កីឡាអន្តរជាតិ
អន្តរជាតិ
សហព័ន្ធនិងលីគអង់គ្លេស ស្នើរដ្ឋាភិបាលឲ្យអ្នកគាំទ្រចូលកីឡដ្ឋានវិញ ដើម្បីជួយអាជីវកម្ម និងសេដ្ឋកិច្ច
× សហព័ន្ធកីឡាបាល់ទាត់អង់គ្លេស (FA) និងលីគ បានជំរុញរដ្ឋាភិបាលអនុញ្ញាតឲ្យអ្នកគាំទ្រវិលត្រឡប់ទៅកីឡដ្ឋានវិញដោយធានាសុវត្ថិភាពពួកគេ។ ការវិលត្រឡប់របស់អ្នកគាំទ្រទោះក្នុងចំនួនតិចក៏ដោយ អាចជួយជីវភាពរស់នៅ និងអាជីវកម្មក្នុងតំបន់ រួមទាំងសេដ្ឋកិច្ចជាតិផង។
ដំបូងឡើយ រដ្ឋាភិបាលអង់គ្លេសសង្ឃឹមថា នឹងអនុញ្ញាតឲ្យមានការត្រឡប់ទៅវិញសម្រាប់អ្នកគាំទ្រក្នុងចំនួនពី ២៥ ទៅ ៣៣ភាគរយ គិតចាប់ពីថ្ងៃទី១ ខែតុលាតទៅ។ ប៉ុន្តែកាលពីខែមុននាយករដ្ឋមន្ត្រីអង់គ្លេសលោក Boris Johnson បែជាអះអាងថា ផែនការទាំងនេះត្រូវរក្សាទុកសិន ដើម្បីការពារការរីករាលដាលនៃជំងឺ COVID-19 ។
លោក Mark Bullingham ប្រធាន FA និង លោក Richard Masters នាយកប្រតិបត្តិក្របខណ្ឌ Premier League រួមជាមួយប្រធានកីឡាបាល់ទាត់ស្ត្រី Kelly Simmons និងប្រធាន EFL លោក David Baldwin បានប្រកាសពីការធ្វើការរួមគ្នា ដើម្បីធ្វើឲ្យកីឡដ្ឋានមានសុវត្ថិភាពសម្រាប់ការត្រឡប់មកវិញរបស់អ្នកគាំទ្រ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
លិខិតរបស់ប្រធានកីឡាបាល់ទាត់ខាងលើ បានសរសេរថា៖ «ជាមួយគ្នានេះ EFL, Premier League, Super League និង Championship ស្ត្រី បានរៀបចំព្រឹត្តិការណ៍សាកល្បងចំនួន១១ ដែលទទួលបានជោគជ័យនាពេលថ្មីៗនេះ ហើយយើងបានបង្ហាញថាយើងអាចដឹកនាំការប្រកួតដោយសុវត្ថិភាព។ ឆាប់ៗនេះ យើងអាចត្រឡប់ទៅវិញ ហើយយើងអាចសម្រួលដល់ការងារក្នុងស្រុក ជីវភាពរស់នៅ និងអាជីវកម្មក្នុងតំបន់ រួមទាមងសេដ្ឋកិច្ចជាតិផងដែរ»។
ស្របពេលគ្នានេះ អង្គភាពគ្រប់គ្រងកីឡាបាល់ទាត់អង់គ្លេសក៏បានលើកឡើងដែរថា ក្លិបបានបង្ហាញរួចហើយពីវិធានការសុវត្ថិភាពទាំងអស់របស់ពួកគេ សម្រាប់ការវិលត្រឡប់របស់អ្នកគាំទ្រ។ មួយវិញទៀត FA នៅតែបើកចំហដើម្បីទទួលយកការច្នៃប្រឌិតថ្មីនៃគម្រោងសាកល្បងក្នុងការរៀបចំកីឡដ្ឋានឲ្យកាន់តែមានសុវត្ថិភាព។ ដូច្នេះនេះជាពេលដ៏សមរម្យសម្រាប់ការអនុញ្ញាតឲ្យមានអ្នកគាំទ្រឡើងវិញដោយរក្សាគម្លាតសុវត្តិភាព។
ក្រុមអ្នកគាំទ្រ ត្រូវបានហាមមិនឲ្យចូលកីឡដ្ឋាន ចាប់តាំងពីព្រឹត្តិការណ៍កីឡាបាល់ទាត់ត្រឡប់ចូលការប្រកួតវិញនៅខែមិថុនាកន្លងមក ក្រោយផ្អាកដោយសារ COVID-19 នាខែមិនា ឆ្នាំ២០២០៕
© រក្សាសិទ្ធិដោយ thmeythmey.com