ប្រមុខការទូតអាមេរិក សុំការយោគយល់ពីកូរ៉េខាងត្បូងក្រោយលុបចោលគម្រោងទស្សនកិច្ច

COVID-19

អន្តរជាតិ

ប្រមុខការទូតអាមេរិក សុំការយោគយល់ពីកូរ៉េខាងត្បូងក្រោយលុបចោលគម្រោងទស្សនកិច្ច

05, Oct 2020 , 10:39 pm

រូបភាព

ប្រមុខការទូតអាមេរិក លោកម៉ៃ ប៉ុមប៉េអូ។ រូបភាព៖ Reuters

ដោយ: ធៀន ភារិន្ទ

ប្រមុខការទូតអាមេរិក លោក ម៉ៃ ប៉ុមប៉េអូ បានស្នើឲ្យសមភាគីកូរ៉េខាងត្បូង លោកស្រី Kang Kyung-wha យោគយល់ពីការលុបចោលដំណើរទស្សនកិច្ចមកកូរ៉េខាងត្បូង។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap នៅថ្ងៃទី៥ ខែតុលា។

អត្ថបទទាក់ទង

លោក ប៉ុមប៉េអូ ទៅអាស៊ីខាងកើតសប្តាហ៍ក្រោយ, បញ្ហាចិន និងកូរ៉េខាងជើងជារបៀបវារៈសំខាន់

បន្ទាប់ពីប្រធានាធិបតីអាមេរិក លោក ដូណាល់ ត្រាំមានផ្ទុក COVID-19 ទស្សនកិច្ចរបស់ប្រមុខការទូតអាមេរិក លោកម៉ៃ ប៉ុមប៉េអូ មកអាស៊ីខាងកើតក៏ត្រូវកាត់បន្ថយដែរ។ ក្នុងសេចក្តីប្រកាសនាពេលថ្មីៗនេះ លោក ប៉ុមប៉េអូ នឹងមកទស្សនកិច្ចតែជប៉ុនប៉ុណ្ណោះ និងចូលរួមក្នុងកិច្ចប្រជុំសន្ទនាសន្តិសុខ៤ភាគី តែគម្រោងទៅម៉ុងហ្គោលី និងកូរ៉េខាងត្បូង ត្រូវលុបចោល។

ប្រមុខការទូតអាមេរិក ក៏បានសុំឲ្យកូរ៉េខាងត្បូងយោគយល់ពីចំពោះការមិនបានទៅទស្សនកិច្ចនៅទីក្រុងសេអ៊ូលលើកនេះ។ បើតាមក្រសួងការបរទេសកូរ៉េខាងត្បូង រដ្ឋមន្ត្រីការបរទេសអាមេរិក លោកប៉ុមប៉េអូ បានពន្យល់ថា ដំណើរទស្សនកិច្ច ដែលគ្រោងធ្វើនៅសប្តាហ៍នេះ ត្រូវបានពន្យារដោយសារភាគីអាមេរិក មានបញ្ហាមិនអាចបញ្ចៀសបាន និងស្នើឲ្យភាគីកូរ៉េខាងត្បូងយោគយល់។

ជាការឆ្លើយតប រដ្ឋមន្ត្រីការបរទេសកូរ៉េខាងត្បូង លោកស្រីKang Kyung-wha បានយោគយល់ពីបញ្ហានេះ និងជូនពរឲ្យលោកប្រធានាធិបតីជាសះស្បើយពី COVID-19 ក្នុងពេលឆាប់ៗនេះ។

សូមបញ្ជាក់ថា ក្រសួងការបរទេសអាមេរិក នៅថ្ងៃទី២៩ ខែកញ្ញា បានបញ្ជាក់ថា ប្រមុខការទូតអាមេរិក លោក ម៉ៃ ប៉ុមប៉េអូ នឹងទស្សនកិច្ចមកជប៉ុន កូរ៉េខាងត្បូង និងម៉ុងហ្គោលី ចាប់ពីថ្ងៃទី៤ ខែតុលា ដល់ថ្ងៃទី៨ខែតុលា៕