កីឡាអន្តរជាតិ
អន្តរជាតិ
Mesut Ozil, Arsenal, Mascot Gunnersaurus
×![]()
ដោយ: ទេព ពិទូរ្យ
Mesut Ozil ប្រកាសធានាផ្តល់ប្រាក់ខែដល់លោក Jerry Quy បុរសដែលពាក់រូបតុក្កតា Mascot Gunnersaurus ដែលត្រូវក្លិប Arsenal បញ្ឈប់ពីការងារ។
លោក Quy ដែលជាអ្នកពាក់ Mascot អំឡុងពេលប្រកួតរបស់កាំភ្លើងធំនៅកីឡដ្ឋាន Emirates អស់រយៈពេល ២៧ ឆ្នាំមកហើយនោះ ត្រូវបានក្លិបមានមូលដ្ឋានក្រុងឡុងដ៍បញ្ចប់ពីការងារក្នុងចំណោមការងារចំនួន ៥៥ ផ្សេងទៀត។ បញ្ចប់ការងារជាច្រើនផ្នែកបែបនេះ ដោយសារក្លិបត្រូវដោះស្រាយវិបត្តិដោយសារជំងឺ COVID-19។
ដោយក្តីអាណិត Ozil ខ្សែបម្រើក្រុម Arsenal បានប្រកាសឧបត្ថម្ភប្រាក់បៀវត្សប្រចាំខែទៅឲ្យលោក Quy តែម្តង។ អតីតខ្សែបម្រើក្រុមជម្រើសជាតិអាល្លឺម៉ង់វ័យ ៣១ ឆ្នាំរូបនេះ បានសរសេរលើបណ្តាញសង្គម Twitter ថា៖« ខ្ញុំពិតជាសោកស្តាយណាស់ដែល Jerry Quy ដែលជា mascot Gunnersaurus ដ៏ល្បីរបស់យើង និងជាផ្នែកដ៏សំខាន់មួយរបស់ក្លិបបែជាត្រូវបោះបង់ចោលបន្ទាប់ពីរយៈពេល ២៧ ឆ្នាំ។ ដូចនេះខ្ញុំនឹងដកប្រាក់ឈ្នួលដែលទទួលបានពី Arsenal ដើម្បីផ្តល់ប្រាក់ខែពេញដល់បុរស mascot។ ដរាបណាខ្ញុំនៅតែជាកីឡាកររបស់ក្រុម Arsenal Quy អាចបន្តការងាររបស់គាត់ដែលគាត់ស្រឡាញ់ខ្លាំងបំផុតនៅទីនេះដដែល»។
I was so sad that Jerry Quy aka our famous & loyal mascot @Gunnersaurus and integral part of our club was being made redundant after 27 years. As such, I’m offering to reimburse @Arsenal with the full salary of our big green guy as long as I will be an Arsenal player... pic.twitter.com/IfWN38x62z
— Mesut Özil (@MesutOzil1088) October 6, 2020
រហូតមកទល់ពេលនេះ Arsenal នៅតែអះអាងថា ពួកគេត្រូវបញ្ឈប់ការងារបុគ្គលិកជាបន្តបន្ទាប់ទៀត ដោយសារតែផលប៉ះពាល់ផ្នែកហិរញ្ញវត្ថុនៃជំងឺរាតត្បាតសកល។
សូម្បីតែកីឡាករក្រុមឈុតធំរបស់ក្រុមរហស្សនាមកាំភ្លើងធំ និងអ្នកចាត់ការទូទៅលោក Mikel Arteta សុទ្ធតែយល់ព្រមកាត់បន្ថយប្រាក់ឈ្នួល ១២,៥% កាលពីខែមេសា។ ដោយឡែក ក្រុមប្រតិបត្តិរបស់ក្លិបក៏បានយល់ព្រមលើកលែងប្រាក់ខែមួយភាគបីនៃប្រាក់ខែរបស់ពួកគេក្នុងរយៈពេល ១២ ខែទៅមុខទៀតផងដែរ។
Arsenal ស្ថិតនៅចំណាត់ថ្នាក់ទី៤ក្នុងតារាង Premier League ដោយរកបាន៩ពិន្ទុ ពីការប្រកួត៤លើកក្នុងរដូវកាល ២០២០-២១ នេះ៕
© រក្សាសិទ្ធិដោយ thmeythmey.com
