ជាតិ
សង្គមជាតិ
ភ្លែនអន្តរជាតិ៖ ក្មេងស្រី៥៨ភាគរយរងការបៀតបៀននៅលើប្រព័ន្ធអុីនធឺណិត ជាពិសេសបណ្តាញសង្គម
ក្មេងស្រីម្នាក់កំពុងអង្គុយលើមើល ឬប្រើប្រាស់បណ្តាញសង្គមហ្វេសប៊ុកដែលដំណើរការដោយប្រព័ន្ធអ៊ិនធឺណិតនៅលើទូរសព្ទដៃ។
×![]()
ភ្នំពេញ៖ ក្មេងស្រី និងស្ត្រីវ័យក្មេងទូទាំងពិភពលោក មានរហូតដល់៥៨ភាគរយ ទទួលរងការបៀតបៀន ឬរំលោភបំពាននៅលើប្រព័ន្ធអុីនធឺណិត (Internet) ដែលមានដូចជាបណ្តាញទំនាក់ទំនងសង្គម Faecbook, Instagram, Tik Tok, Twitter ជាដើម។ នេះបើយោងតាមសេចក្តីប្រកាសព័ត៌មាន របស់អង្គការភ្លែនអន្តរជាតិ ដែលចេញផ្សាយរបាយការណ៍សិក្សាស្រាវជ្រាវជាសកលរបស់ខ្លួន កាលពីថ្ងៃទី៥តុលា ឆ្នាំ២០២០។
របាយការណ៍សិក្សាស្រាវជ្រាវជាសកលរបស់អង្គកាភ្លែនអន្តរជាតិ បានបញ្ជាក់ថា ក្នុងចំណោមក្មេងស្រីជាង៥០ភាគរយ ក្នុងពិភពលោក ដែលរងការបៀតបៀន នៅលើប្រព័ន្ធអុីនធឺណិតនោះ មានការរំលោភបំពាននៅលើសង្គម Facebook ខ្លាំងជាងគេ ដោយមានរហូតដល់ ៣៩ភាគរយ នៃក្មេងស្រី និងស្ត្រីវ័យក្មេងទូទាំងពិភពលោក។ ដោយឡែក ក្មេងស្រីដែលរងការបៀតបៀន នៅតាមប្រព័ន្ធបណ្តាញសង្គមទំនាក់ទំនងសង្គមផ្សេងៗ មាននៅលើ Instagram ចំនួន២៣ភាគរយ, នៅលើWhatsApp ចំនួន១៤ភាគរយ, នៅលើSnapchat ចំនួន១០ភាគរយ, នៅលើTwitter ចំនួន៩ភាគរយ និងនៅលើTikTok មាន៦ភាគរយ។
អង្គការភ្លែនអន្តរជាតិបានអះអាងថា ការស្រាវជ្រាវនេះ គឺផ្អែកលើការស្ទង់មតិជាមួយក្មេងស្រីចំនួន ១,៤ពាន់នាក់ ចាប់ពីអាយុ១៥ទៅ២៥ឆ្នាំ ដែលមាននៅក្នុង២២ប្រទេស រួមមានទាំងប្រទេសប្រេស៊ីល បេនីន អាមេរិក ឥណ្ឌា ជាមួយបទសម្ភាសស៊ីជម្រៅជាបន្តបន្ទាប់។ បើតាមអង្គការភ្លែនអន្តរជាតិ ការសិក្សាស្រាវជ្រាវនេះ គឺបានរកឃើញថា ក្មេងស្រីដែលប្រើប្រព័ន្ធផ្សព្វផ្សាយសង្គម នៅក្នុងប្រទេសដែលមានប្រាក់ចំណូលខ្ពស់ និងទាប គឺពួកគេត្រូវបានទទួលរងការបៀតបៀន ដោយរូបភាពអាសអាភាស ការលួចតាមដាននៅលើអុីនធឺណិត និងទម្រង់នៃការរំលោភបំពានផ្សេងៗទៀត ដូចគ្នា។
ទន្ទឹមនឹងគ្នានេះ អំពើហិង្សាតាមប្រព័ន្ធអុីនធឺណិត បានបណ្តាលឱ្យមនុស្សម្នាក់ ក្នុងចំណោមប្រាំនាក់ ស្មើនឹង១៩ភាគរយ នៃអ្នកដែលត្រូវបានគេបៀតបៀន បញ្ឈប់ ឬកាត់ការប្រើប្រាស់បណ្តាញទំនាក់ទំនងសង្គមនានា ខណៈពេលដែលម្នាក់ក្នុងចំណោមដប់នាក់ (១២ភាគរយ) បានផ្លាស់ប្តូររបៀបនៃការបញ្ចេញមតិរបស់ពួគគេ។
