COVID-19
អន្តរជាតិ
លោក វីដូដូ ការពារវិធានការប្រឆាំង COVID-19 ក្រោយត្រូវរិះគន់ថា គិតសេដ្ឋកិច្ចជាងបញ្ហាសុខភាព ប្រធានាធិបតីឥណ្ឌូណេស៊ី ចូកូ វីដូដូ សួរសុខទុក្ខប្រជាជននាពេលកន្លងមក។ រូបភាព AFP
×
ដោយ៖កង ម៉េងហុង
ប្រធានាធិបតីឥណ្ឌូណេស៊ីលោក ចូកូ វីដូដូ បាននិយាយការពារវិធានការរបស់រដ្ឋាភិបាលរបស់លោកក្នុងការទប់ទល់ការរាលដាលជំងឺ COVID-19 ។ វិធានការរបស់លោក ត្រូវបានរិះគន់ថា គិតគូររឿងសេដ្ឋកិច្ចជាងសុខភាពប្រជាជន។ លោក វីដូដូ ស្នើឲ្យប្រជាជនរួមគ្នាជាជាងធ្វើអ្វីដែលរំជើបរំជួល។
ឥណ្ឌូណេស៊ី ជាប្រទេសមានករណីឆ្លង COVID-19 ច្រើនជាងគេនៅអាស៊ីអាគ្នេយ៍។ គិតត្រឹមថ្ងៃទី៤ ខែតុលា ឥណ្ឌូណេស៊ី មានករណីឆ្លងសរុបជាង៣០ម៉ឺននាក់ និងស្លាប់១១ពាន់នាក់។ រដ្ឋាភិបាលប្រធានាធិបតី ចូកូ វីដូដូ មិនបានចាត់វិធានការតឹងរ៉ឹងខ្លាំងដើម្បីទប់ស្កាត់ការរាលដាលឡើយ ហើយក៏មិនបានបិទក្រុង ឬទីតាំងដែលមានករណីឆ្លងច្រើនដែរ។
ទាក់ទិននឹងបញ្ហានេះ ប្រធានាធិបតីឥណ្ឌូណេស៊ីដែលគេស្គាល់តាមឈ្មោះដ៏មានប្រជាប្រិយ លោក ចូកូវី បានថ្លែងការពារការសម្រេចចិត្តរបស់លោកដែលមិនឲ្យមានការបិទទូទាំងខេត្ត ឬនៅតាមទីប្រជុំជន ជាកន្លែងដែលករណីឆ្លងនៅតែបន្តកើនឡើង។ លោកអះអាងថា វានឹងធ្វើឱ្យប៉ះពាល់ដល់ជីវភាពរស់នៅរបស់ប្រជាជន។
«ការផ្តល់អាទិភាពដល់បញ្ហាសុខភាពមិនមែនមានន័យថា យើងកំពុងលះបង់សេដ្ឋកិច្ចនោះទេ ព្រោះការលះបង់សេដ្ឋកិច្ច ស្មើនឹងការលះបង់ជីវិតមនុស្សរាប់សិបលាននាក់។ ការយកឈ្នះលើរោគរាតត្បាតជារឿងពិបាកដែលវាទាមទារអោយយើងធ្វើការរួមគ្នា ប៉ុន្តែខ្ញុំប្រាកដថា យើងអាចធ្វើវាបាន។» នេះជាការលើកឡើងរបស់លោក ចូកូវី ក្នុងសុន្ទរកថាដែលផ្សាយការិយាល័យលោក។ លោកបន្តថា អ្វីដែលសំខាន់បំផុតនៅក្នុងស្ថានភាពនេះ គឺមិនគួរវាយប្រហារគ្នា ហើយក៏មិនគួរមានភាពច្របូកច្របល់ដែរ។
លោកប្រធានាធិបតីក៏បានសន្យាបញ្ជាឱ្យរដ្ឋមន្ត្រីរបស់លោកធ្វើឲ្យប្រសើរឡើងការឆ្លើយតបរបស់ពួកគេចំពោះវិបត្តិនេះហើយបានជំរុញឲ្យប្រជាជនតវ៉ាពេលមានបញ្ហា ឬផ្តល់យោបល់ដល់រដ្ឋាភិបាលផងដែរ។
អ្នកជំនាញសុខភាពសាធារណៈមួយចំនួន បានរិះគន់រដ្ឋាភិបាលចំពោះការផ្តល់អាទិភាពដល់សេដ្ឋកិច្ចជាជាងបញ្ហាសុខភាពសាធារណៈ។ ថ្មីៗនេះក្រសួងសុខាភិបាលឥណ្ឌូណេស៊ី ក៏រងការរិះគន់យ៉ាងខ្លាំងពីក្រុមអ្នកស្ម័គ្រចិត្ត និងនៅលើប្រព័ន្ធផ្សព្វផ្សាយសង្គមលើអ្វីដែលពួកគេយល់ថា ជាការចំណាយមិនគ្រប់គ្រាន់ដើម្បីទប់ស្កាត់ជំងឺរាតត្បាត ការការពារមិនគ្រប់គ្រាន់សម្រាប់បុគ្គលិកសុខាភិបាល និងតម្លៃខ្ពស់សម្រាប់ការធ្វើតេស្តរកមេរោគនៅតាមមន្ទីរពេទ្យឯកជន៕
Tag:
ឥណ្ឌូណេស៊ី
COVID-19
ចូកូ វីដូដូ
© រក្សាសិទ្ធិដោយ thmeythmey.com