សម្ដេច ហ៊ុន សែន៖ កសិករប្រឹងដាំដុះ ផ្គត់ផ្គង់តម្រូវការក្នុងស្រុកក្នុងអំឡុងវិបត្តិកូវីដ-១៩

ជាតិ

សម្ដេច ហ៊ុន សែន៖ កសិករប្រឹងដាំដុះ ផ្គត់ផ្គង់តម្រូវការក្នុងស្រុកក្នុងអំឡុងវិបត្តិកូវីដ-១៩

08, Oct 2020 , 7:59 am

រូបភាព

សម្ដេច ហ៊ុន សែន នាឱកាសចុះពិនិត្យកសិករខេត្តតាកែវ នាពេលកន្លងមក (រូបភាពពី SPM)

ដោយ:

ភ្នំពេញ៖ វិបត្តិកូវីដ-១៩ ដែលបានអូសបន្លាយតាំងពីដើមឆ្នាំ២០២០ បានក្លាយជាឱកាសដ៏ល្អសម្រាប់វិស័យកសិកម្មកម្ពុជា បង្ហាញសក្តានុពលរដ្ឋរបស់ខ្លួន។ នេះជាការលើកឡើងរបស់សម្ដេច ហ៊ុន សែន នាយករដ្ឋមន្ត្រីកម្ពុជា នាឱកាសសម្ពោធមជ្ឈមណ្ឌលកម្សាន្តមួយកន្លែងនៅស្រុកកៀនស្វាយ ខេត្តកណ្តាល កាលពីថ្ងៃទី៧ ខែតុលា។

សម្តេច នាយករដ្ឋមន្ត្រី បានបញ្ជាក់ថាវិស័យកសិកម្មកម្ពុជា បានកើនឡើង ក្នុងអំឡុងកូវីដ-១៩ ខណៈដែលវិស័យឧស្សាហកម្ម និងសេវាកម្ម បានថយចុះនោះ។ កូវីដ-១៩ បានធ្វើឲ្យកសិករ ខំប្រឹងប្រឹងដាំដុះ បន្លែបង្ការ ដើម្បីផ្គត់ផ្គង់តម្រូវការនៅក្នុងស្រុក។ ប្រមុខរាជរដ្ឋាភិបាល បានមានប្រសាសន៍យ៉ាងដូច្នេះថា៖« «វិស័យកសិកម្មមានទំហំតូចណាស់។ សម្រាប់ប្រទេសអភិវឌ្ឍ វិស័យកម្មមានតែមួយភាគរយ ឬជាងមួយភាគ ឬក្រោមមួយភាគរយប៉ុណ្ណោះ។ ប៉ុន្តែក្នុងស្ថានភាពកូវីដ-១៩ ធ្វើឲ្យពលរដ្ឋកម្ពុជា ប្រឹងដាំ ប្រឹងដុះ និងកាត់បន្ថយការនាំចូល»។

ស្របពេលដែលផលិតភាពវិស័យកសិកម្មកម្ពុជា កំពុងកើនឡើង និងឈានដល់ការកាត់បន្ថយការនាំចូល សម្រេចហ៊ុន សែន ក៏រំឭកកសិករ ឲ្យត្រៀមរៀបចំខ្លួនជាស្រេច ដើម្បីចូលរួមឲ្យបានកាន់តែច្រើនក្នុងការរក្សាសន្តិសុខស្បៀង ដោយត្រូវរៀបចំប្រព័ន្ធស្តុកទឹកឲ្យបានត្រឹមត្រូវ ដើម្បីមានទឹកប្រើប្រាស់គ្រប់គ្រាន់ នៅរដូវទឹកស្រក។

ក្រៅពីវិស័យកសិកម្ម នាយករដ្ឋមន្ត្រីកម្ពុជា ក៏បានលើកឡើងពីភាពវិជ្ជមាននៃវិស័យទេសចរក្នុងស្រុក ក៏ដូចជាការបង្ហាញសមត្ថភាពនៅក្នុងវិស័យសុខាភិបាលផងដែរ។ ទេសចរក្នុងស្រុក ជាងលាននាក់ ដែលធ្លាប់តែធ្វើដំណើរទេសចរណ៍ ទៅក្រៅប្រទេស បានបង្ហែរទិសដៅទេសចរណ៍របស់ខ្លួននៅក្នុងវិញ។ ដូចគ្នាដែរ នឹងផ្នែកសុខាភិបាល ដែលប្រជាពលរដ្ឋ មិនអាចធ្វើដំណើរទៅព្យាបាលនៅក្រៅប្រទេសដូចពីមុននោះ ក៏បានទទួលការព្យាបាលនៅតាមមន្ទីរពេទ្យរដ្ឋនានាដែរ៕