ជាតិ
វីដេអូ
សុខភាព
ជំងឺរលាកសន្លាក់ឆ្អឹងរ៉ាំរ៉ៃ អាចធ្វើឱ្យអ្នកជំងឺបាត់បង់ជីវិត!
× ភ្នំពេញ៖ ជំងឺរលាកសន្លាក់ឆ្អឹងរ៉ាំរ៉ៃ កើតឡើងដោយសារប្រព័ន្ធការពាររាងកាយ ធ្វើការមិនត្រឹមត្រូវ ពោលគឺវាប្រឆាំងនឹងជាលិកាខ្លួនឯង។ បើតាមកញ្ញាវេជ្ជបណ្ឌិត សុខ ពុទ្ធី ជំងឺនេះ ភាគច្រើនកើតនៅត្រង់សន្លាក់តូចៗ គឺសន្លាក់ម្រាមដៃ-ជើង,កដៃ, កែងដៃ និងសន្លាក់កជើងជាដើម។ ជំងឺរលាកសន្លាក់រ៉ាំរ៉ៃនេះ ក៏អាចបណ្ដាលឱ្យអ្នកជំងឺបាត់បង់ជីវិតដែរ ជាពិសេសមនុស្សចាស់។ នេះបើតាម វេជ្ជបណ្ឌិតសុខ ពុទ្ធី។
ដើម្បីជ្រាបច្បាស់ សូមអញ្ជើញលោក-អ្នកទស្សនាបទសម្ភាស រវាងកញ្ញា អ៊ុត រស្មី នៃអ្នកសារព័ត៌មានថ្មីៗ ជាមួយ កញ្ញា សុខ ពុទ្ធី វេជ្ជបណ្ឌិតនៃមន្ទីរព្យាបាលវឌ្ឍៈវិជ្ជា ដូចតទៅ៖
ជំងឺរលាកសន្លាក់ឆ្អឺងរ៉ាំរ៉ៃ កើតឡើងដោយសារការរលាកសន្លាក់រយៈពេលយូរ ការជក់បារី និងធាត់ជាដើម។ ជំងឺរ៉ាំរ៉ៃមួយនេះ ភាគច្រើនកើតលើមនុស្សវ័យចន្លោះ៣០ឆ្នាំ ទៅ៦០ឆ្នាំ ដែលមិនត្រឹមតែប៉ះពាល់ដល់សន្លាក់តូចៗប៉ុណ្ណេះទេ តែវាក៏ប៉ះពាល់ដល់សរីរាង្គកាយសំខាន់ៗដូចជា បេះដូង សួតជាដើម។ វាអាចធ្វើឱ្យអ្នកជំងឺបាត់បង់ជីវិតបាន ប្រសិនបើមិនព្យាបាលត្រឹមត្រូវទេនោះ ជាពិសេសលើមនុស្សចាស់។
វេជ្ជបណ្ឌិត សុខពុទ្ធី បានពន្យល់ដូច្នេះថា៖«កាលណាប៉ះពាល់សន្លាក់របស់គាត់ គឺគាត់ពិបាកធ្វើចលនាប្រចាំថ្ងៃ ហើយសំខាន់បំផុត គឺប៉ះពាល់ដល់សរីរាង្គផ្សេងទៀត ដូចជាបេះដូង សួត ដែលជាសរីរាង្គសំខាន់ៗ។ សំខាន់មួយទៀត អ្នកជំងឺប្រឈមនឹងប្រព័ន្ធការពារចុះខ្សោយ។ កាលណាប្រព័ន្ធការពារចុះខ្សោយ ងាយប្រឈមនឹងជំងឺផ្សេងៗទៀតចូលមក។ អីចឹងគាត់អាចប៉ះពាល់លើអាយុជីវិត ជាពិសេសមនុស្សចាស់»។
បើតាម កញ្ញាវេជ្ជបណ្ឌិត សុខ ពុទ្ធី អ្នកជំងឺរលាកសន្លាក់ឆ្អឹងរ៉ាំរ៉ៃ មានរោគសញ្ញាដូចជាដៃជើងពិបាកធ្វើចលនាដោយមានការឈឺ តឹង ណែន នៅពេលព្រឹកព្រលឹម រយៈពេលលើសពីមួយម៉ោង,ឧស្សាហ៍ក្ដៅខ្លួន,បាត់បង់ចំណង់បរិភោគអាហារ ប៉ះពាល់ដល់សរីរាង្គផ្សេងៗទៀត ថប់ណែនបេះដូង មានបញ្ហាសួត ស្ងួតមាត់ និងភ្នែកជាដើម៕
Tag:
រលាកសន្លាក់ឆ្អឹងរ៉ាំរ៉ៃ
សុខភាព
© រក្សាសិទ្ធិដោយ thmeythmey.com