អគ្គរដ្ឋទូតឥណ្ឌូណេស៊ីចង់ឃើញ កម្ពុជា និងឥណ្ឌូណេស៊ីសហការគ្នាលើឧស្សាហកម្មយោធា

ជាតិ

សង្គមជាតិ

អន្តរជាតិ

អគ្គរដ្ឋទូតឥណ្ឌូណេស៊ីចង់ឃើញ កម្ពុជា និងឥណ្ឌូណេស៊ីសហការគ្នាលើឧស្សាហកម្មយោធា

07, Oct 2020 , 10:29 pm

រូបភាព

ស្ថានទូតឥណ្ឌូណេស៊ីប្រចាំនៅកម្ពុជាបានប្រារព្ធខួបលើកទី៧៥ឆ្នាំនៃការបង្កើតកងកម្លាំងការពារជាតិឥណ្ឌណេស៊ីនៅថ្ងៃទី ៥ ខែតុលា (រូបភាព៖ ស្ថានទូតឥណ្ឌូណេស៊ីនៅកម្ពុជា)

ដោយ: ធៀន ភារិន្ទ

ចំណងសហប្រតិបត្តិការការពារជាតិ និងយោធារវាងឥណ្ឌូណេស៊ី និងកម្ពុជា គួរតែមានកម្រិតខ្ពស់ជាងបច្ចុប្បន្នពិសេសគឺផ្តោតលើកិច្ចសហការលើឧស្សាហកម្មយោធា។ នេះជាការលើកឡើងរបស់អគ្គរដ្ឋទូតឥណ្ឌូណេស៊ីប្រចាំនៅកម្ពុជា លោក Sudirman Haseng នៅថ្ងៃទី៥ ខែតុលា។

ស្ថានទូតឥណ្ឌូណេស៊ីប្រចាំនៅកម្ពុជាបានប្រារព្ធខួបលើកទី៧៥ឆ្នាំនៃការបង្កើតកងកម្លាំងការពារជាតិឥណ្ឌណេស៊ីនៅថ្ងៃទី ៥ ខែតុលា ដោយពិធីនេះត្រូវធ្វើឡើងក្រោមប្រធានបទ «ភាពស៊ីសង្វាក់គ្នាដើម្បីប្រជាជាតិមួយ»។

ថ្លែងទៅកាន់ភ្ញៀវកិត្តិយសដែលចូលរួមក្នុងកម្មវិធី ឯកអគ្គរដ្ឋទូតវិសាមញ្ញ និងពេញសមត្ថភាពឥណ្ឌូណេស៊ីប្រចាំនៅកម្ពុជា លោក Sudirman Haseng បានលើកឡើងថា ថ្វីបើទំនាក់ទំនងទ្វេភាគីល្អប្រសើរ និងរឹងមាំទៅហើយក៏ដោយ ទំនាក់ទំនងការពារជាតិ និងយោធារវាងកម្ពុជា និងឥណ្ឌូណេស៊ីគួរតែឈានដល់កម្រិតខ្ពស់ជាងបច្ចុប្បន្ន។

ឯកអគ្គរដ្ឋទូតរូបនេះថ្លែងយ៉ាងដូច្នេះថា៖ «ក្នុងកម្មវិធីដ៏ពិសេសនេះ ខ្ញុំសូមបង្ហាញសេចក្តីសង្ឃឹមថា ស្របពេលកិច្ចសហប្រតិបត្តិការការពារជាតិ និងយោធារវាងកម្ពុជា និងឥណ្ឌូណេស៊ី មានលក្ខណៈល្អ និងរឹងមាំ ភាគីទាំងពីរ គួរស្វែងរកកិច្ចសហប្រតិបត្តិការក្នុងកម្រិតខ្ពស់ ដើម្បីផលប្រយោជន៍ទ្វេភាគីបន្ថែមទៀត សម្រាប់ពួកយើង»។

លោក នាង ផាត រដ្ឋលេខាធិការក្រសួងការពារជាតិ ដែលតំណាងឲ្យសម្តេច ទៀ បាញ់ ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិកម្ពុជា, លោក ឈិន ច័ន្ទពណ៌ អគ្គមេបញ្ជាការរងនៃកងយោធពលខេមរភូមិន្ទ ក៏មានវត្តមានក្នុងកម្មវិធីនេះដែរ។

ទាក់ទិននឹងការពង្រឹងទំនាក់ទំនងយោធាទៅកាន់កម្រិតខ្ពស់នោះ ឯកអគ្គរដ្ឋទូតរូបនេះក៏បានលើកឡើងជាចំហថា កម្ពុជា និងឥណ្ឌូណេស៊ីអាចពង្រឹងកិច្ចសហប្រតិបត្តិការលើឧស្សាហកម្មយោធាក៏ដូចជាផលិតសព្វាវុធជាដើម។

អ្នកការទូតឥណ្ឌូណេស៊ីរូបនេះបានរៀបរាប់ដូច្នេះថា៖ «ឥណ្ឌូណេស៊ីមានឧស្សាហកម្ម ផលិតយន្តហោះសម្រាប់ស៊ីវិល និងយោធា, រោងចក្រសាងសង់កប៉ាល់ និងនាវាមុជទឹក, និងរោចក្រយោធាផ្សេងទៀត ដែលអាចផលិតរថពាសដែក កាំភ្លើងជាដើម។ ទាក់ទិននឹងបញ្ហានេះ កម្ពុជាអាចសហការជាមួយឥណ្ឌូណេស៊ីលើវិស័យទាំងនោះបាន»។

លោក Surdirman បានបន្តថា ការផ្លាស់ប្តូរទស្សនកិច្ចយោធារវាងមន្ត្រីជាន់ខ្ពស់នៃក្រសួងការពារជាតិកម្ពុជា និងឥណ្ឌូណេស៊ីដើម្បីធានាពីភាពស្និទ្ធស្នាលនៃចំណងមិត្តភាពនេះ។ អ្វីដែលសំខាន់នោះគឺ ឯកអគ្គរដ្ឋទូតឥណ្ឌូណេស៊ីរូបនេះសង្កត់ធ្ងន់ថា ក្នុងទស្សនកិច្ចនេះ មន្ត្រី និងកងទ័ពកងទ័ពកម្ពុជាអាចទៅទស្សនកិច្ចរោងចក្រឧស្សាហកម្មយោធាទាំងនោះដើម្បីស្វែងយល់បន្ថែមពីគុណភាពនិងសមត្ថភាពសព្វាវុធផលិតដោយឥណ្ឌូណេស៊ីផ្ទាល់។

តាមពិតទៅ កម្ពុជា និងឥណ្ឌូណេស៊ី បានចាប់ផ្តើមភ្ជាប់ទំនាក់ទំនងការទូតផ្លូវការនៅក្នុងឆ្នាំ ១៩៥៩។ ប៉ុន្មានទសវត្សរ៍ ក្រោយ ប្រជាជាតិទាំងពីរ បានពង្រីកទំនាក់ទំនងទ្វេភាគីថែមទៀត ជាពិសេសលើវិស័យសេដ្ឋកិច្ច និងពាណិជ្ជកម្ម។ តាមទិន្នន័យរបស់ក្រសួងពាណិជ្ជកម្មកម្ពុជា នៅក្នុងឆ្នាំ២០១៩ ពាណិជ្ជកម្មរវាងកម្ពុជា និងឥណ្ឌូណេស៊ី បានកើនឡើង ៤៦ ភាគរយ ដែលមានចំនួន ៧៩២លានដុល្លារ ខណៈឆ្នាំ២០១៨ មានចំនួន ៥៤៣លានដុល្លារ៕