លោក ប៉ុមប៉េអូ អំពាវនាវឲ្យសម្ព័ន្ធមិត្តទប់ទល់សកម្មភាពចិននៅក្នុងតំបន់

អន្តរជាតិ

លោក ប៉ុមប៉េអូ អំពាវនាវឲ្យសម្ព័ន្ធមិត្តទប់ទល់សកម្មភាពចិននៅក្នុងតំបន់

07, Oct 2020 , 3:39 pm

រូបភាព

(ពីឆ្វេងទៅស្តាំ) រដ្ឋមន្រ្តីការបរទេសឥណ្ឌា រដ្ឋមន្រ្តីការបរទេសជប៉ុន រដ្ឋមន្រ្តីការបរទេសអូស្រ្តាលី និងរដ្ឋមន្រ្តីការបរទេសអាមេរិក នៅក្នុងកិច្ចប្រជុំ Quad នៅថ្ងៃទី៦ ខែតុលា។ រូបភាព៖ AFP

ដោយ: ធៀន ភារិន្ទ

ប្រមុខការទូតអាមេរិក លោក ម៉ៃ ប៉ុមប៉េអូ នៅថ្ងៃទី៦ ខែតុលា បានអំពាវនាវឲ្យសម្ព័ន្ធមិត្តជប៉ុន អូស្ត្រាលី និងឥណ្ឌា ទប់ស្កាត់សកម្មភាពកេងចំណេញ អំពើពុករលួយ និងការប្រើប្រាស់កម្លាំងរបស់ចិននៅក្នុងតំបន់។

កិច្ចប្រជុំសន្ទនាសន្តិសុខ៤ភាគី (Quad) បានចាប់ផ្តើមឡើង និងបញ្ចប់ទៅវិញនៅថ្ងៃទី៦ ខែតុលា ដោយមានប្រទេសចំនួន៤ ចូលរួម ក្នុងនោះមានដូចជាអាមេរិក ជប៉ុន ឥណ្ឌា និងអូស្រា្តលី។ ប្រធានបទចិន គឺលើកឡើងតែភាគីអាមេរិកប៉ុណ្ណោះ ខណៈភាគីជប៉ុន ឥណ្ឌា និងអូស្ត្រាលី មិនបានលើកពីចិនចំឡើយ។

ថ្លែងក្នុងកិច្ចប្រជុំនាទីក្រុងតូក្យូនេះ ប្រមុខការទូតអាមេរិក បានទាមទារឲ្យសម្ព័ន្ធមិត្តទប់ស្កាត់សកម្មភាពអុងអាត់របស់ចិននៅក្នុងតំបន់។ លោក ប៉ុមប៉េអូ អះអាងថា ពេលនេះ គឺសំខាន់ជាងពេលណាទាំងអស់ ដែលតម្រូវឲ្យក្រុមប្រទេស Quad សហការជាមួយគ្នា ដើម្បីការពារប្រជាជន និងប្រទេសដៃគូពីការកេងចំណេញ អំពើពុករលួយ និងការប្រើប្រាស់កម្លាំងបង្ខំរបស់បក្សកុម្មុយនីស្តចិន នៅក្នុងតំបន់។

តំបន់ដែលរដ្ឋមន្ត្រីការបរទេសអាមេរិសំដៅនោះមានសកម្មភាពរបស់ចិន បានកើតឡើងនៅក្នុងតំបន់ជួរភ្នំហិមាល័យ, ច្រកសមុទ្រតៃវ៉ាន់ និងសមុទ្រចិនខាងត្បូងជាដើម។ ក្រៅពីនេះភូមិសាស្ត្រនយោបាយ លោករដ្ឋមន្ត្រីក៏បានលើកឡើងពីការលាក់បាំងព័ត៌មានរបស់បក្សកុម្មុយនិស្តចិនជុំវិញជំងឺ COVID-19 ផងដែរ។

ខុសពីអាមេរិក អូស្រា្តលី មិនបានសំដៅទៅចិនចំៗឡើយ។ លោកស្រី Marise Payne រដ្ឋមន្ត្រីការបរទេសអូស្ត្រាលី បានលើកឡើងថា សេចក្តីប្រាថ្នាសម្រាប់តំបន់ គឺការដឹកនាំដោយច្បាប់ មិនមែនអំណាចឡើយ។ ដោយឡែកប្រមុខការទូតឥណ្ឌា លោក Subrahmanyam Jaishankar ក៏មិនបានរិះគន់ចិនចំឈ្មោះដែរ ដោយនិយាយថា កិច្ចប្រជុំនេះ ជាសក្ខីភាពដ៏សំខាន់សម្រាប់សម្ព័ន្ធមិត្ត។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។

សម្រាប់រដ្ឋមន្ត្រីការបរទេសជប៉ុន លោកToshimitsu Motegi វិញ ក៏មិនបានលើកឡើងពីចិននៅក្នុងសេចក្តីថ្លែងការណ៍របស់ខ្លួនដែរ។ បើតាមការបញ្ជាក់លោកMotegi ប្រព័ន្ធអន្តរជាតិក្នុងពេលបច្ចុប្បន្ន ស្ថិតក្នុងការប្រឈមលើបញ្ហាជាច្រើន ស្របពេល COVID-19 កំពុងតែអុកឡុក។ ការណ៍នេះ ប្រមុខការទូតជប៉ុន បានទទូចឲ្យក្រុមប្រទេស Quad សហការគ្នា ដើម្បីពង្រឹងប្រព័ន្ធបើកចំហ និងសេរីដែលជាប្រព័ន្ធអន្តរជាតិដោយផ្នែកទៅលើច្បាប់៕