ជាតិ
ដាំកូនឈើគ្រញូង ធ្នង់ បេង គគីរ ឈើទាល និងកកោះជាង៤ម៉ឺនដើមនៅសហគមន៍តំបន់ការពារធម្មជាតិស្ទឹងថ្មី
× កូនឈើជាង៤ម៉ឺនដើម ត្រូវបានដាំឡើងវិញ នៅសហគមន៍តំបន់ការពារធម្មជាតិស្ទឹងថ្មី ក្នុងដែនជម្រកសត្វព្រៃភ្នំសំកុស ក្នុងភូមិសាស្ត្រខេត្តពោធិ៍សាត់។ ការដាំកូនឈើនេះ គឺដើម្បីស្តារព្រៃឡើងវិញ និងលើកកម្ពស់ការចូលរួមដាំស្តារព្រៃឈើ ពីប្រជាពលរដ្ឋ សហគមន៍ និងអ្នកពាក់ព័ន្ធ ក្នុងន័យការពារ និងអភិរក្សធនធានធម្មជាតិ។
កូនឈើគ្រញូង ធ្នង់ បេង គគីរ ឈើទាល និងកកោះ ជាង៤ម៉ឺនដើម ត្រូវបានក្រសួងបរិស្ថាន និងប្រជាពលរដ្ឋដាំដុះឡើងវិញ នៅក្នុងសហគមន៍តំបន់ការពារធម្មជាតិស្ទឹងថ្មី ក្នុងដែនជម្រកសត្វព្រៃភ្នំសំកុស ក្នុងភូមិសាស្ត្រភូមិស្ទឹងថ្មី ឃុំប្រម៉ាយ ស្រុកវាលវែង ខេត្តពោធិ៍សាត់។ កូនឈើទាំងនោះ ត្រូវបានដាំឡើងវិញ លើផ្ទៃដីចំនួន៥៦ហិកតា ក្នុងចំណោមផ្ទៃដី ៣០០ ហិកតា ដែលព្រៃឈើត្រូវបានជនខិលខូចដកហូត និងលួចកាប់ទន្ទ្រានខុសច្បាប់ នៅក្នុងតំបន់នោះ។ កម្មវិធីនេះ មានការចូលរួមពីក្រសួងបរិស្ថាន, សហគមន៍មូលដ្ឋាន, UNDP, RECOFTC។
ទំព័រហ្វេសប៊ុកក្រសួងបរិស្ថាន បញ្ជាក់ថាការដាំកូនឈើនេះ គឺដើម្បីស្តារព្រៃឡើងវិញ និងលើកទឹកចិត្តសហគមន៍ តំបន់ការពារធម្មជាតិដាំស្តារព្រៃ និងលើកកម្ពស់ការចូលរួមពីប្រជាពលរដ្ឋ និងអ្នកពាក់ព័ន្ធ ដែលបានខិតខំប្រឹងប្រែងចូលរួមការពារ និងអភិរក្សធនធានធម្មជាតិ។
លោក រត្ន័ វិរៈ អនុរដ្ឋលេខាធិការក្រសួងបរិស្ថាន បានបញ្ជាក់នាឱកាសនោះថា ការចូលរួមរបស់ពលរដ្ឋសហគមន៍ដោយផ្ទាល់នេះ គឺជាការបង្ហាញពីស្មារតីស្រលាញ់ធនធានធម្មជាតិ ដែលរួមមានព្រៃឈើ សត្វព្រៃជាដើម។ លោក រ័ត្ន វីរៈ បញ្ជាក់បន្ថែម៖«ព្រៃឈើជាផ្នែកមួយនៃការទាក់ទាញទឹកភ្លៀង រក្សាលំនឹងធម្មជាតិ ការពារខ្យល់ព្យុះ និងគ្រោះធម្មជាតិផ្សេងៗ។ ព្រៃឈើនៅតំបន់នេះ ជាប្រភេទព្រៃរបោះ ដែលអាចឲ្យសត្វគ្រប់ប្រភេទរស់នៅបាន។ ហេតុដូច្នេះ ប្រសិនបើយើងការពារព្រៃឈើ សត្វព្រៃបាន នោះយើងនឹងបានថវិកា ជួយដល់ការអភិវឌ្ឍជីវភាពសហគមន៍»។
លោក រត្ន័ វិរៈ ក៏បានបង្ហាញពីបំណងក្រសួងបរិស្ថាន ក្នុងការចូលរួមអភិវឌ្ឍនៅក្នុងតំបន់នេះ ទៅជាតំបន់ទេសចរដើម្បីទាក់ទាញបានប្រភពចំណូលសម្រាប់សហគមន៍ផងដែរ។ តាមក្រសួងបរិស្ថាន សហគមន៍តំបន់ការពារធម្មជាតិស្ទឹងថ្មី ត្រូវបានបង្កើតឡើងនៅឆ្នាំ២០១០ មានផ្ទៃដីទំហំ ៧១២ ហិកតា និងប្រជាជនចំនួន ១១០គ្រួសារ ជាសមាជិកសហគមន៍៕
Tag:
ដាំកូនឈើ
ពោធិ៍សាត់
ភ្នំសំកុស
© រក្សាសិទ្ធិដោយ thmeythmey.com