគ្រប់វិស័យ។
សូមរំលឹកថា ទិវាគ្រូបង្រៀននៅកម្ពុជា ត្រូវបានប្រារព្ធឡើងតាំងពីឆ្នាំ១៩៩៧ ដោយឆ្នាំនេះជាខួបលើកទី២៣ឆ្នាំហើយ៕