ការប្រកួតប្រជែង«ភូមិគ្មានប្លាស្ទិក» នឹងពង្រីកទៅកាន់ភូមិ-ឃុំនានា ក្នុងស្រុកបន្ទាយស្រី

ជាតិ

ការប្រកួតប្រជែង«ភូមិគ្មានប្លាស្ទិក» នឹងពង្រីកទៅកាន់ភូមិ-ឃុំនានា ក្នុងស្រុកបន្ទាយស្រី

08, Oct 2020 , 9:29 pm

រូបភាព

ដោយ:

គម្រោង«ភូមិគ្មានប្លាស្ទិក» បានធ្វើឡើងតាំងពីខែមីនា ឆ្នាំ២០២០មកម្ល៉េះ នៅក្នុងភូមិទាំង៦ នៃព្រះដាក់ ស្រុកបន្ទាយស្រី ខេត្តសៀមរាប។ ជាគម្រោងដែលតម្រូវឲ្យគ្រប់ភូមិក្នុងឃុំព្រះដាក់ ប្រកួតប្រជែងគ្នា ក្នុងការសម្អាតបរិស្ថាន ពិសេសគឺផ្តោតលើការគ្រប់គ្រងសំណល់ប្លាស្ទិក។ គម្រោងនេះ នឹងបញ្ចប់នៅចុងឆ្នាំ២០២០នេះ។ បន្ទាប់ពីឃុំព្រះដាក់ លោក ឃឹម ហ្វីណង់ អភិបាលស្រុកបន្ទាយស្រី បានប្រាប់សារព័ត៌មានThmeyThmey25 គម្រោង«ភូមិគ្មានប្លាស្ទិក» ដែលមានលក្ខណៈប្រកួតប្រជែងនេះ នឹងពង្រីកទៅកាន់ឃុំផ្សេងៗទៀតនៅក្នុងស្រុកបន្ទាយស្រី។

រយៈពេល៦ខែមកហើយ ដែលរដ្ឋបាលស្រុកបន្ទាយស្រី បានជ្រើសរើសឃុំព្រះដាក់ ជាឃុំគោលដៅសម្រាប់អនុវត្តគម្រោង«ភូមិគ្មានប្លាស្ទិក»។ គម្រោងនេះ ផ្តោតលើការការអប់រំអ្នកភូមិនៅតាមផ្ទះ ការបង្កើតក្រុមយុវជនស្ម័គ្រចិត្តគំរូលើការងារបរិស្ថាន ប្រព័ន្ធលើកទឹកចិត្តនានា និងសកម្មភាពបរិស្ថានជាប្រចាំខែជាមួយអ្នកភូមិ។

តាមលោក ឃឹម ហ្វីណង់ ដែលបានថ្លែងប្រាប់សារព័ត៌មាន Thmeythmey25 មិនមែនសំដៅបញ្ឈប់ការប្រើប្រាស់ប្លាស្ទិកតែម្តងនោះតែ ប៉ុន្តែជាការផ្ដោតលើការអប់រំ ដើម្បីឲ្យអ្នកភូមិឈានទៅបដិសេធ កាត់បន្ថយ និងប្រើប្រាស់ឡើងវិញ។ «យើងបានដាក់ឈ្មោះថា Plastic Free Village (ភូមិគ្មានប្លាស្ទិក) ប៉ុន្តែការងារជាគោលដៅយើង មិនរំពឹងថានឹងគ្មានប្លាស្ទិកសោះនោះទេ ប៉ុន្តែផ្ដោតលើការអប់រំណាមួយ ឈានទៅដល់ការបដិសេធ ការកាត់បន្ថយ ការប្រើប្រាស់ឡើងវិញ។ ធ្វើយ៉ាងណា ឱ្យការអប់រំពីការប្រើប្រាស់ប្លាស្ទិកនេះ ទៅដល់ប្រជាពលរដ្ឋក្នុងភូមិទាំង៦ ក្នុងឃុំព្រះដាក់ ឱ្យបានយល់ដឹង»។ នេះជាការរៀបរាប់របស់លោកអភិបាលស្រុកបន្ទាយស្រី។

អង្គការជឿជាក់លើសិស្សជនបទ ដែលរួមសហការជាមួយរដ្ឋបាលស្រុកបន្ទាយស្រី ក្នុងគម្រោងភូមិគ្មានប្លាស្ទិក នឹងបញ្ចប់នៅដំណាច់ឆ្នាំ២០២០នេះ ហើយភូមិ១ ដែលគ្រប់គ្រងសំណល់ប្លាស្ទិកបានល្អជាងគេ នៅក្នុងចំណោមភូមិទាំង៦ នៃឃុំព្រះដាក់ ដូចជា ភូមិព្រះដាក់ ភូមិថ្នល់បណ្ដោយ ភូមិតាត្រៃ ភូមិថ្នល់ទទឹង ភូមិតាកុះ និងភូមិអូរទទឹង នឹងត្រូវជ្រើសរើសជាជ័យលាភី។ យ៉ាងណាក៏ដោយ មុននឹងត្រូវបានជ្រើសរើស ភូមិទាំង៦ នៃឃុំព្រះដាក់ដែលចូលរួមប្រកួតប្រជែងលើគម្រោង «ភូមិគ្មានប្លាស្ទិក» ត្រូវឆ្លងកាត់ការវិនិច្ឆ័យជាច្រើនដំណាក់។ ការវិនិច្ឆ័យ គឺអាស្រ័យលើអនុវត្តសកម្មភាពទាំងឡាយណា ដែលស្ថិតក្រោមប្រធានបទ បដិសេធ កាត់បន្ថយ ប្រើឡើងវិញ និងកែច្នៃសំណល់ប្លាស្ទិក ដែលរួមមានការអប់រំ ការចុះរើសសំរាម ការពង្រាយធុងសំរាមនៅតាមទីសាធារណៈជាដើម។ លោក ឃឹម ហ្វីណង់ បានបញ្ជាក់ថា៖ « គោលដៅនៃគម្រោងនេះ យើងចង់បានតែភូមិមួយជាគំរូ ពាក់ព័ន្ធនឹងការគ្រប់គ្រងប្លាស្ទិកទេ ហើយប្រជាជន ក្នុងភូមិទាំង៦នេះ ត្រូវចូលរួមប្រកួតប្រជែងគ្នា។ ចំណែកភូមិដទៃទៀត យើងនឹងមានគម្រោងនៅពេលក្រោយ»។

លោក ហ្វីណង់ រំពឹងថាក្រោយគម្រោង«ភូមិគ្មានប្លាស្ទិកនេះបញ្ចប់ ប្រជាពលរដ្ឋមិនថាតែនៅក្នុងឃុំព្រះដាក់ទេ ដែលបានយល់ដឹងពីការប្រើប្រាស់ប្លាស្ទិក ប៉ុន្តែពលរដ្ឋក្នុងឃុំដទៃទៀតនៃស្រុកបន្ទាយស្រី ពិសេសភ្ញៀវទេសចរជាតិ ក៏នឹងយល់ដឹងពីការប្រើប្លាស្ទិក និងចូលរួមបន្ថយការប្រើប្លាស្ទិកដែរ។ ស្រុកបន្ទាយស្រី ក៏នឹងអាចទាក់ទាញទេសចរ បានកាន់តែច្រើនបន្ថែមទៀតដែរ។ នេះជាការសង្ឃឹមរបស់អភិបាលស្រុកវ័យក្មេង ដែលទើបចូលកាន់តំណែងបានមួយឆ្នាំគត់រូបនេះ៕