ជាតិ
អ្នកនៅតំបន់ភ្នំ និងមាត់សមុទ្រ ត្រូវប្រុងប្រយ័ត្នខ្ពស់ចំពោះបាតុភូតភ្លៀង ខ្យល់ ដែលបន្តដល់ថ្ងៃទី១៣ ខែតុលា
×![]()
ក្រសួងធនធានទឹក និងឧតុនិយម បានជូនដំណឹងឲ្យពលរដ្ឋមានការប្រុងប្រយ័ត្នខ្ពស់ ចំពោះភ្លៀង ផ្គរ រន្ទះ ដែលអាចកើតមាន ចាប់ពីថ្ងៃទី ៧-១៣ ខែតុលា។ ដោយឡែកនៅបណ្តាខេត្តជាប់សមុទ្រ និងតំបន់ភ្នំនឹងអាចមានភ្លៀងធ្លាក់ច្រើន នៅថ្ងៃទី ៧-៩ តុលា។ នេះបើតាមសេចក្ដីជូនដំណឹងរបស់ក្រសួងធនធានទឹក នៅថ្ងៃទី៦ តុលានេះ។
ក្នុងសេចក្ដីជូនដំណឹងនោះ ក្រសួងធនធានទឹក បានបញ្ជាក់ថា ប្រព័ន្ធសម្ពាធទាប បានបន្តលាតសន្ធឹងឆ្លងកាត់ប្រទេសកម្ពុជា ដោយភ្ជាប់ទៅនឹងសម្ពាធទាបមួយនៅលើសមុទ្រចិនខាងត្បូង ដែលអាចកើតជាវិសម្ពាធទាប (Tropical Depression) ឬបង្កើតជាព្យុះ (Tropical Storm)។ ស្ថានភាពបែបនេះ នឹងធ្វើឲ្យទូទាំងប្រទេសកម្ពុជា អាចមានភ្លៀងធ្លាក់ និងខ្យល់បក់ ចាប់ពីថ្ងៃទី៧តុលា ដល់ថ្ងៃទី១៣តុលា។
តាមការព្យាករដដែល ខេត្តជាប់ជួរភ្នំដងរែក និងខ្ពង់រាបឦសាន អាចមានភ្លៀងធ្លាក់ពីមធ្យម ទៅបង្គួរ ចាប់ពីថ្ងៃទី ៧-១៣ ខែតុលា ខណៈបណ្ដាខេត្តនៅតំបន់វាលទំនាប ដូចជាខេត្តភាគខាងត្បូងប្រទេសកម្ពុជា និងបណ្ដាខេត្តជាប់ប្រទេសវៀតណាម អាចមានភ្លៀងធ្លាក់ច្រើន ចាប់ពីថ្ងៃទី៧-៩ តុលា។
ក្រសួងធនធានទឹក បានបញ្ជាក់ទៀតថា ខេត្តនៅជាប់តំបន់មាត់សមុទ្រ អាចមានភ្លៀងធ្លាក់រាយប៉ាយ នៅក្នុងកម្រិតបង្គួរ ទៅច្រើន ក្នុងអំឡុងថ្ងៃទី ៧-១៣ តុលា។ ដូច្នេះក្រសួង បានក្រើនរំលឹកដល់ពលរដ្ឋដែលរស់នៅតាមតំបន់មាត់សមុទ្រ និងអ្នករស់នៅជាប់តំបន់ភ្នំ ពិសេសអ្នកនេសាទឲ្យមានការប្រុងប្រយ័ត្នខ្ពស់ចំពោះបាតុភូតនេះ ចាប់ពីថ្ងៃនៅថ្ងៃទី ៧-៩ តុលា ដែលនឹងមានភ្លៀង ខ្យល់បក់ខ្លាំង និងរលក់សមុទ្រខ្ពស់ៗ ជាដើម៕
Tag:
អាកាសធាតុ
មាត់សមុទ្រ
© រក្សាសិទ្ធិដោយ thmeythmey.com
