អន្តរជាតិ
មេទ័ពជើងគោកថៃថ្មី ប្រាប់បាតុករដែលចង់កែទម្រង់រាជានិយមឲ្យកែខ្លួនឯងសិន មេបញ្ជាការកងទ័ពជើងគោកថៃ ឧត្តមសេនីយ៍ Narongphan Jitkaewtae ។ រូបភាព AFP
× មេទ័ពជើងគោកថ្មីរបស់ថៃ ឧត្តមសេនីយ៍ Narongphan Jitkaewtae បានផ្ញើសារព្រមានមួយទៅកាន់ក្រុមបាតុករដែលទាមទារឲ្យកែទម្រង់របបរាជានិយមក្នុងប្រទេស។ ឧត្តសេនីយ៍រូបនេះ ប្រាប់ឲ្យបាតុករកែប្រែខ្លួនឯងជាមុនសិន។
«ពួកគេគេគួរមើលខ្លួនឯងជាមុនសិនថា បានធ្វើរឿងត្រឹមត្រូវអ្វីខ្លះ មុនពេលប្រាប់ឲ្យអ្នកដទៃធ្វើតាមខ្លួន។» ឧត្តមសេនីយ៍ Narongphan Jitkaewtae មេបញ្ជាការកងទ័ពជើងគោកថៃ និយាយបែបនេះដោយសំដៅក្រុមបាតុករវ័យក្មេងដែលចង់បានកំណែទម្រង់ស្ថាប័នមហាក្សត្រ ។ លោក Jitkaewtae ឡើងកាន់តំណែងមេទ័ពជើងគោកដ៏មានអំណាចនៅថ្ងៃទី១ ខែតុលាកន្លងទៅ។
នៅក្នុងសន្និសីទសារព័ត៌មានថ្ងៃទី៦ ខែតុលាក្រោយជំនួបជាមួយមេបញ្ជាការយោធា លោក Jitkaewtae ក៏បានផ្ញើសារទុកមុនដែរ គ្រប់ភាគីទាំងអស់មិនត្រូវបង្កើតឲ្យមានស្ថានភាពគ្រោះថ្នាក់ដល់ជាតិឡើយ ហើយបើធ្វើបាន លទ្ធភាពនៃការធ្វើរដ្ឋប្រហារគឺសូន្យ។ នេះបើតាមការផ្សាយរបស់កាសែតបាងកកប៉ុស្តិ៍។
នៅពេលសួរពីជំហរទាក់ទងគម្រោងធ្វើបាតុកម្មនៅសប្ដាហ៍ក្រោយដែលទំនងជាផ្ដោតលើរាជានិយមទៀតនោះ ប្រមុខកងទ័ពជើងគោកថៃរូបនេះ ឆ្លើយថា ប្រជាជនមានសេរីភាព ប៉ុន្តែសេរីភាពនៃការបញ្ចេញរបស់ពួកគេ ត្រូវតែស្របតាមច្បាប់។ ពោល គឺពួកគេមិនត្រូវបំពានសិទ្ធិអ្នកដទៃ ហើយទទួលខុសត្រូវចំពោះមុខច្បាប់ បើធ្វើខុសច្បាប់។
ចំពោះមុខអ្នកសារព័ត៌មាន លោក Jitkaewtae ប្ដេជ្ញាចិត្តការពារជាតិ សាសនា មហាក្សត្រ និងប្រជាជន ទោះត្រូវលះបង់អ្វីក៏ដោយ។ ពេលសួរដល់រឿងរដ្ឋប្រហារ មេទ័ពថៃរូបនេះឆ្លើយថា៖ «គ្រប់មេទ័ពជើគោកទាំងអស់ សុទ្ធតែត្រូវបានសួរបែបនេះពេលកាន់តំណែង ហើយពួកគេឆ្លើយថា ឱកាសធ្វើរដ្ឋប្រហារមានសូន្យភាគរយ តែមានលក្ខខណ្ឌថា មិនមាននរណាម្នាក់បង្កជម្លោះដែលនាំឲ្យអំពើហិង្សា និងកោលាហល។»
លោក Jitkaewtae នឹងកាន់តំណែងដល់លោកចូលនិវត្តន៍នៅឆ្នាំ២០២៣៕
Tag:
ថៃ
Narongphan Jitkaewtae
© រក្សាសិទ្ធិដោយ thmeythmey.com