ការរំលោភបំពានតាមប្រព័ន្ធអុីនធឺណិតនេះ បានធ្វើឱ្យប៉ះពាល់ដល់ការរស់នៅរបស់ក្មេងស្រី នៅខាងស្រីផងដែរ។ នេះបើតាមលើកឡើងរបស់អង្គការផ្លែនអន្តរជាតិ ដោយបញ្ជាក់ថា ៖«ក្មេងស្រីម្នាក់ ក្នុងចំណោមប្រាំនាក់ស្មើ២២ភាគរយ នៃអ្នកដែលមានបានចូលរួមស្ទង់មតិ បាននិយាយថាពួកគេ ឬមិត្តភក្តិមានភាពភ័យខ្លាច លើសុវត្ថិភាពរាងកាយរបស់ពួកគេ ខណៈក្មេងស្រី៤៤ភាគរយទៀត និយាយថា ក្រុមហ៊ុនប្រព័ន្ធផ្សព្វផ្សាយសង្គម ត្រូវធ្វើការងារបន្ថែមទៀតដើម្បីការពារពួកគេ»។
លោកស្រី Anne-Birgitte Albrectsen នាយិកាប្រតិបត្តិនៃអង្គការផ្លែនអន្តរជាតិ មានប្រសាសន៍ បើទោះបីជាការស្រាវជ្រាវនេះ ប្រមូលផ្តុំពីការសន្ទនាជាមួយក្មេងស្រី១,៤ពាន់នាក់ មកពីទ្វីបជាច្រើន ប៉ុន្តែពួកគេចែករំលែកបទពិសោធន៍ស្រដៀងគ្នានៃការបៀតប្រៀន និងការរើសអើង។
បើតាមលោកស្រី Anne-Birgitte សកម្មភាពរំលោភបំពានទាំងនេះ អាចមិនបញ្ចេញលើរាងកាយ ប៉ុន្តែជារឿយៗ វាតែងតែបង្កើតនូវការគំរាមកំហែង មានលក្ខណៈឥតឈប់ឈរ និងបានដាក់ដែនកំណត់ លើសេរីភាពក្នុងការបញ្ចេញមតិរបស់ក្មេងស្រី ។ លោកស្រី Anne-Birgitte បានបញ្ជាក់ថា៖«ការធ្វើឱ្យក្មេងស្រីដកខ្លួនចេញ ពីប្រព័ន្ធអុីនធឺណិត គឺជាការបង្ខាំងភាពអង់អាចរបស់ពួកគេ នៅក្នុងពិភពលឌីជីថល ដែលកំពុងតែកើនឡើង និងបំផ្លាញសមត្ថភាពរបស់ពួកគេ ក្នុងការបង្ហាញឱ្យគេឃើញ ឱ្យគេស្គាល់ ឱ្យគេស្តាប់ និងក្លាយជាអ្នកដឹកនាំ»។
នាយិកាប្រតិបត្តិនៃអង្គការភ្លែនអន្តរជាតិបានបន្តថា៖« ជារឿយៗដែលគួរឱ្យខកចិត្តខ្លាំង ដែលពួកគេត្រូវបានគេទុកឱ្យដោះស្រាយអំពើហិង្សា តាមអុីនធឺណិតដោយខ្លួនឯង ជាមួយនឹងផលប៉ះពាល់យ៉ាងខ្លាំង ទៅលើទំនុកចិត្តលើខ្លួនឯង និងសុខុមាលភាពរបស់ពួកគេ។ ដោយសារជំងឺកូវីដ-១៩ បានធ្វើឱ្យការរស់នៅរបស់យើងភាគច្រើន ត្រូវពឹងផ្អែកលើអុីនធឺណិត ហើយជាមួយនឹងការបង្កើនលទ្ធភាពប្រើប្រាស់អុីនធឺណិត នៅទូទាំងពិភពលោក វាដល់ពេលហើយដែលប្រព័ន្ធឌីជីថល ត្រូវបង្កើតយន្តការ និងវិធានការពារអ្នកប្រើប្រាស់របស់ពួកគេ»។
ក្នុងរបាយការណ៍សិក្សាស្រាវជ្រាវនេះ បញ្ជាក់ផងដែរថា ប្រភេទនៃសកម្មភាពរំលោភបំពានលើក្មេងស្រីក្នុងពិភពលោក ជាទូទៅគឺភាសា ដែលបង្ហាញពីរំលោភបំពាន និងប្រមាថ ដែលត្រូវបានរាយការណ៍ ដោយក្មេងស្រី៥៩ភាគ ដែលត្រូវបានគេបៀតបៀន។ បន្ទាប់មកការបង្អាប់ដោយចេតនា មាន៤១ភាគរយ ការមាក់ងាយរូបរាងកាយ និងការគំរាមកំហែងនៃអំពើហិង្សាផ្លូវភេទ មាន៣៩ភាគរយ៕
Tag:
កុមារ
Facebook
© រក្សាសិទ្ធិដោយ thmeythmey.com
