Boateng ដែល​បច្ចុប្បន្ន​ធ្លាក់​ទៅលេង​ឲ្យ​ក្លិប Monza ក្របខណ្ឌ Serie B របស់​អ៊ីតាលី បាន​បញ្ជាក់ថា គេ​បានចាត់ទុក​ការលេង​បាល់ទាត់​ដូចជា​គ្រឿង​កំដរ​ជីវិត ដោយមាន​ផ្តោតលើ​ការងារ​ចំ​ពេញលេញ​នោះឡើយ​។ «​ខ្ញុំ​នឹង​ត្រឡប់​ទៅវិញ ហើយ​និយាយថា ខ្ញុំ​មិនបាន​ចាត់ទុក​បាល់ទាត់​ដូចជា​ការងារ​នោះឡើយ​»​។​

 

Boateng ជា​អតីត Tottenham Hotspur, Portsmouth, AC Milan និង​ក្លិប​ជាច្រើន​ទៀត ក្នុងនោះ​ធ្លាប់​លេង​ជា​កីឡាករ​ខ្ចី​ជើង​នៅ Borussia Dortmund និង Barcelona​។ កាលពី​រដូវ​កាល​មុន Boateng លេង​ឲ្យ Fiorentina និង​ខ្ចី​ជើង​នៅ Besiktas មុនពេល​ផ្ទេរ​ទៅកាន់ Monza​។​

 

​ក្នុង​បទ​សម្ភាស Boateng បានការ​ពារ​នូវ​អ្វីដែល​ខ្លួន​បាន​និយាយថា​៖ «​ខ្ញុំ​មិនមែន​ឡប់​ឆ្កួត​នោះឡើយ ខ្ញុំ​មាន​ទេពកោសល្យ​។ ខ្ញុំ​ហ្វឹកហាត់​បន្តិចបន្តួច ពោលគឺ​មួយ​ម៉ោង​នៅលើ​ទីលាន​។ ខ្ញុំ​ទៅដល់​យឺត​ជាងគេ ហើយ​ចេញ​លឿន​ជាងគេ បន្ទាប់មក​ទៅ​ដើរលេង​ជាមួយ​មិត្តភក្តិ​»​។​

 

​វ័យ​៣៣​ឆ្នាំ Boateng ដែល​ធ្លាប់​លេង​ឲ្យ​យុវជន​ជម្រើសជាតិ​អាល្លឺម៉ង់ ហើយ​ទៅ​ចូលរួម​ក្នុង​ក្រុម​ជម្រើសជាតិ​ហ្គា​ណា​ចន្លោះ​ពី​ឆ្នាំ​២០១០ ដល់​ឆ្នាំ​២០១៤ បាន​អះអាងថា ខ្លួន​តែងតែ​ធ្វើ​គ្រប់បែបយ៉ាង​ដើម្បី​ភាពសប្បាយ​រីករាយ​ក្នុង​ជីវិត​។ «​ខ្ញុំ​មាន​លុយ ខ្ញុំ​រស់នៅ​ដូចជា​ស្តេច​។ ខ្ញុំ​បាន​ទិញ​រថយន្ត​៣​គ្រឿង​ក្នុងពេល​តែមួយ ខណៈដែល​ខ្ញុំ​លេង​ឲ្យ Spurs [២០០៧-២០០៩] ក្នុងនោះ​មាន Lamborghini, Hummer និង Cadillac»​។​

 

​ទោះបីជា​យ៉ាងណាក៏ដោយ Boateng បាន​អះអាង លុយ​មិនអាច​ទិញ​ភាពសប្បាយ​ចិត្តបាន​នោះឡើយ​។ «​សម្រាប់​យុវជន​ទាំងអស់ ខ្ញុំ​ចង់​ប្រាប់​ពួកគេ​ថា អ្នក​មិនអាច​ទិញ​ភាពសប្បាយ​បានឡើយ​។ ខ្ញុំ​អត់​បាន​លេង ខ្ញុំ​មាន​បញ្ហា​គ្រួសារ ខ្ញុំ​មិនជា​ប់​ក្នុង​ជម្រើស​ក្រុម​»​។​

 

​កីឡាករ​រូបនេះ បាន​បញ្ជាក់ថា គេ​បាន​ទិញ​រថយន្ត​បី​គ្រឿង ដោយ​រំពឹងថា មួយគ្រឿង​ធ្វើ​ឲ្យ​គេ​សប្បាយចិត្ត​មួយ​សប្តាហ៍ ហើយ​៣​គ្រឿង​សប្បាយចិត្ត​សម្រាប់​៣​សប្តាហ៍ ប៉ុន្តែ​នៅតែ​មិន​ដូច​បំណង​៕


 

 

​