COVID-19
អន្តរជាតិ
ឥណ្ឌូណេស៊ីថា សហការជាមួយចិនលើវ៉ាក់សាំង COVID-19 មិនប៉ះពាល់ជំហររឿងសមុទ្រចិនខាងត្បូងឡើយ រូបភាព៖ Reuters
× ប្រមុខការទូតឥណ្ឌូណេស៊ី លោកស្រី Retno Marsudi នៅថ្ងៃទី៦ ខែតុលា បានលើកឡើងថា កិច្ចសហប្រតិបត្តិការរវាងចិន និងឥណ្ឌូណេស៊ី លើវ៉ាក់សាំង COVID-19 មិនអាចមានឥទ្ធិពលលើជំហររបស់ខ្លួននៅក្នុងសមុទ្រចិនខាងត្បូងឡើយ។
ជម្លោះសមុទ្រចិនខាងត្បូង មានប្រទេសជម្លោះចំនួន៥ ក្នុងនោះមានដូចជា ចិន ហ្វីលីពីន ម៉ាឡេស៊ី វៀតណាម និងព្រុយណេ។ ឥណ្ឌូណេស៊ី មិនមានជាភាគីនៃជម្លោះនេះឡើយ ប៉ុន្តែតែងតែបញ្ចេញសម្លេងលើឆាកអន្តរជាតិ និងតំបន់ជុំវិញបញ្ហាសមុទ្រចិនខាងត្បូងនេះ។ នៅពាក់កណ្តាលខែកញ្ញាកន្លងទៅ ឥណ្ឌូណេស៊ី បានជំទាស់ជាថ្មីលើសកម្មភាពកងល្បាតជើងទឹកចិន ដែលបានចូលទៅក្បែរតំបន់មានប្រជាជនរស់នៅ ក្នុងតំបន់សេដ្ឋកិច្ចផ្តាច់មុខណាទុណា ឥណ្ឌូណេស៊ី។
តាមការចុះផ្សាយរបស់ទីភ្នាក់ងារព័ត៌មាន AP នៅពាក់កណ្តាលខែកក្កដាកន្លងទៅ ឥណ្ឌូណេស៊ីបានរើសបេក្ខជនស្ម័គ្រចិត្តចំនួន ១៦២០នាក់ ឲ្យចូលរួមក្នុងការធ្វើតេស្តវ៉ាក់សាំងដំណាក់កាល៣ ជាមួយក្រុមហ៊ុនចិន Sinovac BioTech។ បន្ថែមពីលើនេះ ឥណ្ឌូណេស៊ី ក៏បានសហការជាមួយក្រុមហ៊ុនចិន Sinopharm លើវ៉ាក់សាំង COVID-19 ផងដែរ ដើម្បីធានាថា ប្រជាជន ២៦០លាននាក់អាចទទួលបានវ៉ាក់សាំង។
ទាក់ទិននឹងបញ្ហានេះ លោកស្រី Retno Marsudi រដ្ឋមន្ត្រីការទូតឥណ្ឌូណេស៊ី ត្រូវបានអ្នកសារព័ត៌មានរបស់ទូរទស្សន៍ Channel News Asia ចោទជាសំណួរថា តើកិច្ចសហប្រតិបត្តិការវ៉ាក់សាំងCOVID-19 អាចធ្វើឲ្យប៉ះពាល់ជំហររបស់ឥណ្ឌូណេស៊ីលើសមុទ្រចិនខាងត្បូងឬក៏អត់? ប្រមុខការទូតឥណ្ឌូណេស៊ី បានបកស្រាយថា៖ «ខ្ញុំអាចឆ្លើយសំណួរយ៉ាងច្បាស់លាស់ថា ទេ វាមិនប៉ះពាល់ទេ។ នោះគឺជាបញ្ហាពីរផ្សេងពីគ្នា។ នៅពេលយើងសហប្រតិបត្តិការជាមួយគ្នា វាមិនមែនជាកិច្ចសហប្រតិបត្តិការមិនស្មើភាព ដែលផ្តល់ប្រយោជន៍តែភាគីម្ខាងឡើយ»។
ជាមួយគ្នានេះ លោកស្រីMarsudi បានបន្តថា ចំណែកភាគីចិន ក៏ទទួលផលប្រយោជន៍ដែរ ដែលនោះគឺជាផលប្រយោជន៍ទៅវិញទៅមក។
ទន្ទឹមគ្នានេះ លោកស្រីប្រមុខការទូតឥណ្ឌូណេស៊ីរូបនេះ ក៏បានលើកឡើងទៀតថា បើទោះជាឥណ្ឌូណេស៊ី មានដៃគូជាមួយក្រុមហ៊ុនចិនក្តី ប៉ុន្តែខ្លួននឹងបន្តស្វែងរកដៃគូដទៃទៀត។ ស្របគ្នានេះ ឥណ្ឌូណេស៊ី ក៏បានអភិវឌ្ឍវ៉ាក់សាំងដោយខ្លួនឯង និងជាមួយបណ្តាប្រទេសផ្សេងទៀត ដូចជាកូរ៉េខាងត្បូង និងអេមីរ៉ាតអារ៉ាប់រួមជាដើម។
សូមបញ្ជាក់ថា គិតមកត្រឹមថ្ងៃទី៧ ខែតុលា ឥណ្ឌូណេស៊ី មានករណីCOVID-19 សរុបចំនួន ៣១៥៧៤១ករណី អ្នកស្លាប់មានចំនួន ១១៤៧២នាក់ និងអ្នកជាសះស្បើយមានចំនួន ២៤០២៩១នាក់៕
Tag:
ឥណ្ឌូណេស៊ី
ចិន
COVID-19
© រក្សាសិទ្ធិដោយ thmeythmey.com