ក្រសួងរំលឹកដល់អ្នកធ្វើចត្តាឡីស័កឲ្យបន្តអនុវត្តត្រឹមត្រូវដើម្បីជៀសវាងការឆ្លងសហគមន៍

ជាតិ

សង្គមជាតិ

ក្រសួងរំលឹកដល់អ្នកធ្វើចត្តាឡីស័កឲ្យបន្តអនុវត្តត្រឹមត្រូវដើម្បីជៀសវាងការឆ្លងសហគមន៍

08, Oct 2020 , 8:59 am

រូបភាព

ដោយ:

ភ្នំពេញ៖ ក្រសួងសុខាភិបាលបានណែនាំឲ្យអ្នកធ្វើដំណើរមកពីក្រៅប្រទេសដែលចូលមកកម្ពុជាដែលត្រូវបានធ្វើតេស្តរកជំងឺកូវីដ-១៩លើកដំបូង ដោយលទ្ធផលបង្ហាញថាអវិជ្ជមានក្នុងអំឡុងការធ្វើចត្តាឡីស័កនោះ ត្រូវបន្តដាក់ខ្លួនឯងឲ្យនៅដាច់ពីអ្នកដទៃ ដោយមិនត្រូវប៉ះពាល់ ឬជួបនរណាម្នាក់ឡើយ ដើម្បីជៀសវាងឆ្លងជំងឺកូវីដ-១៩ចូលដល់សហគមន៍។ បើកាលណាការធ្វើតេស្តសាជាថ្មីមិនទាន់ចេញលទ្ធផលក្នុងអំឡុងធ្វើចត្តាឡីស័ក១៤ថ្ងៃមិនទាន់បញ្ចប់។

ក្រសួងសុខាភិបាលបានបញ្ជាក់ថា បើបុគ្គលណាដែលកំពុងតែស្ថិតនៅក្នុងការរស់នៅដាច់ដោយឡែកពីអ្នកដទៃ ដោយមិនគោរពតាមគោលការណ៍ណែនាំរបស់ក្រសួងសុខាភិបាល ដោយចល័តពីកន្លែងមួយទៅកន្លែងមួយទៀត ឬប៉ះពាល់អ្នកដទៃដោយគ្មានការការពារ ជំងឺកូវីដ-១៩ នឹងឆ្លងរាតត្បាតចូលក្នុងសហគមន៍ជាមិនខាន ប្រសិនជាបុគ្គលនោះមានវិជ្ជមានកូវីដ-១៩ពិតមែន។ ក្រសួងសង្កត់ធ្ងន់ថា បើបុគ្គលណាមិនគោរពតាមវិធានការទេ បុគ្គលនោះនឹងត្រូវអនុវត្តតាមច្បាប់។

កន្លងមកក៏មានករណីអ្នកកំពុងធ្វើចត្តាឡីស័កដោយលទ្ធផលអវិជ្ជមានកូវីដ-១៩ជាច្រើននាក់ និងវិជ្ជមានកូវីដ-១៩ម្នាក់បានរត់ចេញពីកន្លែងធ្វើចត្តាឡីស័កផងដែរ ប៉ុន្តែគ្រប់គ្រងបានទាន់ពេលវេលា ដោយមិនមានការរាតត្បាតឆ្លងដល់សហគមន៍ឡើយ។ ករណីរត់ចេញពីកន្លែងចត្តាឡីស័កនេះ ក្រសួងសុខាភិបាលក៏បានណែនាំ និងវិន័យជាទឹកប្រាក់ផងដែរ។

ដើម្បីកុំឲ្យមានករណីទាំងនេះកើតឡើងជាបន្តទៀត ក្រសួងសុខាភិបាលបានបង្គាប់ឲ្យអាជ្ញាធរគ្រប់លំដាប់ថ្នាក់ចាត់ចែងឲ្យកម្លាំងឃ្លាំមើល និងធ្វើការណែនាំពីវិធានការការពារខ្លួនដើម្បីបង្ការកុំឲ្យឆ្លងដល់សហគមន៍។ ក្រសួងណែនាំឲ្យអាជ្ញាធរដឹកនាំការងារគ្រប់គ្រង និងសំអាតឲ្យបានស្អាតនៅគ្រប់មណ្ឌល ផ្ទះ និងសណ្ឋាគារចត្តាឡីស័ក។ បុគ្គលិកមន្ទីរពេទ្យបង្អែក និងអាជ្ញាធរ ត្រូវតាមដានអ្នកធ្វើចត្តាឡីស័កនៅតាមផ្ទះឲ្យបានដិតដល់ ដើម្បីកុំឲ្យមានអ្នករត់ចេញពីកន្លែងចត្តាឡីស័ក។

ក្រសួងសុខាភិបាលបានណែនាំដល់អ្នកដែលកំពុងធ្វើចត្តាឡីស័កនៅតាមផ្ទះ ត្រូវនៅក្នុងបន្ទប់ដាច់ដោយឡែកឲ្យគ្រប់១៤ថ្ងៃដោយបើកឲ្យទ្វារ និងបង្អួចមានខ្យល់ចេញចូល។ ត្រូវពាក់ម៉ាស់ និងរក្សាគម្លាតមួយម៉ែត្រកន្លះពីសមាជិកគ្រួសារ និងអ្នកដទៃ។ លាងដៃជាប្រចាំក្រោយពីចេញពីបន្ទប់ទឹក។ ខ្ទប់មាត់ និងច្រមុះនៅពេលក្អកជាមួយនឹងក្រមា និងក្រដាសជូតមាត់។ បោះចោលសំរាមនៅក្នុងធុងសំរាម និងសម្អាតបន្ទប់ទឹក ស្រោមពូក ខ្នើយ ភួយ និងវត្ថុប្រើប្រាស់ជាប្រចាំ៕