កីឡាអន្តរជាតិ
អន្តរជាតិ
Evra ធុញទ្រាន់ការអត្ថាធិប្បាយជំនួប Man Utd រហូតស្នើបញ្ចប់កិច្ចសន្យានៅ Sky Sports
× Patrice Evra រងការប៉ះទង្គិចផ្លូវអារម្មណ៍យ៉ាងខ្លាំងដល់ថ្នាក់សុំលាឈប់ពីការងារជាអ្នកអត្ថាធិប្បាយទូរទស្សន៍ Sky Sport អំឡុងពេលផ្សាយផ្ទាល់ការប្រកួតដែលអតីតក្រុមខ្លួន Manchester United ចាញ់ Tottenham Hotspur យ៉ាងអាម៉ាស់ ៦-១។ Evra និយាយទាំងខឹងថា សមាជិកក្រុម Man Utd ទាំងអស់សមនឹងត្រូវកំផ្លៀង។
អតីតខ្សែការពារក្រុមបិសាចក្រហមរូបនេះ បានបង្ហាញពីការខឹងសម្បារយ៉ាងខ្លាំងបន្ទាប់ទស្សនាទម្រង់ក្រុមចាស់របស់ខ្លួនលេងយ៉ាងតឹងទ្រូង។ Evra ដែលលេងនៅ Old Trafford រយៈពេល៨រដូវកាលចាប់ផ្តើមនិយាយពី Alexis Sanchez។
«Sanchez ធ្លាប់និយាយថា នៅពេលគាត់ចុះកិច្ចសន្យាជាមួយ Man Utd អំឡុងពេលចូលហ្វឹកហាត់ដំបូងគាត់បានស្នើសុំឲ្យភ្នាក់ងារបញ្ចប់កិច្ចសន្យារបស់គាត់នៅទីនេះ។ នោះជាអ្វីដែលខ្ញុំនឹងស្នើសុំទៅទូរទស្ស Sky ដែរ។ ខ្ញុំពិតជាចង់បញ្ចប់កិច្ចសន្យារបស់ខ្ញុំជាមួយ Sky។ ដោយសារតែនេះជាការប្រកួតទី២របស់ខ្ញុំ ដែលត្រូវធ្វើជាអ្នកអត្ថាធិប្បាយជាមួយក្រុម Man Utd ដែលខ្ញុំមិនចង់និយាយមិនចង់មើល ពីព្រោះនៅពេលអ្នកប្រាប់រឿងពិត វាអាចធ្វើឲ្យខ្ញុំឈឺចាប់ ខ្ញុំស្រឡាញ់ក្លិបរបស់ខ្ញុំ»។
Evra ថែមទាំងនិយាយថា ឥស្សរជនសំខាន់ៗរបស់ក្រុមបិសាចក្រហមទាំងនៅក្រៅ និងក្នុងទីលានសមនឹងត្រូវកំផ្លៀងណាស់ ក្រោយចាញ់ Spurs ដល់ទៅ ៦-១ នៅ Old Trafford។ រូបគេពិតជាខឹង និងធុញទ្រាន់នៅពេលអត្ថាធិប្បាយក្នុងជំនួបរបស់ Man Utd ណាស់ ដល់ថ្នាក់ចង់ហែកកិច្ចសន្យារបស់ខ្លួន ជាមួយ Sky Sports ចោលភ្លាមៗតែម្តង។
ក្នុងនាមជាអ្នកអត្ថាធិប្បាយដំបូងឲ្យ Sky Sports អតីតកីឡាករអន្តរជាតិបារាំងវ័យ ៣៩ ឆ្នាំរូបនេះ បានបង្ហាញខ្លួននៅពេលក្រុមលោក Ole Gunnar Solskjaer ចាញ់ក្រុម Crystal Crystal ៣-១ ក្នុងដីនាការប្រកួតបើកឆាកក្របខណ្ឌ Premier League។ កាលនោះ Evra បានរិះគន់អតីតក្រុមចាស់របស់ខ្លួននេះយ៉ាងចាស់ដៃជុំវិញការចរចាទិញកីឡាករចូលក្រុមទម្រាំបានមួយៗ។
Evra ថាឲ្យក្លិបយក្សអង់គ្លេសមួយនេះ រួមទាំងប្រធានក្លិបផង ទាក់ទងទិញកីឡាមានទេពកោសល្យស្ទើពេញអំឡុងទីផ្សារដោះដូររដូវកាលនេះ ប៉ុន្តែពួកគេនៅតែមិនទាន់យល់ព្រមលើកិច្ចព្រមព្រៀងនៅឡើយ៕
Tag:
Patrice Evra
Manchester United
Sky Sports
© រក្សាសិទ្ធិដោយ thmeythmey.com