COVID-19
អន្តរជាតិ
លោក Bill Gates ថា មានវ៉ាក់សាំង ប្រទេសអ្នកមានវិលទៅស្ថានភាពដើមនៅចុងឆ្នាំ២០២១
មហាសេដ្ឋីអាមេរិក Bill Gates។ រូបភាព៖ AFP
×![]()
មហាសេដ្ឋីអាមេរិក Bill Gates អះអាងថា ប្រទេសអ្នកមានអាចនឹងត្រឡប់ទៅស្ថានភាពរស់នៅសឹងតែដូចដើមវិញ នៅចុងឆ្នាំ២០២១ បើសិនជាវ៉ាក់សាំងបង្ការជំងឺ COVID-19 មានប្រសិទ្ធភាព។ លោកបន្តថា វ៉ាក់សាំង នឹងត្រូវបែងចែកក្នុងបរិមាណដ៏ច្រើនបំផុត។
បើទោះបីជាវ៉ាក់សាំងបង្ហារជំងឺ COVID-19 មិនទាន់ត្រូវបានផលិតក្តី មហាសេដ្ឋីបច្ចេកវិទ្យាអាមេរិក Bill Gates អះអាងថា ប្រទេសអ្នកមានអាចនឹងត្រឡប់មកការរស់មុនពេលមាន COVID-19 វិញនៅចុងឆ្នាំ២០២១។
«នៅត្រឹមចុងឆ្នាំក្រោយ អ្វីៗសឹងតែត្រឡប់ទៅដូចធម្មតា។ នេះជាករណីល្អបំផុត»។ លោក Bate បញ្ជាក់បែបនេះក្នុងកិច្ចសម្ភាសជាមួយកាសែត Wall Street Journal។ ប៉ុន្តែលោកបញ្ជាក់ថា ពេលនេះពុំទាន់មានអ្នកណាដឹងថា វ៉ាក់សាំងមានដំណើរការនៅឡើយទេ។ យ៉ាងណា លោកសង្កត់ធ្ងន់ថា ពេលនេះ គេត្រូវបង្កើនសមត្ថភាពក្នុងការចែកចាយ ព្រោះការចែកចាយវ៉ាក់សាំងនៅអាមេរិក និងប្រទេសផ្សេង នៅតែជាបញ្ហា។
បច្ចុប្បន្នមានវ៉ាក់សាំងចំនួន២ របស់ក្រុមហ៊ុន Pfizer/BioNTech និង AstraZeneca/Oxford ដែលកំពុងប្រកួតប្រជែងគ្នា ដើម្បីទទួលបានការយល់ព្រមប្រើប្រាស់ពីអាជ្ញាធរសុខាភិបាលនៃប្រទេសលោកខាងលិច។ ចំពោះវ៉ាក់សាំងរបស់ចិន និងរុស្ស៊ីវិញ មិនទាន់មានការទទួលស្គាល់នៅឡើយ ព្រោះពុំមានការធ្វើតេស្តនៅដំណាក់កាលទី៣ ឲ្យបានទូលំទូលាយ។ ត្រង់នេះ លោក Gates ក៏និយាយថា វ៉ាក់សាំងរុស្ស៊ីដែលប្រញាប់ប្រញាល់ប្រើប្រាស់ បង្កើតជាក្តីបារម្ភ ដោយរុស្ស៊ីឲ្យអាទិភាពលើមុខមាត់ប្រទេសជាងសុវត្ថិភាព និងវិទ្យាសាស្ត្រ។
មហាសេដ្ឋីអាមេរិកទស្សទាយថា បើសិនវ៉ាក់សាំងផលិតដោយក្រុមហ៊ុនឱសថបស្ចិមលោក មានតម្លៃទាប នោះការទាក់ទាញឲ្យទិញវ៉ាក់សាំងរបស់ចិន និងរុស្ស៊ីប្រាកដជាមានកម្រិត ហើយវ៉ាក់សាំងទាំងនោះ ប្រហែលជានឹងត្រូវប្រើប្រាស់តែក្នុងស្រុកប៉ុណ្ណោះ។
សូមបញ្ជក់ថា លោក Gates មហាសេដ្ឋីបច្ចេកវិទ្យា បានបរិច្ចាគប្រាក់៣៦ពាន់លានដុល្លារដល់មូលនិធិBill& Melinda Gates ដើម្បីដោះស្រាយបញ្ហាក្រីក្រ និងសុខាភិបាល។ មូលនិធិនេះ កាលពីខែមិថុនាកន្លងទៅមានចុះកិច្ចព្រមព្រៀងជាមួយក្រុមហ៊ុនផលិតឱសថចំនួន១៦ ដើម្បីពន្លឿនការផលិតវ៉ាក់សាំងនៅពេលដែលវ៉ាក់សាំងនោះទទួលបានការអនុញ្ញាតឲ្យប្រើប្រាស់ពីអាជ្ញាធរសុខាភិបាល។
ទាក់ទងរឿងវ៉ាក់សាំងនេះ អគ្គនាយកអង្គការសុខភាពពិភពលោក(WHO) លោក Tedros Adhanom Ghebreyesus បង្ហាញក្ដីសង្ឃឹមថា វ៉ាក់សាំងនឹងមាននៅត្រឹមចុងឆ្នាំ២០២០នេះ។ លោកក៏អំពាវនាវផងដែរឲ្យមានសាមគ្គីភាព និងការតាំងចិត្តពីសំណាក់អ្នកនយោបាយទាំងអស់ ក្នុងការធានាឲ្យមានការចែកចាយវ៉ាក់សាំងប្រកបដោយសមធម៌ នៅពេលដែលផលិតបាន។
បច្ចុប្បន្ននេះ វ៉ាក់សាំងចំនួន៩ ស្ថិតនៅក្នុងកម្មវិធីចែកចាយវ៉ាក់សាំង COVAX របស់ WHO ដែលមានគោលចែកចាយវ៉ាក់សាំងឲ្យបាន ២ពាន់លានដូសគិតត្រឹមចុងឆ្នាំ២០២១។ លោក Gates បន្ថែមថា បើសិនជាពិភពលោកទាំងមូលលែងចង់ឲ្យមានករណីឆ្លងជំងឺ COVID-19 គេត្រូវការពេលវេលាយ៉ាងហោចណាស់ពី២ទៅ៣ឆ្នាំបន្ថែមទៀតក្រោយពេលវ៉ាក់សាំងដែលមានប្រសិទ្ធភាពត្រូវបានផលិត៕
Tag:
COVID-19
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
