សង្គមអន្តរជាតិ
អន្តរជាតិ
×![]()
កំពូលតារាចម្រៀងអាមេរិក Taylor Swift នៅថ្ងៃទី ៧ ខែតុលា បានប្រកាសថា នាងនឹងបោះឆ្នោតឲ្យបេក្ខជនប្រធានាធិបតីបក្សប្រជាធិបតេយ្យ ចូ បៃឌិននិងអ្នកស្រី ខាម៉ាឡា ហារីស បេក្ខជនអនុប្រធានាធិបតី ក្នុងការបោះឆ្នោតនាថ្ងៃទី ៣ ខែវិច្ឆិកា។ លោក បៃឌិន បានសរសេរអរគុណត្រលប់ទៅកាន់កញ្ញា Swift វិញ។ 
តារាចម្រៀងវ័យ៣០ឆ្នាំរូបនេះ បានចែករំលែករូបថត២សន្លឹកលើបណ្ដាញសង្គម Twitter ។ រូបមួយ បង្ហាញនាង Swift កាន់នំមួយចានធំដែលមានសរសេរអក្សរ«បៃឌិន ហារីស ២០២០» លើនោះ ។ ចំណែករូបមួយទៀត គឺជារូបគ្របទស្សនាវដ្តីមួយដែលបង្ហាញអក្សរ «VOTEឬបោះឆ្នោត»យ៉ាងធំលើផ្ទៃមុខនាង។
លើរូបទាំងពីរនេះ កំពូលតារាចម្រៀង Taylor Swift សរសេរដូច្នេះថា៖«ខ្ញុំបាននិយាយប្រាប់ទស្សនាវដ្តី V អំពីមូលហេតុដែលខ្ញុំនឹងបោះឆ្នោតឲ្យលោកចូ បៃឌិន ធ្វើជាប្រធានាធិបតី។ [ខ្ញុំ] នឹងមើល និងគាំទ្រអ្នកស្រី ខាម៉ាឡា ហារីស ដោយស្រែកដាក់ទូរទស្សន៍ឲ្យច្រើន។ ហើយខ្ញុំក៏នឹងអង្គុយញ្ញុំានំទាំងនេះផងដែរ»។
ការប្រកាសគាំទ្រជាសាធារណៈរបស់កំពូលតារាចម្រៀងអាមេរិកនេះ ធ្វើឡើងប៉ុន្មានម៉ោងប៉ុណ្ណោះមុនពេលកម្មវិធីជជែកដេញដោលអនុប្រធានាធិបតីរវាងលោក ម៉ៃ ផេន និងខាម៉ាឡា ហារីស ដែលរៀបចំឡើងនៅយប់ថ្ងៃទី ៧ ខែតុលា (ម៉ោងនៅអាមេរិក) ។
ក្នុងកិច្ចសម្ភាសជាមួយទស្សនាវដ្តី V កញ្ញា Taylor Swift បាននិយាយថា ការផ្លាស់ប្តូរដែលពលរដ្ឋអាមេរិកត្រូវការបំផុតគឺបោះឆ្នោតរើសប្រធានាធិបតីម្នាក់ដែលមិនរើសអើងពូជសាសន៍ ពណ៌សម្បុរ និងគោរពសិទ្ធិស្ត្រី ក៏ដូចជាសហគមន៍អ្នកស្រលាញ់ភេទដូចគ្នាផងដែរ។ ជាមួយគ្នានេះ កញ្ញា Swift ក៏សង្កត់ធ្ងន់ពីសារសំខាន់នៃរដ្ឋាភិបាលមួយ ដែលយកចិត្តទុកដាក់ខ្ពស់លើហានិភ័យសុខភាពសកល និងឲ្យតម្លៃលើជីវិតមនុស្ស។
លោក ចូ បៃឌិន បានអរគុណចំពោះការគាំទ្ររបស់ Taylor Swift ។ តាមរយៈបណ្ដាញសង្គម Twitter អតីតអនុប្រធានាធិបតីវ័យ៧៧ឆ្នាំរូបនេះ សរសេរដូច្នេះថា៖« Tayloy សូមអរគុណសម្រាប់ការគាំទ្រអ្នក និងសម្រាប់បញ្ចេញមតិអំឡុងពេលវេលាដ៏សំខាន់មួយក្នុងប្រវត្តិសាស្ត្ររបស់ប្រជាជាតិយើង»៕
Tag:
សហរដ្ឋអាមេរិក
Tayloy Swift
ចូ បៃឌិន
ការបោះឆ្នោតអាមេរិក
© រក្សាសិទ្ធិដោយ thmeythmey.com
