អន្តរជាតិ
ប្រមុខកងទ័ពថៃថ្មី បដិសេធលទ្ធភាពការធ្វើរដ្ឋប្រហារ អគ្គមេបញ្ជាការកងទ័ពភូមិន្ទថៃ ឧត្តមសេនីយ៍ Chalermpol Srisawasdi (កណ្ដាល) ថតរូបជាមួយមេបញ្ជាការកម្លាំងទាំងបី និងមេប៉ូលិសថៃ។ រូបភាព Bangkok Post
×
ដោយៈកង ម៉េងហុង
ប្រមុខកងទ័ពភូមិន្ទថៃការពារជាតិដែលទើបចូលកាន់តំណែងថ្មី ឧត្តមសេនីយ៍ Chalermpol Srisawasdi នៅថ្ងៃទី៥ ខែកញ្ញា អះអាងថា យោធានឹងមិនចូលរួមក្នុងនយោបាយទេ។ លើសពីនោះ រដ្ឋប្រហារយោធា ក៏មិនស្ថិតនៅក្នុងការគិតរបស់កងទ័ពនោះដែរ។
បើតាមកាសែត Bangkok Post លោកឧត្តមសេនីយ៍ Chalermpol Srisawasdi បានជួបជាមួយមេបញ្ជាការថ្មីកងទ័ពជើងគោក ជើងទឹក ជើងអាកាស និងស្នងការប៉ូលិសជាតិ ជាលើកដំបូងនៅថ្ងៃទី៥ ខែកញ្ញា។ ក្រោយជំនួបនេះ លោក Chalermpol ត្រូវបានអ្នកសារព័ត៌មានសួរពីតួនាទីរបស់យោធានៅក្នុងរឿងនយោបាយ។
លោកឧត្តមសេនីយ៍ Chalermpol បានឆ្លើយថា រឿងនយោបាយជាប់ពាក់ព័ន្ធនឹងការគ្រប់គ្រងប្រទេសតាមច្បាប់ ឯយោធាធ្វើជាយន្តការរបស់រដ្ឋាភិបាលក្នុងកិច្ចការសង្គម និងសេដ្ឋកិច្ច។ លោកសង្កត់ធ្ងន់ថា៖«ចំពោះបញ្ហានយោបាយ យោធាមិនមានចូលពាក់ព័ន្ធទេ ទោះបីយោធាចូលរួមដោយផ្ទាល់នៅក្នុងសន្តិសុខរដ្ឋក៏ដោយ ព្រោះនេះជាកាតព្វកិច្ចរបស់យោធា។ វាជាកាតព្វកិច្ចដែលមានចែងនៅក្នុងរដ្ឋធម្មនុញ្ញ»។
ជាមួយនឹងការធានាថា នឹងមិនមានរដ្ឋប្រហារយោធានោះ លោកឧត្តមសេនីយ៍ Chalermpol បាននិយាយទៀតថា ការធ្វើរដ្ឋប្រហារមិនមែនជាផ្នែកនៃផែនការសកម្មភាពរបស់យោធានោះទេ។ លោកក៏បានដាក់គោលនយោបាយរបស់កងកម្លាំងប្រដាប់អាវុធរួមមាន ការការពាររាជានិយម ការពារជាតិ ការរក្សាសន្តិសុខរបស់រដ្ឋ ការកសាងកិច្ចសហប្រតិបត្តិការសន្តិសុខជាមួយប្រទេសដទៃ គាំទ្រកិច្ចខិតខំប្រឹងប្រែងដើម្បីអភិវឌ្ឍប្រទេស និងការពារគ្រោះមហន្តរាយធម្មជាតិ។
នៅពេលចោទសួរអំពីតួនាទីរបស់មេដឹកនាំកងកម្លាំងប្រដាប់អាវុធក្នុងនាមជាសមាជិកព្រឹទ្ធសភា ប្រមុខកងទ័ពថៃ បាននិយាយថា ពួកគេទទួលតួនាទីនេះក្នុងរយៈពេលប្រាំឆ្នាំតាមការកំណត់ក្នុងរដ្ឋធម្មនុញ្ញតែប៉ុណ្ណោះ។
សូមរំឭកបន្តិចថា ក្រោមរដ្ឋធម្មនុញ្ញបច្ចុប្បន្នដែលតាក់តែងដោយយោធាក្រោយរដ្ឋប្រហារឆ្នាំ២០១៤ មេទ័ពជើងគោក ជើងទឹក ជើងអាកាស អគ្គមេបញ្ជាការ លេខាធិកាអចិន្ត្រៃយ៍ក្រសួងការពារជាតិ និងមេប៉ូលិស មានតំណែងជាសមាជិកព្រឹទ្ធសភា៕
© រក្សាសិទ្ធិដោយ thmeythmey.com